Read bura-pabir Karapwayeri 13 Bible Online

Karapwayeri 13 - bura-pabir bible

Karapwayeri 13

¹Ɓzər na ɗəɗu ana nggatə ndərər baba'ni, amma mdər kyar su aɗi ana hir ka mdə nam ni wa.

²Mdə na ɓɗaku ana səm riɓar ndərərni, amma mdər pwaktə mda parang akwa bara ka tsa dəkəi mda.

³Mdə na ana ngkahə mnyari aɗi ana ləkwa bwani wa. Mdə na kəkalu ana dəkəi kərni.

⁴Harwa ana mwaɓtə su hang, amma tsa aɗi ana wutə suma wa. Mdər kəthlər ka duna ana wutə shanga su tə tsa akwa turari.

⁵Mdə na pwa aɗi ana hir thlandər wa, amma kəmanggar ana ndzi sur səli ka sur kətadza.

⁶Hara su na kalkal ana ngkamta bwani aka mdər jirkur, amma kəmanggarkur ana ngka ata kəra mthlakari surni.

⁷Mji laga ana ncanta apa da ka gəna, amma da aɗi ka suma wa. Mji laga tsuwa ana ncanta apa da ngguɗi, amma da ka su hang ka duna.

⁸Mdər gəna antə mda ana bara ka tsa ntə su ka mdə msərantə ni, amma mda aɗi ana damitə ngguɗi ka tsa ntə su wa.

⁹Pitəlar mdə na pwa ana hamta parakəu ka duna, amma pitəlar kəmanggar ana səkwi mtə wa.

¹⁰Su aɗi tə kər olkur ana səntə wa, tar beɗi. Mdə na ɗəɗu ana bara sauri.

¹¹Gəna natə mda wutə ka huva akwa laku na ɗimi ana sha taktar. Gəna mtirmtira natə mda wutə ka dunari ana ləkəma ka kəla.

¹²Ma mda aɗi wutə su tə tsa mwaɓtə wa dzari ata mta, amma ma tsa ku wuta, ɗəffari ata nghyi ka kucali.

¹³Mdə na ana nggəlar sauri andər bara bwani aka kərari, mdə na ana dlu sauri ana wutə watsəɓari.

¹⁴Su tə mdə na ɗəɗu thlipa ala ga ana ndzi apa jiɓər yimi na ndəlang mtathlaku, tsa ata dlara akwa msərantə nga sakatə ga akwa bwani.

¹⁵Mda ana hu mdə na ka dzama na kalkal, amma mdə na shimnya ana mwa akwa lakur asar.

¹⁶Akwa shanga su mdə na ɗəɗu ana dzama kambəla tsa hara su, amma caku ana hara su caku caku.

¹⁷Mdərthlentə na ɗimi ana vu mda akwa bwani, amma mdərthlentə na pwa ana səntə lapiyakur.

¹⁸Mdə na ana nggəlar nama ana ndzi ngguɗi ka ləkwa sur səli. Mda ana hu mdə na ana dlu nama.

¹⁹Mda ana nggatə msəra ma tsa ku wutə su tə tsa mwaɓta, amma mji na ɗimi aɗi ana zhar hara ɗimikur wa.

²⁰Mdə na ana mwa kəga mji na ɗəɗu ana ndzi ɗəɗu, amma mdə na ana nu caku ana ɗar bwani.

²¹Asar ana nu mjir biku kəlara vəi madi, amma cautə na ɓɗaku an watsəɓər mdə na pwa.

²²Mdə na ɓɗaku ana zhar kifa aka kəkayeri arni, amma shanga gəna tə mdər biku tsapta ana sə ndzi nəɓwar mdə na pwa.

²³Fakər mdər bwani ana ya su hang, amma mjir səm zaləmkur ana famnya ɗa.

²⁴Mdə na ana hir ɗi ɓzərni wa, tsa aɗi hir ɓzərni wa. Mdə na hir ɓzərni ana di ni akwa sakari.

²⁵Mdə na pwa ana səm susəma ka ndla, amma mji na ɗimi ana ndzi ka mi.