Read bura-pabir Karapwayeri 15 Bible Online

Karapwayeri 15 - bura-pabir bible

Karapwayeri 15

¹Amsa tə mdə hamta ka hangkal ata mzhi peri ɗəffa mda, amma ndər na ka mpa ana mbwantə ɗəffa mda.

²Ndər na ɓɗaku ana səɓəla akwa mnya mji na ɗəɗu, amma akwa mnya cakwayeri tar cakukur.

³MTHLAKU ana wutə shanga su akwa kəlara vəi madi, tsa akwa wul su tə mji na ɓɗaku ka mji na ɗimi akwa harari.

⁴Kyanggyar na msəra ana səntə lapiyakur, amma ndər na mbalmbalari ana fəi shaha mda.

⁵Caku andər hir ka baba'ni mpa alari wa, amma mdə na ɗəɗu ana thliptə su akwa mpa tə mdə hara alari.

⁶Mji na pwa ana ndzi ka gəna akwa kəyir ɗa, amma asar ana famnya gənar mji na kəmanggar.

⁷Mda ana thliptə su akəla mji na ɗəɗu, aɗi akəla cakwayeri wa.

⁸MTHLAKU ana nggatə msərakur adduwar mji na ka ɗəffa ɗa mwapu, amma tsa ana cikə saɗakar mji na ɗimi.

⁹MTHLAKU ku nggəlar surharar mji na ɗimi, amma tsa ana hir mji na ana hara su na kalkal.

¹⁰Ma ga ku hara su na aɗi kalkal wa, mda ata ɗi nga ka duna. Ga ata mtə taktar ma ga aɗi ata hir ka mdə nam ngə wa.

¹¹MTHLAKU asəndə shanga su na akwa duniyar mji mtəmta, zhar ka su na akwa ɗəffa mdə ya!

¹²Mdər kyar su aɗi ana hir ka mdə nam ni wa. Tsa aɗi ata yu sauri akəla mdə na ɗəɗu wa.

¹³Ma ɗəffa mji msəra ala ɗa da ata kumshi, ma su ku ɓzamtə ɗəffa ɗa, kəma ɗa ata ndzi hərhərari.

¹⁴Mdə na pwa ana bara ka tsa thliptə su bilən kəlara saka, amma caku ana bara sur cakukur.

¹⁵Aka mdər bwani kəlara viri ana si ka bwaniyirni, amma mdə na ana gwaɗita ata kəra shanga su, tsa ana ndzi ka kucali tədəku akwa ndzəndziyir mpikari.

¹⁶Kuji ka mdə ndzi akwa bwani ka thlivər ɗəffa MTHLAKU, ta mda andzi ka gəna ka ɗəffə ɓzəɓza.

¹⁷Kuji ka ra səm susəma ka səkwar thliva ata kəma duku ka mdə na hir nga, ta ga aɓɗə kum na msəra ta shang ata kəma duku ka mdə na nggəlar nga.

¹⁸Mdə na ka ɗəffə bwarbwarkur ana thlentə mpa, amma mdə na ana mbwi ɗəffari ana tsi beɗi.

¹⁹Mdə na harwa ata ndzi ka bwani akwa shanga vəi tə tsa ata mwari akwa, amma shanga sur mdə na ka jirkur ana ndzi kasəla.

²⁰Ɓzər na ɗəɗu ana namtə ɗəffa baba'ni, amma caku ana rutə mama'ni.

²¹Cakukur ana səntə kucali aka mji na kula kər, amma mdə na ɗəɗu ana ləkəma ka su na kalkal apa na hwatu.

²²Su ana hila kamnyar tur mdər hamta sauri na kalkalari. Su ana mwa apatə mda akwa barari ma mjir sauri aɗi hang.

²³Su aɗi na msəra apa ma mda ata mzhi hamta amsa na kalkal akwa saka na kalkalari wa.

²⁴Mji na ɗəɗu ana nu laku na ata mwantə ɗa amta akwa mpika, aɗi laku na ata ləghəi ka da akwa kula wa.

²⁵MTHLAKU ata huzamta kəyir mdər gaya, amma tsa ata ɓəlatə shanga sur mwala kughung.

²⁶MTHLAKU aɗi ana hir dzamər mji na ɗimi wa, amma tsa ana nggatə msərakur ndərər mji na kəcəkəcari.

²⁷Kwabar dlərpəkur ana səntə ɗəffə ɓzəɓza aka shanga mjir kutakəi, amma mdə na ku nggəlar sur dzəɓə mnya ana fəi ka mpika.

²⁸Mdə na pwa ana dzama kambəla tsa hamta amsar su, amma mdə na ɗimi ana huvə hamta amsa na ɗimi ka pwasta alari sha.

²⁹MTHLAKU ana psəngkər thləm aka tuwar mji na ɗimi, amma tsa ana nggatə adduwar mji na pwa.

³⁰Kəma mdə na pwipwiyari ka kumshi ana namtə ɗəffa mda, labar na msəra ana jakə lapiyakur aka mda.

³¹Mdə na ana dlu sauri ana nggatə msərakur ka ndzi ɗəɗu.

³²Mdə na akwa nggəlar thlipə su akwa nggəlar kərni, amma mdə na ana dlu sauri ana ndzi ɗəɗu.

³³Thlivər ɗəffa MTHLAKU ana thlipa aka mdə ka tsa ndzi ɗəɗu. Tar ka mdə tərghəi kərari kambəla tsa wutə səli.