Read bura-pabir Karapwayeri 2 Bible Online

Karapwayeri 2 - bura-pabir bible

Karapwayeri 2

¹Ɓzərna, ka gə psi thləm ali, kara kəsi suayeri tə I thlipa ala ga.

²Psi thləma ga aka su na ka ɗəɗukur akwa, ka gə nggaɓəla ni.

³Jiri, bara səndə ka nggaɓəlar su, ka gə haptə kuraku akwa bara səndə su.

⁴Ma ga ku pakə ni ka jirkur apa mdər pakə adzərfa, wala apa mdər pakə gəna na ɗuwarɗuwarari,

⁵antə ga ata sə nggaɓəla karapur thlivər ɗəffa MTHLAKU ka wutə səndə na ar Hyel.

⁶Kamnyar MTHLAKU andər hamta ɗəɗukur, ka hamta dunar səndə su ka nggaɓəlar su aka mda.

⁷Tsa ana hamta sauri na ɓɗaku aka kəlara mdə na ana hara su kalkal, ka ɓəlatə mji na ka jirkur.

⁸Tsa ana ɓəlatə mji na ana hara su na kalkal, ka tsəlpitə mji na ana nu ni ka ɗəffu duku.

⁹Antə ga ata səndə su na kalkal, su na jiri ka su na ɓɗaku. Antə ga ata səndə lakur hara su na kalkal.

¹⁰Kamnyar ga ata ndzi ɗəɗu, antə səndə sur nga ata hara ka gə nggatə msəra.

¹¹Hangkalkur ata wulwul kəra ga, nggaɓəla su na kalkal ata ɓəlatə nga.

¹²Ɗəɗukur ata ngkatə nga ta hara ɗimikur, ka ndəkəmta nga ka mjir thlandər,

¹³mji na ku zhar hara jirkur ka ləkwa kuthlu akwa hara ɗimikur,

¹⁴mjir hara kucali akwa hara ɗimikur, ka nggatə msərakur su na ɗimi thlurthlurari.

¹⁵Da an mji na hir su na mbalmbalari mji tə mda ana mbərsa ka da wa.

¹⁶Ɗəɗukur ata msərantə nga ta dərkur mwala na ana ləka, sakatə tsa akwa ndəkər hangkala ga, ka kyanggyar na msəra,

¹⁷mwala na ana gyal ka alkawalər kəldzərni, ka təra kazhar salngkiɗa tə tsa kəla akwa dakwikurərni.

¹⁸Lakur ləharngkiɗa an lakur mta, bara ləharngkiɗa an bara ləkwa kula.

¹⁹Mda aɗi na ana ra thlawar ni ka ngka wa, wala jaktə wutə lakur mpikə wa.

²⁰Apani ka gə nu lakur mji na ɓɗaku, ka gə hara su na kalkal akwa ndzəndziyir nga.

²¹Kamnyar mjir jirkur an ata fəi akwa tsəɗi ni, mji na kula biku an ata mbila akwa tsəɗi ni,

²²amma Hyel ata fwaɓəla mji na ɗimi kazhar tsəɗi ni, ka ntsuɓəla mjir biku apatə mda ana ntsumta kusar.