Read bura-pabir Zabura 88 Bible Online

Zabura 88 - bura-pabir bible

Zabura 88

¹Ha ar maɗashilər Kora aka mdər pwar ha, natə ka mdə hara ka kurakər “Ɗar Bwani ar Nggawakur.” Sur thlipə natə Haman na akwa nyarmbwar Ezra ku ɗəmhə kamnyar namtə mdə ɗəɗu. MTHLAKU, Hyel na ana mbantə ra, I ana ɓukci akwa tuwa dlara akəma ga, ma viri ku hara tsuwa I ana si akəma ga.

²Psi thləma ga usa aka adduwarna, kara kəlar thləma ga aka tuwarna!

³Sur ɓzamtə ɗəffu hang ku wutə ra, har I abaka mta.

⁴Mji ku jikau ra akwa nca mji na abaka mta, kamnyar I ndzi apa mdə na kula duna.

⁵I ndzi apa mshi tə mdə psəmta akwa nca mji na mtəmtari, apa mji tə mdə kurəmta ka pu ɗa akwa kula, apa mji tə mda ajaktə ɗangtə ɗa kəra wa, apa mji tə mdə thlamta ɗa ta da awutə dlara akəla ga.

⁶Ga ku ndzəhəu ra akwa ku na zurang, akwa vəi na zurang ka kuthlu na pələku.

⁷Ɗəffa ga ku ɓzi ata kəri ka duna, har tə gə vu tə pərtu kətə ra.

⁸Ga ku vu tə pazhayeri arna hwi ra, ka namtə ra tə I ndzi sur cika ala ɗa. Mdə ku hartə ra natə I amzhi msər wa,

⁹har tə nci awulɓəla su wa kamnyar bwani. MTHLAKU, tədək viri I akwa hara adduwa ala ga, I ana ndəraɓəla tsi kəi kəlari kamnyar kiɗə dlara akəla ga.

¹⁰Ga ana hara surndata aka mdə na ku mtə ya? Mambələr mji mtəmta ana thlatə ka hu ngə ya?

¹¹Mji na akwa kula ata mzhi gari ata kəra hirkurər nga na ana palidzi wa ni ya? Nənga mda ata mzhi ngkər jirkurər nga akwa duniyar mji mtəmtə ri?

¹²Mji na akwa kuthlu ata mzhi wutə surndatə tə ga ana hara ya? Nənga mji ata mzhi ngkər ɓɗakkur akwa tsəɗi fwari su ri?

¹³Amma arna I akwa səntə tuwarna akəma ga, MTHLAKU, I ana hara adduwa ala gə ɗəɗəp ɗəɗəpa.

¹⁴MTHLAKU, kamnyar mə tə gə nggəlar ra ri? Kamnyar mə tə gə ɗuwar kər nga ali ri?

¹⁵I ku ɗar bwani akwa ngkyarkurərna har I abaka mta, I ku ɗar bwani ka duna akwa tsiya ga, I amzhi nggitari kəra wa.

¹⁶Ɗəffə bwarbwarkurər nga ku lətə kəri, dlaɓu tə gə hara ali ɗimi ɗimi ni ata tsi ra.

¹⁷Da kalaktə ra apa yimi na ka shambar, har ka pci təri, ka hartə ra ata ɗəffu.

¹⁸Ga ku hara tə mji na hir ra kəga pazhayeri arna ku hwi ra, kuthlu shini an pazhir ndzəndziyirna.