Read bura-pabir Zabura 95 Bible Online

Zabura 95 - bura-pabir bible

Zabura 95

¹Asər giri, ka mburu hara ha aka MTHLAKU, ka mburu hara kuraku na msəra aka Hyel na ana mbantə mburu!

²Ka mburu si akəmari ka usar ni, ka mburu hara hayeri ar hu ni ka kuraku.

³Kamnyar MTHLAKU an Hyel na ola, kuthli na olta shanga haptayeri.

⁴Tsa an ka kuthlikur ata kəra kira duniya, ka jikwara garayeri na nal ta shang.

⁵Tsa an ka kuthlikur ata kəra manda, kamnyar tsa an namta, ka vəi na ul'ula tsuwa, natə tsa namtə ka tsiyari.

⁶Asər giri ka mburu nggyarghəidzi ka vəngkər səli alari, ka mburu zuzuri akəma MTHLAKU na həntə mburu!

⁷Kamnyar tsa an Hyelər mburu, antə mburu an mji tə tsa akwa ɓəlari, ka təma tə tsa ana wulwula. Aiyi, apa ka giri psi thləm alari ashina kwang!

⁸Giri aɗiya hara kər ɓəɓalkur apatə kəkayeri ar giri ku hara ahar Meriba ni wa, apatə da hara vir nda akwa mtakər Massa ni wa.

⁹Kəkayeri ar giri ku ngkərtə ra ka bara ka da nggaɓəla ra, wala tə da ku wutə su tə I hara ala ɗa.

¹⁰Məva nfwarkumari cur ɗəffi ɓzəɓzari ata kəra mji ndaga, antə I pəla, “Da mji natə hangkala ɗa ku təra ciju kazhar ra! Da aɗi ana nggaɓəla su tə I pəla ka da hara wa.”

¹¹Antə kamnyar ɗəffi na ɓza, I ku kətə alkawal, abbər da aɗi ata ləkwa vəi ghərəmtaghəra arna wa.