Read bura-pabir Zabura 89 Bible Online

Zabura 89 - bura-pabir bible

Zabura 89

¹Sur thlipə natə Ethlan na akwa nyarmbwar Ezra ku ɗəmhə kamnyar namtə mdə ɗəɗu. MTHLAKU, I ata hara ha ata kəra hirkurər nga na ana palidzi wa ni ba saka madi. I ata ngkər jirkurər nga aka shanga zamanayeri.

²I ata psəmnya abbər hirkurər nga na ana palidzi wa ni ni ku ndzəndzi har ba saka madi, ka abbər jirkurər nga ku ndzəndzi har ba saka madi apa vəi na amtazi.

³Ga ku pəla, “I ku mbwi alkawal ka Dauda natə I carɓəla, ka kətə alkawal alari abbər,

⁴‘I ata nci kuthlikur akwa nyarmbwar nga ba saka madi, kəi tsəlpi kuthlikurər nga akwa shanga zamanayeri.’ ”

⁵MTHLAKU, vəi na amtazi akwa hu surndatayeri tə gə hara, mjirthlentərhyel ma akwa tsaptədzi ka hu nga kamnyar jirkurər nga.

⁶Mda aɗi amtazi tə mda amzhi gira ni ka gə, MTHLAKU, wa, mdərthlentərhyel aɗi tə mda amzhi gira ni ka gə wa.

⁷Ga an Hyel natə mambəlayeri na amtazi ana thlivəra akwa tsaptədzər ɗa. Gə sur thlivər na jirari, təramta shanga mji na kalaktə nga.

⁸MTHLAKU, Hyel na ka Duna ta Shang, mda aɗi na ka duna apa gə wa, gə ka jirkur akwa shanga su, MTHLAKU.

⁹Ga an ka kuthlikur ata kəra mandayeri na ol'ola, ma sakatə yimi ni ku thlatə ka ufti, gan andər mtathli ni.

¹⁰Ga an hadləmta Leviyathlan akwa manda, ka tsi ni, ka titiləmta dawayeri ar nga ka dunar tsiya ga.

¹¹Vəi na amtazi an ar nga, duniya ma tsu ar nga, duniya ka shanga su na akwa kutari gan namta.

¹²Ga an vəi yala ka anəm, Gar Hammon ka Gar Tabor akwa fwal nga kamnyar kucali.

¹³Pathlaha gə ni ɓəɓal ka duna, tsiya gə ma ka duna, ga ku haptə tsi mazəma ga ka kuthlikur.

¹⁴Ga ku nci səla kuthlikurər nga ata jirkur ka shariya na ka jirkur. Mda ana wutə hirkur na ana palidzi wa ka jirkur akwa shanga su tə ga ana hara.

¹⁵Msəra aka mji na asəndə fwal ngə ka ha, mji na ana mwa akwa parakər kəma ga,

¹⁶mji na ana ɓukci akwa kucali kamnyar nga, kamnyar atar jirkurər nga antə mdə ku haptə ɗa.

¹⁷Kamnyar dunar nga na ka daraja an namtə yeru ka duna, atar hirkurər nga antə yeru ku ndzi ka duna na ola.

¹⁸Jiri, partauwur yeru thlata akəla ga, MTHLAKU, kuthlir yeru thlata akəla ga, Hyel na Ɓɗakkarkara ar Israila,

¹⁹Sakanda ga ku ncantə kər nga aka mjir nga na ka jirkur, ka pəla, “I ku nar duna aka soja na ola, I ku carɓəla mdə laga ka haptə ni akwa nca mji.

²⁰I ku wutə Dauda, na buɗarna, ka kəkərtə kərari ka mal arna na ɓɗakkarkara.

²¹Kamnyar ka dunarna ndzi ata kərari parang saka, I ata namtə ni ka tsa ndzi ka duna.

²²Dawarni aɗi ata nggyari ni wa, tsuwa kəmanggar aɗi na ata mula alari wa.

²³I ata dlidlirəmta dawayeri arni ata ncari, kəi tsəgəi shanga mji na nggəlar ni.

²⁴I ata hir Dauda kəi hara shanga su tə I pəla I ata hara alari, I ata hara ka dunari jakjaka.

