Read bura-pabir Karapwayeri 16 Bible Online

Karapwayeri 16 - bura-pabir bible

Karapwayeri 16

¹Mburu ana ɗəmhə suayeri tə mburu ata bara ka mburu hara, amma MTHLAKU an ka dunar pəla su na kalkalari ata kər.

²Ga ata mzhi dzama abbər su tə ga akwa harari ni kalkal, amma MTHLAKU ana wul su na akwa ɗəffa ga.

³Vu kəlara su tə ga ata bara harari akwa tsiya MTHLAKU, antə ga ata kuriyari lapiya.

⁴MTHLAKU ku ɗəmhə shanga su ka sur kəthlərər ɗa, wala mji na ɗimi kamnyar ka da sə ɗar bwani.

⁵MTHLAKU ana cikə kəlara mdə na ka hir kər, kula nuhum mda ata ɗi ni.

⁶Ka gə hir Hyel ka jirkur, antə tsa ata tifəmta ala gə bikər nga. Kələngkər aka MTHLAKU, antə su ɗimi aɗi na ata wutə ngə wa.

⁷Ma sakatə MTHLAKU ku nggatə msərakur surharar mda, tsa ana namtə wala dawayeri arni ka da ndzi msəra kəga tsa.

⁸Kuji ka mdə ndzi ngguɗi ata kəra jirkurərni, ta mda andzi ka gənar dlərpəkur.

⁹Ga ata mzhi ɗəmhə suayeri tə ga ata bara hara ɗa, amma MTHLAKU an ka dunar pwar nga.

¹⁰Kuthli ana gari ka ɗəɗukur tə Hyel hamta alari, tsa ana pəla su na kalkal tədəku.

¹¹MTHLAKU ana bara ka mdə kəthlər ka aunayeri na kalkalari, ka ndzi ka jirkur akwa shanga su na ku tsəkwar fəli.

¹²Ɗimikur an sur cika tə ka kuthli hara, kamnyar mdə ku nci dəkəl kuthlikur ni ata kəra jirkur.

¹³Kuthli ana bara ka tsa nggatə jirkur, antə tsa hir mji na ana pəla jirkur.

¹⁴Ma ga ku ɓzamtə ɗəffa kuthli, tsa ata mzhi vu ka mdə tsi nga, mdə na ɗəɗu ana bara ka tsa namtə ɗəffari tədəku.

¹⁵Kəlara sakatə kuthli akwa kumshi lapiyakur aɗi, mdəkurərni ana ndzi msəra apa yimər kwandza.

¹⁶Ɗəɗukur ku təramta dinar ciju, tsuwa səndə ku təramta adzərfa.

¹⁷Lakur mji na ɓɗaku ana hara ka da hwiyimta ɗimikur, antə ma ga ku nu laku na kalkal ga ata ndzi lapiya.

¹⁸Hirkər ana ɓzamtə mda, tsuwa mda ana kəli səliyir mdə na ka kər olkur.

¹⁹Kuji ka mdə ndzi akwa bwani ka kanaɗikur, ta ka mdə ndzi ka gəna atar su tə mdə dlutsa akəla mji.

²⁰Mdə na ku vədzə hangkal aka su tə mdə thlipa alari, ata wutə ləkəma. Mdə na ku mbərsa ka MTHLAKU ata nggatə msəra.

²¹Mda ana səndə mdə na ɗəɗu atar dzamərni, hangkur msərakur ndərərni an hangkur mji tə tsa ata mzhi ndəkərtə hangkala ɗa.

²²Ɗəɗukur ana ndzi aka mdə na kəgari apa yimər kucirkila na ana hamta mpika mda, amma shamta saka akwa ɗi mji na caku an cakukur.

²³Mdə na ɗəɗu ana dzam ɓɗaku kwabə tsa gari, antə kəlara su tə tsa pəla ana kəskəra mda.

²⁴Ndər na ka hangkal ana ndzi apa cirməma, msəra aka ɗəffu, lapiya aka kumər dza.

²⁵Saka laga su tə mda akwa wulari apa kalkal, andər mwantə mda akwa mta.

²⁶Su tə mdə mwaɓta andər vu ni akwa hara kəthlər ka duna, kamnyar tsa akwa bara ka tsa wutə su tə tsa vu akwa ɗəffari ni.

²⁷Mdə na kula ampani ana ɗəmhə ɗimikur aka mji, ndərərni ana ɓzamtə su apa u'ur bara.

²⁸Kəmanggar ana mnya ɗimi ata kəra mda, mnya ɗimi ana paktə mpa ka ndəkə pazhikur.

²⁹Mji na hir mpa ana pwaktə pazhayeri arɗa, ka ndəkərwa ɗa akwa asar.

³⁰Mji na ana kumshi ka ɓəl nca abwahila mda ana ɗəmhə ɗimikur ata kəra mda, da ana hartə mnya ɗa sakatə da akwa ɗəmhə ɗimikur.

³¹Saɓəlkur fa an watsəɓər mdə na pwa, shishi mwapu an dzakwar daraja na ka səli.

³²Kuji ka mdə ndzi ka mbwiɗəffu ta duna. Ndzi ka kəmar ku təramta ndzi ka dunar səm bərni.

³³Mda ata mzhi carɓəla su tə tsa ata bara harari, amma MTHLAKU shini an ka dunar carɓəla su na ata hara.