Read bura-pabir Karapwayeri 23 Bible Online

Karapwayeri 23 - bura-pabir bible

Karapwayeri 23

¹Ma sakatə ga ku ndzəndzi akwa səm susəma ka kuthli, kara vədzə hangkala ga aka jili susəma tə giri akwa səmari ka tsa ni.

²Wala ma ga andər səm dzau tar kara ngka tsiya ga.

³Ga aɗiya hara mbulamkur ata kəra susəma na msəra ni wa, kamnyar nuhum tsa an susəmər səvatə ngə daci.

⁴Ga aɗiya ghərantə kər nga akwa bara ndzi ka gəna wa. Ndzi ɗəɗu kara psi lakwari.

⁵Kamnyar gəna ana sha akwa məcikər nca apa da ka ɓəɓəku tə da ana fəla kəgari apa duku.

⁶Ga aɗiya səm susəmər mdə na ana fərdla wa, wala tsan msəra apa mə ri, ga aɗiya nggukə wa.

⁷Tsa ata mzhi pəla, “Mwa ɓza kara səm su”, amma aɗi an su na akwa ɗəffari jiri wa.

⁸Ga ata tapərɓəla su tə gə səm ni, antə shanga gari tə gə hara alari msəra msəra ni ata ndzi gapani.

⁹Ga aɗiya gari aka mdə na caku wa, kamnyar təng tsa ata kumshi ngə daci.

¹⁰Ga aɗiya tərar kəla na waci wa, wala dlutsə fakər mutayeri wa,

¹¹kamnyar Hyel na ka duna andər mbuli ɗa, antə tsa ata sə yu mnya ga.

¹²Psi thləma ga ɓɗaku aka maləmər nga, ka gə vu duna ga akwa thlipə su.

¹³Ga aɗiya zhar ta ɗi ɓzər ngə wa, wala ga an tsa ni tsa aɗi ata mtə wa.

¹⁴Ma ga ku tsa ni, ga ata msərantə mpikari.

¹⁵Ɓzərna, ma ga ku ndzi ɗəɗu, ɗəffi ata ndzi msəra ali.

¹⁶Jiri I ata hara kucali ma I nggatə nga akwa pəla su na kalkal ka jiri.

¹⁷Ga aɗiya səlkər mjir biku wa, amma tədəku ka gə thlivər ɗəffa MTHLAKU.

¹⁸Kamnyar ma ku ndzi abbər saka tsu aɗi akəma, sur ngkatə ta ga awutə su tə gə mwaɓtə ni aɗi wa.

¹⁹Psi thləma ga, ɓzərna, kara ndzi ɗəɗu ka dzam ɓɗaku ata kəra laku tə ga ana ndzəndzi akwa.

²⁰Ga aɗiya paktə kər ka mjir sa yimər anap ka wikə wa, wala mjir səm hang wa.

²¹Kamnyar mjir sa ka wika ka mjir səm hang ata ndzi ngguɗi. Ma ar ngə sai səm susəma ka heni antə gə sənda, kulikulini ga ata mwa akwa dasa.

²²Psi thləm aka baba' nga, ma kula tsa sakani ga aɗi wa. Kara wulwul mama' nga sakatə tsa ku hali.

²³Mastə jirkur, ga aɗiya ɗələmta wa, mastə ɗəɗukur ka thlipə su, ka nggaɓəlar su.

²⁴Ma ɓzər nga ata hara su na kalkal, ɗəffa ga ata ndzi msəra ala gə ka duna. Jiri, tsa sur gaya ka mdə wutə ɓzər na ɗəɗu.

²⁵Apani ka gə hara su na ata vu mjir yar nga ka da gaya ata kəra ga. Hara su na ata namtə ka ɗəffa mama' nga ndzi msəra alari.

²⁶Ɓzərna, səntə hangkala ga adzə ra, kara nu kur səli.

²⁷Kamnyar karwa ndzi apa kur mta na zurang, mwala ləka tsuwa ndzi apa jiɓə na cinggəthlu.

²⁸Da ana ɗuwardzi ka səka mji apa su tə mdər thla laku ana hara, ka vu ka mji shili hang ndzi kula jiri aka mwankir ɗa.

²⁹Wan tə parang tsa akwa bwani ri? Wan ka ɗəffə ɓzəɓzə ri? Wa andər beɗi ka bara mpa tədəku nə ri? Wa andər duduri dzari gapangapan nə ri? Wan tə parang ncari pit pit mamza nə ri?

³⁰Tsa an mdə na ana fəi aɓəla akwa sa yimər anap. Tsa an mdə na ana ləɓəla akwa kadlər pakə yimər anap na ka yaji.

³¹Ga aɗiya hir ka yimər anap ləktə ngə wa, wala tə ncari mamza ɓɗaku ka msəra ni. Wala tə tsa akwa mbu zukzuku akwa kwapu, aghəla nda ka ɗəffari pəpəi ni.

³²Kamnyar aghəla nda tsa ata kala apa pwapu, ka pu gwar apa fufukər.

³³Kəra ga ata kəl nga tə ga ata baɗitə wul shanga su akwa mwa titikər, ka pəla suayeri laga kula kər.

³⁴Ga ata nggata apa gə pəpəi ata kəra yimi na ola, apa mdə mbwadzə nga aka jikwara shar yimi na akwa tawardzi akwa shambar.

³⁵Antə ga ata pəla, “I tamatə mdə laga an tsa ra, amma sakanda I aɗi nggatə su shang wa. I tamatə da dlaɓu ra, amma I mzhi ɗangtə sakari wa. Kamnyar mə tə I amzhi thlatə wa ri? Nawa antə I ata thlata kəi jaktə ɗar ɗewa pal ri?”