Read bura-pabir Zabura 90 Bible Online

Zabura 90 - bura-pabir bible

Zabura 90

¹Adduwar Musa na mdər Hyel Mthlaku, akwa shanga ndzəndziyir mpika yeru, ga an vəi ɗuwardzər yeru.

²Təng akəmata ga ahənta garayeri, akəmata ga həntə duniya ka shanga suayeri na akwa, ga an Hyel na ba saka madi, na kula baɗitari kula tsikərari.

³Ga ana ngka ka mdə ka tsa jaktə ndzi bərbər, ga ana pəla, “Ngka gir bərbər mjir duniya.”

⁴Kamnyar ala gə məva dəpu ndzi apa naha na kurtə ka təramta, apa saka laga raka aviri.

⁵Ga ana kurəmta mji ka mdə fwari ata kəra ɗa apatə mda ana fwari suni, yeru ku ndzi apa kusar na haɗa səɓəla bilən ɗəɗəpa.

⁶Ɗəɗəpa tsa ana pukdla ka ndzi ka duna, amma tahaku tsa ana tətəɓwa ka ula.

⁷Sha ku wutə yeru kamnyar ɗəffa gə na ɓzə ni, yeru ku yakata kamnyar ɗəffə bwarbwarkurər nga.

⁸Ga ana pwi bikər yeru ata bəbal akəma ga, wala bikər yeru na ɗuwarɗuwarari ga ana wutə ɗa akəma ga.

⁹Yeru ku kuri shanga ndzəndziyir yeru akwa ɗəffə bwarbwarkurər nga, far yeru ku kuri apa mpikəmta mpikə daci.

¹⁰Saɓəlkur far yeru ata kəra duniya an məva murfəkumari wala nciskumari, ma yeru tsu ka duna. Amma wala apani saɓəlkur far yeru ana ndzi ncir bwani ka ɗəffə ɓzəɓza, aɗi ata fəi wa təng yeru ku təra.

¹¹Wan asəndə olkur dunar ɗəffə bwarbwarkurər ngə ri? Olkur ɗəffə bwarbwarkurər nga an kalkal ka laku tə ka mdə thlivər nga akwa.

¹²Thlipa ala yeru ka yeru sənda abbər mpika yeru ni kwadang, kamnyar ka yeru ndzi ɗəɗu.

¹³Ngka adzə yeru apani MTHLAKU! Nənga tar saka madi antə ga ata sə ngka ri? Kətadzə buɗayeri ar nga!

¹⁴Nghyantə yeru ɗəɗəp ɗəɗəpa ka hirkurər nga na ana palidzi wa ni ni, ka yeru hara kucali ka nggatə msərakur har kurər mpika yeru.

¹⁵Hamta ala yeru hangkur vir tə yeru ata hara kucali ka tsa ndzi kalkal ka hangkur vir tə yeru ɗar bwani, kalkal ka hangkur məvayeri tə yeru ləkwa asar.

¹⁶Hara ka yeru na mjir nga jaktə wutə kəthlərər nga na ol'ola, ka maɗa' yeru wutə səliyir nga.

¹⁷MTHLAKU na Hyelər yeru, hara ala yeru ɓɗakkur, ka gə vədzə barka ka kəthlərər tsiya yeru, ka gə shishantə kəthlərər tsiya yeru.