Read bura-pabir Karapwayeri 1 Bible Online

Karapwayeri 1 - bura-pabir bible

Karapwayeri 1

¹Nggədza karapwayeri ar Solaman, na ɓzər Dauda, kuthlir Israila.

²Da an karapwayeri na ata thlipa ala gə ɗəɗukur, ka hangkalkur, ka hara ka gə nggaɓəla ndərayeri na ka karapur ɗa zurang.

³Da ata thlipa ala gə kara ndzi ka hal na ɓɗaku ka jirkur, ka hara su na kalkal ka na ɓɗaku.

⁴Da ata mzhi namtə caku ka tsa ndzi ɗəɗu, ka vu ka kusta səndə su ka nggaɓəla su.

⁵Ndzi ka mdə na ɗəɗu nggata, ka tsa jakəngkər thlipərni, ka mdə na ana nggaɓəla su tsuwa, wutə ɗəɗukur kamnyar hamta sauri,

⁶kamnyar ka tsa nggaɓəla karapu, ka ndərayeri na akwa kuta ndər.

⁷Thlivər ɗəffa MTHLAKU an tsuratər səndə su, amma mji na kəgaɓu ana rutə ɗəɗukur ka thlipə su.

⁸Ɓzərna, psi thləma ga aka su tə baba' nga akwa thlipa ala ga, tsuwa ga aɗiya nggəlar su tə mama' nga thlipa ala gə wa.

⁹Kamnyar suayeri tə da akwa thlipa ala gə ni ata namtə nga, ka dəɓatə nga apatə dzakwar kuthlikur ka gənar wulya ana dəɓatə mda.

¹⁰Ɓzərna, ma mjir biku akwa ngkərtə nga, ga aɗiya kələngkər wa.

¹¹Ma da pəla, “Sər ka mburu ra thla laku, ka pumta mamshir mji! Ndzi ka mburu ra ɗuwardzi apa dəkalayeri, ka mburu tsi mji kula da ɓzamtə su.

¹²Ndzi ka mburu ndasəmnya ɗa apatə kula ana ndasəmnya mshi. Wala tə da tsu ka mpika lapiya mburu ata ndasəmnya ɗa shang ata kəma duku.

¹³Mburu ata fatə shanga sur ɗa na ɓɗakɓɗaku, ka nghyantə mbwar mburu ka su tə mburu fata!

¹⁴Səkwa nca yeru, antə shanga mburu ata ndəkəi su tə mburu həlta ata kəma duku.”

¹⁵Ɓzərna, ga aɗiya nu ɗa wa, Psi lakur ɗa.

¹⁶Da kəkalu akwa hara su na ɗimi, da tsətsaku akwa tsi mda.

¹⁷Ma ɗika ku wutə dərku ngganggari, tsa ana thləthlatə catu,

¹⁸amma ar mji ngəni da andər ngga dərku aka kəra ɗa, da ana thla kərɗa akwa laku ka da tsəgəidzi.

¹⁹An laku tə mpika mji na ana kura akwa, mji na ana hara gəna ka su tə da dlutsa akəla mji, thla laku andər kəl mpika dəkalayeri ka kərɗa.

²⁰Psi thləm! Ɗəɗukur akwa kəga ka kuraku akwa matəngndlayeri, ka haptə kurakari akwa vəi kasukayeri.

²¹Tsa akwa kəga ka kuraku akwa nyarfayeri ar bərni ka akwa shanga vəi tə mji ana tsaptədzi, abbər,

²²“Cakwayeri, nawa antə kəra giri ata sə zhar cakukur nə ri? Nawa antə mjir kyartəkur ata sə zhar kyartəkur ri? Nawa antə cakwayeri ata sə zhar nggəlar thlipə su ri?

²³Ma giri an psi thləma aka mpa tə I hara ala giri, sakani I ku na giri mambələr ɗəɗukurərna, sakani giri ku nggaɓəla ndərərna.

²⁴I ku kəɗar kəga giri abbər ka giri si, amma giri psəngkər thləm, giri aɗi damitədzi wa.

²⁵Giri ku psəmta sauriyirna, ka nggəlar mnya tə I hara ala giri.

²⁶Antə ma sakatə giri ku ləkwa asar I ata kumshi giri, kəi hara kyartəkur ala giri sakatə thlivər ku ngkəi giri,

²⁷sakatə thlivər ku tsa giri apa shambar yimi, sakatə asar ku si apa kəwal sakatə ɗəffə ɓzəɓza ka bwani ku si ata kəra giri.

²⁸Antə giri ata kəga ra, amma I aɗi ata ndər wa. Giri ata ghəra akwa pakə ra, amma giri aɗi ata wutə ra wa.

²⁹Kamnyar giri ku nggəlar thlipə su, ka zhar ta thlivər ɗəffa MTHLAKU.

³⁰Giri ku nggəlar dlu sauriyirna, ka rutə mnya tə I hara ala giri.

³¹Kulini giri ku wutə su tə giri akwa pakari, antə ɗimikur giri ni ata mzhi giri apa ɗəvər tsər.

³²Kamnyar mji na nggəlar ɗəɗukur andər mta kamnyar kəgaɓkurər ɗa, antə butukurər ɗa ata sə kurəmta ɗa.

³³Amma mji na ana psi thləm ali ata ndzi kula sur damita. Da ata ndzi ka hangkala ɗa pwipwiyari, kula thlivər asar.”