Read bura-pabir Karapwayeri 18 Bible Online

Karapwayeri 18 - bura-pabir bible

Karapwayeri 18

¹Mdə na ana hir paktə kər kəga mji wa ana bara bwarni daci. Tsa ana beɗi ka nggəlar shanga su na kalkal tə mji pəla alari.

²Mdə na caku aɗi ana vu ɗəffari akwa thlipə su wa. Tsa ana bara ka tsa pəla su na akwa kutari.

³Kəmanggarkur andər vu ka mdə rutə mthlakari, antə mdə tə səliyirni ku təri, mda ana mnya ɗimi ata kərari.

⁴Mda ata mzhi thliptə ɗəɗukur akwa gariyir mda. Gari na ɓɗaku ana ndzi apa manda na zurang, apa zərkə na akwa hwi ka yimərni ndəlang mtathlaku.

⁵Aɗi kalkal ka mdər kuma ncantə hirkur aka mdər biku wa, wala zhar ta pəla jirkur ata kəra mdə na kula biku wa.

⁶Gariyir mdə na caku ana kur ka beɗi, antə mnyari ana səvata alari dlaɓwa.

⁷Mnya caku andər vu ni akwa sha, su tə mnyari pəla andər thlamta wulyari surni.

⁸Cingdləmnya an msəra apa kira kugwa, tsa ana ləghəi ba akwa mira mda.

⁹Mdə na lələɓu akwa hara kəthlər an kalkal ka mdə na ana ɓzamtə su.

¹⁰MTHLAKU an vəi ɗuwardzi na ka duna, mjirni ana hwi mwari adzə ni ka ndzi lapiya.

¹¹Mdə na ka su ana dzama abbər gənarni an katangga na ata tsəlpitə ni.

¹²Kər olkur ana vu mda akwa sha, amma kanaɗikur ana haptə səliyir mda.

¹³Huvə hamta amsa aka mdə kula nggaɓəla su tə tsa akwa pəlari an cakukur ka sur səli.

¹⁴Mda ana mzhi mbwi ɗəffari ka nggitə kəta akwa sakar nggawakur, amma ma ɗəffa mdə ku ɓzi mdər nggitari ka ləkəma aɗi wa.

¹⁵Mdə na ɗəɗu ana bara thlipə su tədəku, tsa ana pakə surthlipa. Tədəku thləmari kəlarkəlarari kamnyar thlipə su.

¹⁶Hamta cauta ana hara surndata, tsa ana vu ka mdə kəɓa kəga mji ol'ola.

¹⁷Mdə na hamta tuwarni akwa shariya ntangkəma ana ncanta apa tsa ka jiri, tar ma sakatə nvwani ku si ka arni.

¹⁸Ma beɗi ku thlata akwa daɓwa mji ol'ola akəma shariya, ndzəl su an ata thlamta gari ni ka shwalatə ɗa.

¹⁹Dlar maɗama' nga antə da ata sə mbuli nga apatə katangga na ka duna ana mbuli bərni. Amma ma ga ku beɗi ka da, da ata dzəkatə nyarfur ɗa ala ga.

²⁰Gari ana namtə ɗəffa mda apatə susəma ana ndlantə kuta. Ma gə gari na kalkal ɗəffa ga ata ndzi msəra laga.

²¹Kəlara su tə gə pəla ka watsəɓərni, tsa ata mzhi namtə nga wala shamta mpika ga. Antə mji na ana vədzə hangkal aka su tə da ata bara pəlari ana səm riɓari.

²²Ma ga ku wutə mwala na pwa ka kəta, ga ku wutə ndəmun! Ngəni ata ncanta ala ga abbər MTHLAKU hir nga.

²³Mjir bwani ana gari ka kiɗə kər, amma mjir gəna ana hamta amsa ka mpa.

²⁴Pazhayeri laga ana shamta nvwa ɗa, amma pazhi na jiri ana ndzi kudzəha ta ɓzərma.