Read bura-pabir Karapwayeri 12 Bible Online

Karapwayeri 12 - bura-pabir bible

Karapwayeri 12

¹Mdər thlipə su aɗi ana nggəlar ɗi wa, mdə na ana nggəlar nama an caku.

²MTHLAKU ana hir mji na pwa, amma tsa ana nggəlar mjir ɗəmhə ɗimikur.

³Kəmanggarkur aɗi ana səntə lapiyakur wa, amma mdə na pwa ana ndzi gyang apa nfwa tə nggilangari ku ləghəi zurang.

⁴Mwala na pwa an dzakwar kuthlikur ar salngkiɗa, amma mwala na ana səntə sur səli aka salngkiɗa ndzi apa mbəlkər viri akwa ɗethlərni.

⁵Mji na pwa ana dzamər ɓɗakkur ata kəra mda, ar kəmanggar tar dzamər zambatə mda.

⁶Sauriyir mji na ɗimi ndzi apa dərku, amma sauriyir mji na pwa ana mbantə mda.

⁷Mda ana mula aka mji na ɗimi har ka da mta ka sha karkar, amma kutakəyir mji na ɓɗaku ana ləkəma ba saka madi.

⁸Ma gə ɗəɗu, mji ata hu nga. Amma ma gə kəgaɓu, mji ata rutə nga.

⁹Kuji mdə na ata tərghəi kərari ka hara kəthlər, ta mdə na ata haptə kərari apa mdə ola ka pi ka mi.

¹⁰Mdə na pwa ana wulwul mwaɓiyirni, amma kəmanggar, an kəthlər kətadza ar mdə na ɗimi.

¹¹Mdər kəthlər ka duna ana wutə susəma hang, amma caku ana gyalntə sakarni akwa su na kula ampani.

¹²Mji na ɗimi ana səlka sur nvwa ɗa, amma mji na pwa ana pakə sur kəra ɗa.

¹³Mdər mnya ɗimi ana ngga dərku aka kərni, amma mdə na pwa ana msərəmta jili bwani ngəni ni.

¹⁴Mda ana wutə huwa wala dəka ata hila su tə tsa pəla wala hara. Kəthlər tə tsa hara ka tsiyari andər jaktə ngka alari.

¹⁵Caku ana tamata abbər dzamərni an kalkal, amma mdə na ɗəɗu ana dlu sauri.

¹⁶Ɗəffa caku ana səkwi ɓzə wa, amma mdə na ɗəɗu ana psəngkər thləm aka nggəla.

¹⁷Seɗa na jirari ana pəla jirkur, amma seɗa na shimnya ana thlandər.

¹⁸Mnya na kərukəruwa ana dəkəi mdə ka duna apa katsakar, amma ndərər ɗəɗukur ana mbantə mda.

¹⁹Jirkur ana mtə wa, amma mda ana səkwi nggaɓəla thlandər wa.

²⁰Mji na ana ɗəmhə ɗimikur ana sə kəɓa ka asar, amma mji na ana hara ɓɗakkur ana wutə msərakur.

²¹Su na ɗimi aɗi na wutə mji na ɓɗaku wa, amma asar ana ləkwa dza mji na ɗimi.

²²MTHLAKU ku nggəlar mjir thlandəra, amma tsa ana nggatə msərakur mji tə mda ana mbərsa ka da.

²³Mdə na ɗəɗu aɗi ana gaya ata kəra səndərni wa, amma caku ana ncantə kəgaɓkurərni ata bəbal.

²⁴Kəthlər ka duna ata mzhi namtə nga kara ndzi ola akwa vəi kəthlər, harwakur ata vu nga kara ndzi mafa.

²⁵Damitədzi ana tsi duna mda, amma ndər na msəra ana namtə ɗəffa mda.

²⁶Mdə na pwa ana vu pazhirni akwa laku, amma kəmanggar ana shamta ni.

²⁷Ma gə harwa ga aɗi ata wutə su tə ga akwa barari wa, amma ma gə kəthlər ka duna ga ata wutə riɓari.

²⁸Ɓɗakkur an lakur mpika, amma ɗimikur ana mwantə mda akwa mta.