Read bura-pabir Karapwayeri 22 Bible Online

Karapwayeri 22 - bura-pabir bible

Karapwayeri 22

¹Ma ku ndzi dwali ka gə carɓəla akwa daɓwa huwa ka gəna na hang, ka gə carɓəla huwa.

²Mdər gəna ka mdər bwani ka su pal na jili duku. Japwa ɗa MTHLAKU an həntə ɗa.

³Ma mdə na ɗəɗu ku wuta asar akwa si tsa ana hwiyimta, amma mdə na kəgaɓu ana hatə kərari ka ɗar bwani.

⁴Watsəɓər tərghəi kər ka thlivər ɗəffa MTHLAKU, an gəna, ka səli ka fa na saɓəl.

⁵Ma mdə na ata bara lapiyakur mpikari, tar ka tsa wul laku tə tsa ata nuwari ɓɗaku ka zhar shanga suayeri na ɗimi ɗimi.

⁶Thlipa aka ɓzər nga laku natə ka tsa nuwa, antə wala ma sakatə tsa ku hali tsa aɗi ata psəmtari wa.

⁷Mjir gəna ana hara kuthlikur ata kəra mjir bwani, antə mjir dlu təmbəl ana ndzi mafar mji na təpa ala ɗa.

⁸Ma ga akwa thləka hwulfər ɗimikur ga ata sə nthləi asar, antə bwani tə ga ana hara aka mji ni ata kura.

⁹Giri ka barka giri na ana huni wa, kamnyar giri ana hamta susəma aka mjir bwani.

¹⁰Kədləɓəla giri mdər rutə mda, antə mpa, ka beɗi, ka nggənggəl su ata kura.

¹¹Kəlara mdə na ka ɗəffari mwapu, ka jirkur, ka səndə gari ka hangkal, tsa ata ndzi pazhir kuthli.

¹²MTHLAKU ana bara ka tsa wuta abbər jirkur ku ndzəndzi ka kucivari, amma tsa ana tuzhimta su tə mjir thlandər ku ɗəmha.

¹³Harwa ana ndzəndzi avəi ka pəla abbər, “Ma I ləɓəla, nuhum I ata kəɓa ka tsəngi akwa laku ka tsa ɓɗəmnya ra!”

¹⁴Mnya mwala na ana ləka ndzi apa kur mta, mji na ku ɓzamtə ɗəffa MTHLAKU an ata tərkwari.

¹⁵Kəlara ɓzəngkyar ana hara suwasuwakur, amma ɗya andər kədləɓəlari.

¹⁶Fəi mdər bwani kamnyar bara riɓa, wala hamta cauta aka mdər gəna, ata namtə ngə ngguɗi.

¹⁷Psi thləma ga, antə I ata thlipa ala gə su tə mji na ɗəɗu pəla, ka gə dzam su ata kər akwa ɗəffa ga.

¹⁸Kamnyar ga ata nggatə msəra ma ga ku mzhi kəsi su nayeri ni har ka mzhi ɗangtə ɗa kəlara saka.

¹⁹I akwa bara ka gə mbərsa ka MTHLAKU, an su na hara tə I ata thlipə ɗa ala gə kulini ni.

²⁰I ku rəbwamta ala gə karapwayeri makkumari. Ga ata thliptə su hang ka wutə sauri na ɓɗakari.

²¹Atar ngəni antə ga ata mzhi thliptə su na kalkal ka su na jiri. Antə ma mji ku thlentə nga, ga ata ngka ala ɗa ka amsa na kalkalari.

²²Ga aɗiya dlutsə sur mdər bwani kamnyar tə tsa ngguɗi wa, wala zambatə mjir tursu akwa shariya wa.

²³Kamnyar MTHLAKU andər mbuli ɗa. Antə ma ga ku dəkəi ɗa tsa ata dəkəi nga.

²⁴Ga aɗiya ndzi pazhi ka mdə natə ɗəffari ɗimi wa, wala natə ɗəffari ana ɓzə taktar wa,

²⁵Kamnyar ta ga asə thliptə halari, ka vu kər nga akwa sha.

²⁶Ga aɗiya hara alkawal abbər ga ata ntə təmbəl aka mdə wa.

²⁷Ma ga aɗi mzhi ntəmtari wa, wala vəipiyir nga mda ata dlutsari.

²⁸Ga aɗiya tərar kəla fakəu natə kəkayeri ar giri ku vəi waci wa.

²⁹Ma ga ku hara kəthlər ar nga ɓɗaku, ga ata sə hara kəthlər aka kuthlyayeri, aɗi aka mji ndzang wa.