Read bura-pabir Zabura 83 Bible Online

Zabura 83 - bura-pabir bible

Zabura 83

¹Ha ar Asaf: Ha. Aiyi, Hyel ragai, ga aɗiya ndzi ɗiɗi wa, ga aɗiya dləɓ səri, wala ndzi tsəkəm wa.

²Nggədza dawayeri ar nga akwa hara kurakər haptə hangkal, mji na nggəlar nga an akwa hara kər ɓəɓalkur ni.

³Da akwa ɗəmhə ɗimikur ata kəra mjir nga, da akwa paktə kər ata kəra mjir nga natə ga ana ɓəlata.

⁴Da akwa pəla, “Asər giri ka mburu ɓdləmta tsəɗi Israila, har tə mda aɗiya ata jaktə nggatə thləma Israila kəra wa.”

⁵Apani shanga ɗa ku paktə mnya ɗa ata kəma duku ka ndəli su na ɗimi ata kəra ga, Hyel,

⁶da an mjir Edom ka mjir Ishmayel, mjir Mowab ka mjir Hagar,

⁷har kəga mjir Gebal, ka Ammon, ka Amalek, ka mjir Filistiya ka mji na ahar Taya.

⁸Wala mjir Assiriya ma ku paktə kər ka da, da an dunawakur mjir nyarmbwar Lot.

⁹Hara ala ɗa su tə gə hara aka mjir Midiyan, ka su tə gə hara aka Sisera ka Yabin ata mnya Thlyaghar Kishon.

¹⁰Ga ku tsəgəi ɗa ahar Endor, antə mshiyir ɗa ku hiɗamtadzi ata di ka ndzi kuɓa.

¹¹Kuri ka mji ol'olər ɗa apatə gə kuri ka Oreb ka Zeyeb, ka shanga kuthlyayeri arɗa mta apa mtər Zeba, ka Zalmunna,

¹²na pəla abbər, “Mburu ata dlutsə tsəɗi na ar Hyel, ka tsa ndzi ar mburu” ni.

¹³Titiləmta ɗa, Hyel, apa bərbər akwa shambar, apa ɓaɓiya tə shambar kəta akwa təra kəgari.

¹⁴Apatə u'u ana mbamta kuɓər nfwa, ka apatə kyanggyara u'u ana mbamta gar.

¹⁵Kədlə ɗa ka shambar yimi ar nga, ka gə thlivərantə ɗa ka shambarər nga na mwavər!

¹⁶Hartə kəma ɗa ka sur səli, MTHLAKU, kamnyar ka da sənda abbər gə ka duna.

¹⁷Pu ɗa akwa sur səli ka da ndzi akwa thlivər ba saka madi har ka da sə mta akwa sur səli.

¹⁸Hara ka da sənda abbər gə shinga an MTHLAKU, abbər ga an kuthli na ka Səli ta Shang akwa duniya.