Read bura-pabir Zabura 9 Bible Online

Zabura 9 - bura-pabir bible

Zabura 9

¹Ha ar Dauda aka mdər pwar ha, ka mdə hara ka kurakər “Mtər Ɓzər Sal.” I ata usar MTHLAKU ka ɗəffi shang, I ata pəlaɓəla shanga surndatayeri tə ga ku hara.

²Hyel na ka Duna ta Shang, I ata hara kucali, I ata ndzi ka kucali kəi hara ha kamnyar nga.

³Sakatə dawayeri arna wutə nga təng da shinar kəma ɗa ka təra, antə da tsamta səla ɗa ka ndla ka mtəgəmtadzi akəma ga.

⁴Kamnyar ga ku lətə dəkəl kuthlikurər nga, ka hara shariya na kalkal ka jirkur, shariya na ku kəs kəri.

⁵Ga ku mpa aka durayeri na gapani, ka kurəmta mji na ɗimi ɗimi, ga ku tsi thləma ɗa har ba saka madi.

⁶An shar dawayeri ar yeru ba saka madi, ga ku huzamta bərniyayeri arɗa, antə mda aɗi ata ɗangtə ɗa kəra wa.

⁷Amma MTHLAKU an kuthli ba saka madi tsa ku nci dəkəl kuthlikurərni kamnyar shariya.

⁸Tsa ana hara kuthlikur ata kəra duniya akwa jirkur, ka hara kuthlikur akwa laku na kalkal.

⁹MTHLAKU an vəi ɗuwardzər mji natə mda akwa hara ala ɗa bwani, vəi ɗuwardzi na ka duna akwa sakar bwani.

¹⁰Mji na ku səndə ngə MTHLAKU, ana mbərsa ka ga, kamnyar ga aɗi ana fwari mji na ana bara ngə wa.

¹¹Hara gir har huwa aka MTHLAKU na ka kuthlikur akwa Sihiyona! Pəla giri aka duniya suayeri tə tsa hara!

¹²Hyel aɗi ana fwari ata kəra mji na akwa ɗar bwani wa, tsa ana nggatə tuwar ɗa ka ɗi mji na akwa hara ala ɗa bwani.

¹³Kətadzə ra bu, MTHLAKU! Wul jili bwani tə I akwa ɗarari akəla dawayeri arna, ka gə mbuli ra akwa mnya mta,

¹⁴kamnyar kəi mzhi jaktə mwari adzə mjir nga akwa Sihiyona, kəi ngkərɓəla ala ɗa su na hara tə I akwa fwal ngə ni. I ata kucali kamnyar ga ku mbantə ra.

¹⁵Durayeri na gapani ku lamta kur ɗimikur ka jaktə ndla akwa, Dərku tə da ngga ku jaktə ngkəi səla ɗa sur ɗa.

¹⁶MTHLAKU ku ncaɓəla kərni atar shariya na kalkal tə tsa ana hara, antə ɗimikur tə kəmanggarayeri ɗəmha ana jaktə ngka ata kəra ɗa sur ɗa.

¹⁷Mji na kəmanggar ata ləghəi akwa kula ka shanga mji na ku fwari ata kəra Hyel.

¹⁸Kamnyar aɗi parang antə mda ata fwari ata kəra mji turtura wa, tsuwa mji na mjir bwani aɗi ata ndzi kula vuwur su akwa ɗəffu ba saka madi wa.

¹⁹Mwa kara hara su MTHLAKU! Ga aɗiya zhar ka mdə ndzang rutə ngə wa! Vu ka mji gapani si akəma ga, ka gə hara ala ɗa shariya!

²⁰Thlivərantə ɗa, MTHLAKU! Vu ka da sənda abbər da mji ndzang.