Read bura-pabir Zabura 86 Bible Online

Zabura 86 - bura-pabir bible

Zabura 86

¹Adduwar Dauda. Kəlar thləma gə bu, MTHLAKU, kara hamta ali amsa, kamnyar I mdər bwani na akwa tur dlara.

²Ɓəlatə mpikəi, kamnyar I ana ndzi ka jirkur ala ga, mbantə ra kamnyar I mafar nga. Tsuwa I ana vəkər ka ga, ga an Hyelərna.

³Kətadzə ra MTHLAKU, kamnyar I ana ɓukci akwa kiɗə kəra ga.

⁴Hara ka ɗəffi ndzi msəra ali bu, MTHLAKU, kamnyar I an mafar nga, kamnyar ala ga antə I ana səntə tuwarna.

⁵Kamnyar MTHLAKU, ga ana hara ɓɗakkur tsuwa parang gə ɗəmhəɗəmhari kamnyar tifəmta aka mda, Gə nghyinghyari ka hirkur na ana palidzi wa, aka shanga mji na ana səntə tuwar ɗa akəma ga.

⁶Kəlar thləma ga, MTHLAKU, aka adduwarna, kara nggatə tuwarna kamnyar bara dlara.

⁷Kəlara sakatə I akwa bwani I ana hara adduwa ala ga, kamnyar ga ana hamta ali amsa.

⁸MTHLAKU, aɗi apa ga akwa nca hyelayeri wa, aɗi wala duku na amzhi hara kəthlər tə gə hara wa.

⁹Shanga tsəɗiyayeri natə ga ku namta, ata sə si ka dləri kəma ɗa akəma ga, MTHLAKU, ka haptə səliyir thləma ga.

¹⁰Kamnyar gə ol ka duna, tsuwa ga ku hara surndatayeri, gə shinga an Hyel.

¹¹Thlipta ali lakur ngə, MTHLAKU, kamnyar kəi nu nga ka jirkur kamnyar kəi mzhi nu nga ka ɗəffi duku.

¹²I ata hu nga ka ɗəffi shang, MTHLAKU na Hyelərna, I ata haptə səliyir thləma ga ba saka madi.

¹³Kamnyar hirkurər nga ali an ol ka duna, ga ku msərantə mpikəi ta ləkwa duniyar mji mtəmta.

¹⁴Aiyi Hyel, mjir gaya ku baɗitə thlentə hangkali, mji na ɗimi ku tsaptədzi akwa bara kəl mpikəi, mji natə da aɗi ana damitədzi ka gə wa.

¹⁵Amma MTHLAKU, ga an Hyel na ana hir mda ka kətadzə mda, ɗəffa ga aɗi ana ɓzi təkəma wa, gə ka hirkur na aɗi ana palidzi wa hang, ka jirkur.

¹⁶Shinardzi atar na kara hara ali ɓɗakkur, dunautə ra kara mbantə ra, mbantə ɓzər mwala na mafar nga, usa.

¹⁷Ncanta ali seɗar ɓɗakkurər ngə, MTHLAKU, kamnyar ka mji na nggəlar ra wutə ka da ləkwa səli, ma da ku wuta abbər ga ku dlar ra ka shiktə ra.