Read bura-pabir Karapwayeri 19 Bible Online

Karapwayeri 19 - bura-pabir bible

Karapwayeri 19

¹Kuji ka mdə ndzi akwa bwani amma tsa ka jirkur, ta mda andzi caku ka mdər thlandəra.

²Ndzi ka ɗəffər hara su kula səndə su ata kər aɗi ɓɗaku wa. Huva ana shamta mda.

³Mji ana hilantə ndzəndziyir ɗa atar cakukurər ɗa ka pəla MTHLAKU an hara.

⁴Gəna ana yatə pazhayeri, amma ngguɗikur ana titiləmta ɗa.

⁵Mda ata ɗi mdər seɗa na kula jiri ka mdər thlandəra, mda aɗi ana zhar ni wa.

⁶Mji hang ana bara laku tə ka mji ol'ola hir ɗa akwa. Kəlara mda ana pəla tsa pazhir mji na ana hamta cauta.

⁷Mdə na ngguɗi, wala yangkurari ana hwi dzari, ma pazhayeri arni shang da ata hwi ni kamta. Wala tsa an nu ɗa akwa kiɗə kəra ɗa apa mə ri, da aɗi ata ngga ni wa.

⁸Mdə na hir kərari andər hara su ka ɗəɗukur, mdə na hir thlipə su andər ləkəma.

⁹Mda ata ɗi mdər seɗa na kula jiri ka mdər thlandəra, mda ata tsi ni.

¹⁰Aɗi kalkal ka caku ndzi akwa ngga msərakur wa, wala ka mafa hara kuthlikur ata kəra mji ol'ola wa.

¹¹Mdə na ɗəɗu ana mbwi ɗəffari. Mda ana kət səliyirni kamnyar tə tsa ana zhar ntə dawa tə mdə hara alari.

¹²Ɗəffə bwarbwarkur ar kuthli ndzi apa nggyinggyir tsəngi, amma mdəkurərni an apa kəlangkə ata kusar.

¹³Ɓzər na caku an sur ɓzamtə ɗəffu aka baba'ni, mwala na ana mtirmnya ndzi apa mbwa na ana njinjə yimi kula thləthlata.

¹⁴Kəi ka gəna mda ana fa kifari, amma mwala na ana nggaɓəla su, MTHLAKU andər hamtari.

¹⁵Harwakur ana vu mda akwa heni na zurang, ka məi kətə ni.

¹⁶Mdə na ana kələngkər aka tsawur, Hyel farni ata fəi. Mdə na ku gyali kəgari, tsa ata mta.

¹⁷Mdə na ana dlar mjir bwani, ndzi apa tsa akwa təpa aka MTHLAKU, antə MTHLAKU ata ntəmta alari.

¹⁸Ɗi ɓzər nga akəmata sakari atəramta. Ma gə zhar ni, ga akwa hilantə ni.

¹⁹Mdə na ka ɗəffari bwarbwar ana wutə watsəɓari. Kamnyar ma ga ku msərantə ni ka pal, tar gə ləkəma ka harari apani.

²⁰Ma ga ata psi thləma ga aka sauri ka ndzi ka ɗəffər thlipə su, vir laga ga ata ndzi ɗəɗu.

²¹Mda ana ɗəmhə suayeri hang tə tsa ata bara harari, amma tar su tə MTHLAKU hira an ata wutə ləkwa.

²²Su tə mda ana bara akəla mda an jirkur. Kuji ka mdə ndzi akwa bwani ta mda andzi mdər thlandər.

²³Thlivər ɗəffa MTHLAKU ana tər fa, ka ɓəlatə mda ta asar. Antə tsa ata ndzi lapiya kula thlivər su.

²⁴Harwa ana hau tsiyari akwa kwatam ka kəɓəlari mula alari, tsa amzhi hamnya ɗəva aka kərni wa.

²⁵Kəlara sakatə mdə ku ɗi mdər kyar su, mdə na kasəla ana thliptə su. Ma gə mnya aka mdə na ɗəɗu tsa ata vərvər hara ɗəɗu.

²⁶Ɓzər na ana hara ɗəffu ka dlutsə sur baba'ni ka mpa, ka kədləmta mama'ni, tsa an sur səli aka mjir yarni.

²⁷Ɓzərna, ma ga ku zhar ta thlipə su, ga ata sə fwari ata kəra shanga su tə gə thlipta.

²⁸Mdər seɗa na kula jiri ana gyal ka su tə mjir kuma ku thlamta. Tədəku mdə na ɗimi ana nghyantə mnyari ka ɗimikur apa susəma.

²⁹Kula nuhum mda ata ɗi mjir mnya ɗimi, ka rəɓtə mji na caku.