Read bura-pabir Karapwayeri 14 Bible Online

Karapwayeri 14 - bura-pabir bible

Karapwayeri 14

¹Mwala na ɗəɗu ana ɗəmhə kutakəyirni, amma mwala na caku ana ɓzamtə kəyirni surni.

²Mdə na ana hara su kalkal ana thlivər ɗəffa MTHLAKU, amma mdə na hir su thlurthlura aɗi ka thlivər Hyel akwa ɗəffari wa.

³Gariyir caku ana pwasta alari zwal, amma mdə na ɗəɗu ana ngkahə mnyari ka msərantə kərni ta bwani.

⁴Mdə na kula thlar kukula, biyirni ana ndzi kula mthli, amma ma tsa an ka thlar kukula na ka duna, tsa ata ndzi ka mthli hang.

⁵Mdər seɗa na ka jiri aɗi ana thlandər wa, amma mdə na kula jiri andər pu thlandərayeri.

⁶Mdər kyar su aɗi ana ndzi ɗəɗu wa, amma mdə na ɗəɗu ana səkwi thliptə su wa.

⁷Psi lakur mdə na caku, kamnyar ga aɗi ata wutə sur dlar nga akəlari wa.

⁸Mdə na ɗəɗu ana nggaɓəla laku tə tsa ata nu su akwa. Caku ana kəta abbər tsa asəndə su tə tsa akwa harari, ka pwaktəmta kərni.

⁹Caku ana namtə ɗimikur ka sur kumshi, amma mdə na pwa ana nggaɓəla vəi sharni ka namtə daɓwa ɗa ka Hyel.

¹⁰Mda ana sənda aka kərari surni laku tə ɗəffari ɓzəɓzari akwa, wala laku tə tsa ka kucali akwa, aɗi mdə damwa wa.

¹¹Mbwar kəmanggar ata ndlamtadzi, amma tentər mdə na pwa ata ndzi tsu athləthlatə gyang ka fəi.

¹²Laku laga tə ga ata tamata abbər tsa an kalkalari ni ata mzhi mwantə nga akwa mta.

¹³Kumshi ana mzhi ɗuwar ɗəffə ɓzəɓza. Ma sakatə kumshi ku kuri, ɗəffə ɓzəɓza ata səɓəla ata bəbal.

¹⁴Mdə na ɗimi ana dlu watsəɓər ɗimikurərni, mdə na pwa ana səm riɓar ɓɗakkurərni.

¹⁵Tar caku andər kələngkər aka kəlara su, kamnyar ɗəɗu ana nu su ka hangkal.

¹⁶Ɗəɗu ana nu su ka hangkal ka hwiyimta asar, amma caku aɗi ana vədzə hangkal aka su wa, tsa ana ndzi kəkalu.

¹⁷Mdə natə ɗəffari ana səkwi ɓzə wa ana hara su caku caku, tsuwa mda ana nggəlar mdə na ana thlur su.

¹⁸Mdə na butu ana ndzi caku, amma mdə na ɗəɗu ana thliptə su.

¹⁹Mji na ɗimi ana zuzuri akəma mji na ɓɗaku, mji na kəmanggar ana kiɗə su akəla mji na pwa.

²⁰Mda aɗi ana hir mdər bwani wa, wala ntəwulərni ana nggəlar ni, amma mdər gəna ana ndzi ka pazhayeri hang.

²¹Mdə na ana rutə mda tsa an mdər biku, amma Hyel ana vədzə barka aka mdə na ana dlar mjir tura.

²²Shashakur andər vu ka mdə ɗəmhə ɗimikur aka nvwani. Mdə na ana hara su na kalkal ana ndzi ka pazhayeri na ka jirkur.

²³Shanga kəthlər na mwavər ana ndzi ka riɓa, jikamnyar ana kura akwa tura.

²⁴Ɗəɗukur ana namtə mdə ka tsa ndzi ka gəna, amma cakukur ana vu ka mdə ndzi caku.

²⁵Seɗa na ana pəla jirkur ana mbantə mda, mdər thlandər andər ɓəli mda.

²⁶Thlivər ɗəffa MTHLAKU ana namtə ka mdə ka kutakəyirni ndzi lapiya kula thlivər su.

²⁷Thlivər ɗəffa MTHLAKU ana tər fa. Tsa ana vu ka mdə msərəmta mta.

²⁸Jakər hangkur mji an jakər səli ka duna aka kuthli, kuthli na aɗi ka mji wa tsa aɗi suma wa.

²⁹Mdə na ana mzhi ntsari ɗəffari, tsa an mdə na ɗəɗu. Mdə natə ɗəffari ana səkwi ɓzə wa, tsa ana ncaɓəla cakukurərni ata bəbal.

³⁰Ɗəffu pəpəipəpəi ana hamta lapiyakur aka dza, səlka ana vu ka ɗethlər mdə hiɗa.

³¹Ma ga akwa hara bwani aka mjir tursu ga akwa nggəl Hyel na namtə ɗa. Amma ma ga akwa dlar mjir bwani ga akwa nar səli aka Hyel.

³²Kəmanggar ana mta akwa ɗimikur tə tsa hərtə ka kərari surni, amma mdə na pwa wala akwa mta, tsa aɗi ana thlivər wa.

³³Ɗəɗukur ana həntə kəyirni akwa ɗəffa mji na ana dzamtə su na kalkalari, amma tsa aɗi ana ndzi akwa ɗəffa mji na caku caku wa.

³⁴Jirkur ana kəlantə tsəɗi, amma biku ana vu tsəɗi akwa sur səli.

³⁵Kuthli ana hir buɗayeri na ana hara su ka ɗəɗukur, amma ɗəffari ana ɓza ata kəra mji na ana kuri wujir wa.