Read bura-pabir Karapwayeri 20 Bible Online

Karapwayeri 20 - bura-pabir bible

Karapwayeri 20

¹Yimər anap andər vu mda akwa kyartəkur, tsa andər səntə wika ka mpa. Antə kəlara mdə natə yimər anap ni ku fatə ni, tsa aɗi ɗəɗu wa.

²Kəlara sakatə ɗəffa kuthli ku ɓzi, ɗəffari ata mbwa apa tsəngi. Mdə na ku ɓzamtə ɗəffari tsa an akwa bara tsi kərni.

³Ma ga ata bara darajar kər nga, ga aɗiya hau mnya ga akwa beɗi wa. Mdə na caku ana səkwi nthləi beɗi wa.

⁴Mdə na ana hara harwakur ka zhar ta kukul fakərni akwa sakari aɗi ana wutə su akwa sakar səvəi ka sur fakə wa.

⁵Wala tə nggaɓəla su na akwa ɗəffa mda an mwavər apa kə yimi akwa kira jiɓə na zurang, mdə na ɗəɗu ata mzhi ndəkərɓəlari.

⁶Kəlara mda ana pəla tsa ka jiri antə mda ata mzhi mbərsa ka tsa. Amma wan ata wutə mdə na ka jirkur tə mda ata mzhi mbərsa ka tsa jiri ri?

⁷Mji na pwa ana hara su na kalkal, antə Hyel ana dlar maɗa' ɗa na ku nu surharar ɗa.

⁸Sakatə kuthli ku ndzəndzi akwa hara shariya tsa ana ndəkɓəla su na ɗimi ka su na ɓɗaku.

⁹Mda aɗi akwa nca mburu na ata mzhi pəla abbər jirjiri ɗəffari kəcəkəcari, tə tsa aɗi ka biku kəra wa ya?

¹⁰MTHLAKU ku nggəlar mji na ana kəthlər ka sur ngkərtə suayeri na aɗi kalkal wa.

¹¹Wala maɗangkyar ana ncantə halər ɗa atar su tə da ana hara, wala da maɗa' na pwa na ana hara su ka jirkur.

¹²MTHLAKU ku na ala mburu nca kamnyar wutə su ka thləm kamnyar nggatə su.

¹³Ma gə hir heni ga ata ndzi ka mi. Thlatə kara kəthlər antə ga ata wutə susəma hang apa su gapani.

¹⁴Mdər masə su ana kəmta kwabari ka pəla, “Aiyi, kwabari ku hara hang dzau”, amma ma sakatə tsa ku tərardzi tsa ana gaya abbər su ni butu.

¹⁵Ndər na pwa ku təramta dinar wala pelayeri ar dəɓa ka dlara.

¹⁶Kara fəi ləptər mdə na ku mbwa kir aka mətəpi abbər ka tsa dlu təmbəl, ka gə vəi ləptu ni tar ma mətəpi ni ku ntəmta.

¹⁷Buradi həlhəla ana ndzi msəra, amma ɗarndzi tsa ata ndzi apa pərdla akwa mnya mthlakari.

¹⁸Bara sauri na ɓɗaku akwa shanga su tə ga ata bara harari. Ga aɗiya ləkwa mpa kula gə yu sauri akəla mji wa.

¹⁹Mdə na hir gari ata kəra mda ana ngkər ashira mda. Ga aɗiya ndzi ata vəi duku ka mdə na ana mnya hang wa.

²⁰Ma ga ku nggəl baba' nga wala mama' nga, mpika ga ata kura apa pitəla na ana mta akwa kuthlu.

²¹Gəna tə mdə wuta ata kəra huva aɗi ana ndzi su na ka barka akwa datari wa.

²²Ga aɗiya pəla abbər ga ata ntə dawa wa. Zhari akwa tsiya MTHLAKU antə tsa ata dlar nga.

²³MTHLAKU ku nggəlar mji na ana kəthlər ka sur ngkərtə suayeri na ar fəi mda.

²⁴Apa madi tə mburu ata səndə laku natə mburu ata nuwari, təng tə MTHLAKU andər ɗəmhə shanga su ala mburu?

²⁵Kara dzama ɓɗaku katagu akəmata ga akətə alkawal abbər ga ata hamta saɗaka aka Hyel, ta ga asə pəla mi sənda.

²⁶Kuthli na ɗəɗu ana pakɓəla mdə na ɗimi ka ɗi ni kula kətadza.

²⁷MTHLAKU ana kəthlər ka ɗəffu ka mambələr mda apa pitəla, kamnyar wul su na ɗuwarɗuwarari akwa ɗəffa mburu.

²⁸Hirkur ka jirkur natə kuthli kəgari ana hara ka tsa fəi ata dəkəl kuthlikur.

²⁹Sur gaya ar kustayeri an duna ɗa, tsuwa darajar mji halhala an shishi mwapu.

³⁰Saka laga dlaɓwa na ana thla mbəlkəu ana ndəkəmta mda ka ɗimikur, mnya purpu ana namtə hangkala mda.