²⁵I ata jakə olkur tsəɗiyir kuthlikurərni baɗita ata mnya manda na ola ka mwanta ata mnya Thlyagha Yufiretis.

²⁶Tsa ata sə pəla ali, ‘Ga an baba' na ka Hyelərna, ga an Pelar Ɗuwardzi na ana mbantə ra.’

²⁷I ata namtə ni yarakəma arna, kuthli na ka səli ta shang akwa duniya.

²⁸I ata ləkəma ka hir ni ba saka madi, ka kəsi alkawal tə I hara alari ni gyang.

²⁹I ata nci kuthlikur akwa nyarmbwarni ba saka madi, kəkarni an ata ndzi ata dəkəl kuthlikur har ka duniya thlata.

³⁰“Amma ma kəkayeri arni ku zhar ɓəla tsawurna, tə da aɗi mwa akwa lakurna wa,

³¹ma da ku ɓəli surthlipərna, ka zhar ɓəla tsawayeri arna,

³²I ata dlaɓu ɗa ka zwal kamnyar bikər ɗa, kəi ɓu ɗa kamnyar ɗimikurər ɗa.

³³Amma I aɗi ata zhar hir Dauda wa, wala ɓəli alkawal tə I hara alari wa.

³⁴I aɗi ata ɓəli alkawal tə I hara alari wa, wala pali ndər tə I pəla alari wa.”

³⁵“I ku hara alkawal aka Dauda ka thləmi na ɓɗakkarkara, tsuwa I aɗi ata thlandər aka Dauda wa.

³⁶Nyarmbwarni ata sə ndzi ka kuthlikur ba saka madi, I ata wulwul kuthlikurərni ka tsa fəi apa pci.

³⁷Kuthlikurərni ata ncidzi gyang har ba saka madi apa thliya, natə tsa an seɗa na ka jirkur ata kutahyel.”

³⁸Amma kulini ɗəffa ga ku ɓzi ata kəra mdə tə gə carɓəla ni, tə ga ku nggəlar ni ka fwari ata kərari.

³⁹Ga ku ɓəli alkawal tə giri mbwi ka buɗar nga, ka psəmta dzakwar kuthlikurərni akwa bərbər.

⁴⁰Ga ku ɓəgələmta shanga katanggar bərniyirni, ka huzamta shanga vəi ɗuwardzi na ka duna.

⁴¹Shanga mji na akwa təramta ana famnya kariyirni, tsa ku ndzi sur kumshi aka ntəwulərni.

⁴²Gə vu tə dawarni ku nggyari ni, ka hara tə dawayeri arni ku kucali.

⁴³Har ma ga ku fəi mnya katsakarərni, ga aɗi hir dlar ni akwa mpa wa.

⁴⁴Ga ku dluɓəla zwalər kuthlikurərni akwa tsiyari, ka ndlamta dəkəl kuthlikurərni ata di.

⁴⁵Ga ku vu ni tə tsa hala akəmata sakarni, ka vu ni akwa sur səli.

⁴⁶MTHLAKU, nawa antə su ngəni ata sə kur ri? Ga ata ɗuwar kər nga har ba saka madi ya? Nawa antə ɗəffa gə na bwarbwar ni ata sə pwi ri?

⁴⁷Ɗangtə ra, kamnyar mpikəi ni kwadang kamta! Təng gə namtə mji gapani kula ampaniyari aɗi ya!

⁴⁸Wan ata ndzi kula ma sə mtə ri? Wan ata mzhi ngkatə kərni ta ləkwa kul ri?

⁴⁹MTHLAKU, hirkurər ngə ni ama ri? Alkawal tə gə hara aka Dauda abbər ga ata kəsiyari ni ama ri?

⁵⁰Ɗangtə Mthlaku, laku tə I na buɗar nga ku ləkwa səli, laku tə I nggitə nggənggəla tə mji hara ali.

⁵¹Dawayeri ar nga ku mnya ɗimi ali, MTHLAKU, da akwa nu kuthli tə gə carɓəla ni ka mnya ɗimi akwa kəlara bwa.

⁵²Hu gir MTHLAKU har ba saka madi Amin! Amin!