Read bura-pabir Zabura 82 Bible Online

Zabura 82 - bura-pabir bible

Zabura 82

¹Ha ar Asaf. Hyel ana ndzəndzi ata dəkəl kuthlikurərni akwa tsaptədzər mjirni na amtazi, tsa andər thlamta shariya akwa nca ɗa.

²“Nawa antə giri na alkaliyayeri ata sə zhar shariya na kula jirkur ri? Nawa antə giri ata sə zhar mbwa kir aka mji na kəmanggar ri?

³Ka giri mbul lapiyakur mjir bwani ka mutayeri, ka hara su na kalkal aka mjir tura ka mji na kula duna.

⁴Msərantə giri mji na kula duna ka mjir tura, ka giri mbuli ɗa akwa tsiya mji na kəmanggar.”

⁵Mji na kəmanggar aɗi ana səndə su wala nggaɓəla su wa! Da ana mwa akwa kuthlu, an su na hara tə duniya akwa kənggər ni.

⁶I, na Hyel na ka Səli ta Shang pəla, “Shanga giri an hyelayeri, tsuwa shanga giri an maɗa'na.

⁷Amma wala apani giri ata mta tsu apa mji ndzang, giri ata sə mta tsu apatə kəlara maina ana mta.”

⁸Mwa taktar, Hyel, kara hara shariya aka duniya, kamnyar shanga mjir duniya an ar nga!