Read bura-pabir Zabura 91 Bible Online

Zabura 91 - bura-pabir bible

Zabura 91

¹Kəlara mdə na ana ɗuwardzi adzə Hyel na ka Səli ta Shang, mdə na ana ɗuwardzi akwa shanggur ar Hyel na ka Duna ta Shang,

²tsa ata mzhi pəla aka MTHLAKU. “Ga an mdər mbuli ra ka vəi ɗuwardzərna, Ga an Hyelərna, antə I ana mbərsa ka ga.”

³Kamnyar tsa andər msərantə nga ta dərkur mdər bara kəl mpika ga, ka ngkamta ala gə shanga shilku na ɗimi.

⁴Tsa ata ɗuwar nga ka ɓəɓəkari, akira ɓəɓəkari antə ga ata wutə vəi ɗuwardzi, jirkurərni ana mbuli nga apa partau ka katangga.

⁵Ga aɗi ata thlivər sur thlivəra na aviri wa, wala asar na ana hara təpci wa,

⁶wala shilkayeri na ana mwa akwa kuthlu wa, wala sur asar na ana hara ata u'ur pci wa.

⁷Wala ma mji dəpu an ata ndla ka mta athlimbəla ga, ka mji dəpu kuma abwa mazəma ga, ar nga su aɗi na ata wutə ngə wa.

⁸Ar nga tar kara wul ka nca daci, ka gə wul laku tə mda ata ɗi kəmanggar akwa.

⁹Təng tə gə pəla MTHLAKU tsa an vəi ɗuwardzər nga, abbər mdə na ka Səli ta Shang an vəi ɗuwardzər nga.

¹⁰Su ɗimi aɗi na ata wutə ngə wa, tsuwa asar aɗi na ata si adzə ngə wa.

¹¹Hyel ata vu mjirthlentərni ka da wulwul kəra ga, ka da ɓəlatə nga akwa shanga vəi tə ga ata mwari akwa.

¹²Da ata kathli nga akwa tsiya ɗa ta ga asə tsadzə səla ga aka pela.

¹³Ga ata dlidlirəmta tsəngiyayeri ka pwapwayeri, tsəngiyayeri na mwavər ka pwapwayeri na ka gwar.

¹⁴Kamnyar Hyel pəla, “Təng tə tsa ku hir ra, I ata msərantə ni, Kəi ɓəlatə ni kamnyar tsa ku səndə thləmi.

¹⁵Kəlara sakatə tsa kəga ra, I ata amsa alari, I ata ndzi adzə ni sakatə tsa akwa bwani, kəi mbuli ni ka nar olkur.

¹⁶I ata hamta alari fa na saɓəl, kəi mbantə ni.”