Read bura-pabir Zabura 85 Bible Online

Zabura 85 - bura-pabir bible

Zabura 85

¹Ha ar maɗashilər Kora aka mdər pwar ha. MTHLAKU ga ku hara ɓɗakkur aka tsəɗiyir nga, ga ku jaktə səntə ndzəndzi lapiyakur aka mjir Israila.

²Ga ku tifəmta bikər mjir nga, ka yafitə ɗa ata kəra shanga bikayeri tə da hara.

³Ga ku zhar kəl ɗəffu ka mjir nga, ka mtathli ɗəffə bwarbwarkurər nga.

⁴Jaktə ngka ka yeru, Hyel na mdər mbantər yeru, ka gə zhar ndzi ka ɗəffə ɓzəɓza ata kəra yeru!

⁵Ɗəffa ga ata ɓzə ka yeru ba saka madi ya? Ga ata ləkəma ka ndzi ka ɗəffə ɓzəɓza ba aka kəkayeri ar yeru ya?

⁶Ga aɗi ata ngka ka namtə yeru lapiya ka damwa, kamnyar ka yeru na mjir nga sə kucali tə gə wa ya?

⁷Ncanta ala yeru hirkurər nga na ana palidzi wa ni ni, MTHLAKU, ka gə mbantə yeru.

⁸Ndzi kəi nggatə su tə Hyel na MTHLAKU ata pəlari, kamnyar tsa ana səntə msərakur ala mburu na mjirni, mjirni na hir ni, ma mburu aɗi ngka akwa cakukur wa.

⁹Jiri, tsa ɗəmhəɗəmhari kamnyar ka tsa mbantə mji na ana thlivər ni, kamnyar ka səliyirni ndzi akwa tsəɗiyir mburu.

¹⁰Hirdzi na aɗi ana palidzi wa ka jirkur ata sə kəɓa ka nvwani, ɓɗakkur ka msərakur ata sə fəfahə nvwani.

¹¹Jirkur ata sə səɓəla akwa di, ɓɗakkur tsuwa ata sə thlata amtazi ka səghəi.

¹²Jiri, MTHLAKU ata hamta ala mburu su na ɓɗakɓɗaku, tsuwa tsəɗiyir mburu ata sə ya su.

¹³Ɓɗakkur ata sə mwa akəmari ka tsa tsarəmta alari laku.