Read bura-pabir Karapwayeri 21 Bible Online

Karapwayeri 21 - bura-pabir bible

Karapwayeri 21

¹MTHLAKU andər mwa ka dzamər kuthli, tsa ana shinar ni akwa bwa tə tsa hira.

²Ga ata mzhi dzama abbər su tə ga akwa harari an kalkal, amma MTHLAKU akwa wul su na akwa ɗəffa ga.

³Hara su na kalkal ka na ka jirkur ana kəskəra MTHLAKU ta saɗaka tə mburu ana sənta alari.

⁴Mji na ɗimi ana ndzi ka kər olkur, ka ncar ruta, antə parang da akwa hara biku.

⁵Ɗəmhə su ka hangkal ata vu kara wutə su hang, amma bara su ka huva ana kura akwa ngguɗikur.

⁶Gəna natə gə wuta akwa lakur dlərpəkur aɗi ana fəi wa. Aghəla tə gəna ni ku ngkau nga akwa dərkur mta, tsa ata sha.

⁷Mji na ɗimi ana nggəlar hara su na kalkal. Antə ɗimikur tə da hara ana jaktə ngka ata kəra ɗa ka shamta ɗa.

⁸Mji na ka biku ana nu laku na mbalmbalari, amma mji na kula biku ana hara su na kalkal.

⁹Kuji ka mdə ndzəndzi aɓəla akwa kuɗəmar kəra mbwa, ta ndzi akwa mbwa duku ka mwala na hir mtirmnya.

¹⁰Mdə na kəmanggar ana hara ɗimikur aka kəlara mda, tsa aɗi ana kətadzə wala ntəwulərni wa.

¹¹Ma sakatə mdə ku ɗi mdər kər olkur, wala mdə na kula kər ana thliptə su. Mdə na ɗəɗu ana thliptə su akwa su tə mdə ku thlipa alari.

¹²MTHLAKU ana hara su na kalkal tədəku. Tsa asəndə shanga su tə mji na ɗimi ana hara akwa kutakəyir ɗa. Antə tsa ata səntə asar na ɗimi ata kəra ɗa.

¹³Ma ga ku nggəlar dlar mjir bwani, sakatə ga ata sə tuwa ka bara dlara, mda aɗi na ata sə psi thləmari ala gə wa.

¹⁴Cauta akwa ɗuwari ana mtathli hangkala mda, hamta sur dzəɓə mnya akwa ɗuwari ana peri ɗəffə bwarbwar.

¹⁵Sakatə mdə ku hara su na kalkal ka jirkur, mji na pwa ana hara kucali, amma hyala mji na ɗimi ana nthlə ɗa.

¹⁶Mdə na ku nggəlar ɗəɗukur ata wutə kərni akwa kula.

¹⁷Mdə na hir ngga msəra ata sə ndzi ngguɗi. Mdə na hir sa yimər anap ka səm su ka mal aɗi ata ndzi ka gəna wa.

¹⁸Bwani natə mdə na ɗimi ɗəmha ata kəra mji na pwa ana ngka ata kərari surni.

¹⁹Kuji ka mdə ndzi aɓəla akwa mtakə ta ndzi ka mwala beɗi na hir mtirmnya.

²⁰Mdə na ɗəɗu ana səndə lakur ndzi ka gəna ka msərakur, amma caku ana shamta shanga su tə tsa wutə təkəma.

²¹Ndzi ka hangkal ka jirkur antə far nga ata fəi, tsuwa mji ata na gə səli ka dlar nga.

²²Soja na ɗəɗu ana mzhi dlərəmta bərni na ka sojayeri mulmulari, ka ndlagamta katanggayeri tə da mbərsa kari.

²³Ma ga aɗi ata hir ləkwa bwani wa, tar kara ngkahə mnya ga.

²⁴Mdə na hir kərari ana hir gaya ka rutə mda. Tsa ana kəta apa mdə damwa aɗi na səndə su apa tsa wa.

²⁵Mwaɓər mdə na harwa ata tsi ni, kamnyar tsiyari ana hir hara kəthlər wa.

²⁶Antə har ka pci təri tsa akwa nggukə sur mji, amma ar mdə na pwa tədəku tsa akwa hamta su kula huni.

²⁷MTHLAKU aɗi ana hir saɗakar mji na ɗimi wa, zhar ka ma da hamta ka ɗəffu na ɗimi ya!

²⁸Mda ata thlamta mnya mdər seɗa na kula jiri, amma mda ata zhar mdər seɗa na jirari ka tsa ləkəma ka gari.

²⁹Mdə na ka jiri ana nu surni ka hangkal, amma mdə na ɗimi ana thlandər ka fa ncari apa tsa ka jiri.

³⁰Ɗəɗukur ar mda ka shanga ɗəmhədzərni amzhi ngkamta su tə MTHLAKU ku ɗəmhə wa.

³¹Wala ma sojayeri ar nga an ka takwayeri ɗəmhəɗəmhari kamnyar mpa, tar ma MTHLAKU ku hir ka hamta ala ɗa nggyari su.