Read bura-pabir Zabura 96 Bible Online

Zabura 96 - bura-pabir bible

Zabura 96

¹Hara gir ha bilən aka MTHLAKU! Hara gir ha aka MTHLAKU, shanga duniya!

²Hara gir ha aka MTHLAKU, ka giri fwal thləmari, ngkər giri labar na msəra tədəku abbər tsa ana mbantə mda.

³Ngkər giri labar na ata haptə səliyirni aka mjir duniya. Pəla giri aka shanga mji surndatayeri tə tsa hara.

⁴Kamnyar MTHLAKU an ola, antə kalkal ka mdə hu ni ka duna, ka mdə thlivər ni təramta shanga haptayeri.

⁵Kamnyar durayeri damwa ana vəngkər səli aka haptayeri, amma MTHLAKU an namtə vəi na amtazi.

⁶Səli ka olkur an nghyantə vəi tə tsa ata, duna ka ɓɗakkur an nghyantə mbwar vəngkər səli alari.

⁷Hu gir MTHLAKU, shanga mjir duniya, fwal gir ni kamnyar səli ka duna tə tsa kəgari.

⁸Nar giri səli aka MTHLAKU, səli na ata mzhi ndzi kalkal ka thləmari, səntə giri saɗaka, ka giri səkwa kuta bəbalər mbwarni!

⁹Zuzuri giri akəma MTHLAKU kamnyar olkur səliyir ni, ka shanga giri na akwa duniya ni yakata akəmari.

¹⁰Pəla giri aka shanga tsəɗiyayeri abbər, “MTHLAKU an kuthli! Jiri, duniya ku ncidzi gyang, su aɗi na ata kənggərtə ni wa, tsa ata hara shariya na ka jirkur aka shanga mji.”

¹¹Hara gir kucali, duniya ka vəi na amtazi! Hara gir kuraku, manda, ka shanga su na akwa.

¹²Hara gir kucali, fakayeri ka shanga suayeri na akwa! Antə shanga nfwayeri na akwa kuɓər nfwa ata sə hara kucali

¹³akəma MTHLAKU. Kamnyar tsa akwa si ka tsa hara shariya aka duniya, tsa ata hara shariyar jirkur aka shanga mjir duniya.