Read bura-pabir Karapwayeri 11 Bible Online

Karapwayeri 11 - bura-pabir bible

Karapwayeri 11

¹MTHLAKU aɗi ana hir mdər kəthlər ka sur ngkər kəgəɓkur zumzum kamnyar fəi mdə wa, tsa ana nggatə msərakur mjir ngkər su ka səkel na kalkalari.

²Mdə na ka kər olkur ana ləkwa səli taktar, kuji ka mdə ndzi ɗəɗu ka tsa tərghəi kərari.

³Mji na ka jirkur, jirkurər ɗa andər ɓəlatə ɗa. Mji na kula jiri, kula jirkurər ɗa andər shamta ɗa.

⁴Gəna amzhi dlar nga akwa vir shariya wa, amma jirkur ata mzhi msərantə mpika ga.

⁵Jirkur ana vu ka mji na ɓɗaku wutə su tə da akwa barari kasəla, amma kəmanggarkurər mji na ɗimi ana ngka ata kəra ɗa sur ɗa.

⁶Jirkur ana msərantə mji na ka jiri, amma mwaɓər mji na kula jiri ana psu ɗa akwa sha.

⁷Mtər kəmanggar ana hilantə shanga mwaɓərni, apa jili vəkər tə tsa kəgari akwa gənarni.

⁸Hyel ana ngkamta mdə na ka jiri ta tsa ləkwa bwani, amma tsa ana zhar ka kəmanggar tərkwa.

⁹Gariyir mdə na asəndə Hyel wa ana hilantə mda, amma ɗəɗukur ana msərantə mdər jirkur.

¹⁰Ma sakatə mdə na ka jiri akwa ləkəma, shanga mjir di ana hara kucali. Amma ma sakatə kəmanggar ku mti mji ana yarali.

¹¹Kəlara sakatə Hyel ku vədzə barka aka mdər jirkur diyirni ana ləkəma. Amma kəmanggar ana pwaktə mji ka ɓzamtə di.

¹²Cakukur andər vu ka mdə rutə ntəwulərni, amma mdə na ɗəɗu ana mbwi ɗəffari ka dləɓ səri.

¹³Mdər ngkər mda ana dlarhə mji akwa ngkər ala ɗa ashira mda, amma mji natə mda ana mbərsa ka da ana kəsi ashir.

¹⁴Tsəɗi na kula mdər pwar na ɗəɗu ana ləkwa bwani, amma tsəɗi na ka mjir sauri hang ana ndzəndzi lapiya.

¹⁵Mdə na ata ndzi mdər mbwa kir aka mətəpi abbər ka tsa dlu təmbəl, tsa akwa vu kərni akwa su na mwavər. Antə kuji kara nggəlar mbwa alari kir kara ndzi lapiya.

¹⁶Mda ana fwal mwala na ana hara ɓɗakkur aka mda, amma mji shili na kula kətadza, tar gəna daci antə da ana wuta.

¹⁷Ma gə ndzi ka hangkal ga akwa hara ɓɗakkur aka kəra ga, ma gə ndzi kəmanggar ga akwa dəkəi kər nga.

¹⁸Gənar kəmanggar aɗi ana fəi wa, amma ma gə hara su kalkal ga ata wutə watsəɓə na jirari.

¹⁹Mji na ana hara su kalkal tədəku ana səm fa, amma mji na ɗimi ana mtə ɗəm.

²⁰MTHLAKU ku nggəlar mji na ka ɗəffər ɗimikur, amma tsa hir mji na ana hara su kalkal.

²¹Jirjiri, mda ata ɗi mji na ɗimi, amma mda aɗi ata tsəkwar mji na ana hara su kalkal wa.

²²Dakwikur ar ɓzərngkwa na kula nggaɓəlar su an ndzi apa lenduwar dinar akwa kucira gadu.

²³Mwaɓər mji na pwa ana kura akwa ɓɗakkur, amma mwaɓər mji na ɗimi ana kura akwa ɗəffə ɓzəɓza.

²⁴Mji laga ana hamta su kula huni, amma wala apani sur ɗa ana ləkəma ka shisha. Mji laga tsuwa ana fərdla, amma wala apani ngguɗikurər ɗa ana vərvəra.

²⁵Mji na ka tsiya ɗa bwang ana ləkəma ka wutə gəna. Dlar mji antə mji ata dlar nga.

²⁶Mji ana shuwumta mdə na ana nggal ka ɗuwamta mthli, kamnyar ka masari hara mwavər, amma mji ana hu mdə na ana haɓəla arni ka ɗələmta.

²⁷Mdə na ana bara su na ɓɗaku mji ana hir ni, amma mdə na ana ti bwari tsa ana kəɓa ka asar.

²⁸Mji na ana mbərsa ka gənar ɗa ana təri apatə thlali ana ɓumta, amma mji na pwa ana thlata apatə thlali ana ɗəɗa.

²⁹Caku na ana nar bwani aka mjir kutakəyirni ana ngkəi shambar. Parang caku ata ndzi mafar mdə na ɗəɗu.

³⁰Laku tə mji na pwa ana ndzi akwa ana hamta mpika aka mji, amma mpa ana kəl mpika mda.

³¹Ma mji na ɓɗaku ata səm riɓar ɗa akwa duniya, ai dwali ka mji na kəmanggar ka mjir biku wutə bwani.