Read bura-pabir Karapwayeri 17 Bible Online

Karapwayeri 17 - bura-pabir bible

Karapwayeri 17

¹Buradi ul'ula ka ɗəffu pəpəipəpəi ku təramta susəmər kucali akwa kəi na ka mpa.

²Buɗa na ɗəɗu ana mzhi ndzi ola ata kəra ɓzər kuthli na hilhilari, ka ndzi pal akwa nca mjir fa kifər baba'ni.

³Ka u'u antə mda ana ngkərtə ɓɗakkur adzərfa ka dinar, apani tsuwa antə MTHLAKU ana ngkərtə ɗəffa mda.

⁴Mji na ɗimi ana ngga ndər na ɗimi, mjir thlandər ana ngga thlandər.

⁵Mdə na ku kumshi mdər bwani ku nggəl Hyel na nam mdə ni. Mdə na ku kumshi asar mda ata ɗi ni.

⁶Kəkayeri an sur gaya ar mjir ya, tsu apatə maɗangkyar ana gayar mjir yar ɗa.

⁷Mda aɗi ana wutə gari na lapiya akəla caku wa, amma na ɗimiyari an ka mdə wutə mdə ola akwa thlandər.

⁸Mji laga kəta abbər dzəɓə mnya ana kəthlər apa pelar shatan aka mdə na hamta, tsa ana mbərsa abbər kəlara bwa tə tsa ləkwa tsa ata wutə ləkəma.

⁹Mdə na ana yafitə mdə na hara alari biku ana bara ndzəndzi lapiyakur. Jikamnya ata kəra mda ana ndəkə pazhikur.

¹⁰Mnya ka duku ku mzhi namtə mdə na ɗəɗu, amma ar caku wala dlaɓwa amzhi ɗiɓəla ni wa.

¹¹Mdə na ɗimi hir thlentə mpa, antə mda ana thlentə mdə na kula kətadza ata kəra ɗa.

¹²Kuji ka mdə kəɓa ka mwala tənvwa natə mdə fatə maɗa'ni, ta ka mdə pəlangkər aka caku ata kəra ɗimikur tə tsa akwa ɗəmhari.

¹³Mdə na ana ntə ɓɗakkur ka ɗimikur aɗi ata msər ta asar akwa kəyirni wa.

¹⁴Baɗitər beɗi ndzi apa kəlar vəi hwiyimta aka yimi, apani kuji ka mdə zhar baɗitari ta tsa aləkəma.

¹⁵MTHLAKU Ku nggəlar mdə na ana msərantə mji na ka biku ka mbwi mji na kula biku.

¹⁶Su aɗi na ata vu ka caku shamta gənarni ata kəra thlipə su wa, kamnyar tsa aɗi ka mwaɓər ndzi ɗəɗu wa.

¹⁷Pazhi ana hir pazhirni tədəku. Mdə vəi yangkurkur kamnyar paktə kər ka dlara akwa sakar bwani.

¹⁸Tar mdə na kula kər andər mbwa kir ka ndzi seɗa ar dlu təmbəl aka ntəwulərni.

¹⁹Kəlara mdə na hir beɗi tsa hir biku. Mdər gaya ana səva asar aka kərari.

²⁰Mdə na ana hara su mbalmbalari aɗi ana ləkəma wa, mdər thlandər ana vu kərni akwa asar.

²¹Ɓzər na caku an sur ɓzamtə ɗəffu ka asar aka mjir yarni. Da aɗi ka kucali wala raka wa tar kər pwadla.

²²Mdə na ka kucali ana ndzi lapiya, amma ɗəffə ɓzəɓza ana samnya duna mda.

²³Mjir kuma na dlərpu ana dlu sur dzəɓə mnya kamnyar ka da paltə jirkur ka ɗimikur.

²⁴Mdə na ka sənda ana bara ka tsa hara su ka ɗəɗukur, amma caku aɗi ana ngkahə hangkalari ata vəi duku wa.

²⁵Ɓzər na caku an sur ɓzamtə ɗəffu aka baba'ni, ka sur ɓzamtə kuta mama'ni.

²⁶Aɗi kalkal ka mdə vu mdə na kula biku akwa ntə su wa, wala ɓu mji na ol'ola ata kəra jirkurər ɗa wa.

²⁷Mdə na ɗəɗu aɗi ana mnya hang wa, mdə na ka nggaɓəlar su ana mbwi ɗəffari.

²⁸Wala mdə na caku, ma tsa ku hartə mnyari, tsa ana ndzi apa mdə na ɗəɗu ka mdə na səndə su.