Read bura-pabir Karapwayeri 24 Bible Online

Karapwayeri 24 - bura-pabir bible

Karapwayeri 24

¹Ga aɗiya səlkə sur mji na kəmanggar wa, wala bara ndzi pazhir ɗa wa.

²Kamnyar su tə hangkala ɗa akwa an mpa, su na akwa mnya ɗa an ɗimikur.

³Ka ɗəɗukur ka nggaɓəla su antə mda ana nci səla kəyirni ka vəi ni lapiya.

⁴Akwa kəyir mdə na ka sənda, tsa ana dəɓatə kutambwayeri arni ka sur gəna ɓɗakɓɗaku.

⁵Mdə na ɗəɗu ana ndzi ka duna təramta mdə na ɓəɓal, mdə na ka sənda ana təramta mdər dunar ɗəva.

⁶Mda ana səm mpa atar wutə sauri na kalkal ka ɗəmhədzi na ɓɗaku.

⁷Ɗəɗukur ku təramta kərathla caku. Wala mji tsaptədzi akwa nyarfu ka da ɗəmhə su, su aɗi tə caku ana wutə ka pəla wa.

⁸Ma tədəku ga akwa ɗəmhə ɗimikur, thləma ga ata tuwa abbər gə mdər ta bwari.

⁹Shanga su tə caku ana dzama ata kər an sur biku. Mji aɗi ana hir mdər rutə mdə wa.

¹⁰Ma ga ku ncanta abbər ga amzhi nggitə su akwa sakar bwani wa, gə mtathlaku kamta jiri.

¹¹Msərantə mji natə mda akwa bara tsi ɗa kula suari aɗi. Ga aɗiya thləthlatə ka wul ɗa har ka da mtə wa.

¹²Ga aɗiya hwi su tə kalkal ka gə hara wa, wala vəta abbər ga aɗi səndə wa wa. Kamnyar Hyel asəndə dzamər shanga su na akwa ɗəffa mburu. Tsa na ana ɓəla mpika shanga mji ku sənda abbər mburu ka səndari. Antə tsa ata hamta ala mburu watsəɓər shanga su tə mburu ku hara.

¹³Səm cirməma, ɓzərna, kamnyar tsa an su tə kalkal ka gə səma. Apatə kangkangər cirməma msəra akwa mnya ga,

¹⁴antə ɗəɗukur msəra aka ndzəndziyir mpika ga. Ma gə ɗəɗu ga ata wutə su tə gə mwaɓta, ka nggatə msərakur akəmazi.

¹⁵Ga aɗiya ndzi kəmanggar, ka thla mji na pwa, ka ɓdləmta kutakəyir ɗa, apatə mji na ɗimi ana hara wa.

¹⁶Kamnyar wala ma mji na pwa an ndla ka murfa da ata jaktə thlata. Amma ar mji na ɗimi ma asar ku tsa ɗa wala ka duku an shar ɗa.

¹⁷Ga aɗiya hara kucali sakatə dawar nga ku ləkwa bwani wa, wala sakatə tsa tsamta səlari wa.

¹⁸Kamnyar ɗəffa MTHLAKU ata ɓza ma ga ku kumshi asar, antə tsa aɗi ata ɗi ni kəra wa.

¹⁹Ga aɗiya hir ka hangkala gə thlatə kamnyar mjir hara ɗimikur wa, tsuwa ga aɗiya səlka kəmanggarayeri wa.

²⁰Kamnyar mji na ɗimi aɗi ka su tə da akwa barari akəmazi wa. Da ata mta apatə u'ur pitəla ana mta.

²¹Ɓzərna, Ka gə thlivər ɗəffa MTHLAKU ka ɗəffa kuthli, tsuwa ga aɗiya paktə kər ka mji natə kəra ɗa ɓəɓal wa.

²²Kamnyar MTHLAKU wala kuthli ata mzhi thlenta asar ata kəra jili mji nayeri ni ata saka duku. Antə mda aɗi na asəndə jili olkur asar tə MTHLAKU wala kuthli ni ata thlentari wa.

²³Nggədza jakər karapwayeri damwa. Aɗi kalkal ka mdə ncantə zumzumkur akwa shariya wa.

²⁴Ma ga ku pəla abbər mdə na ka biku an ka jiri, shanga mji ata thləmnya ala gə ka nggəlar nga.

²⁵Amma ma ga ku ɗi mdə na ka biku, shanga su ata mwa ala gə kalkal, antə ga ata wutə ləkəma har ka thləma ga tuwa akwa su na ɓɗaku.

²⁶Mdə na ana hamta amsa na dwaɗu tədəku an pazhi na jirari.

²⁷Ka gə ɗəmhə fakər nga, ka thləkamta hwulfər nga, kambəla ga həntə kəyir nga.

²⁸Ga aɗiya hamta seɗa na ɗimi ata kəra nvwa nga kula suari aɗi wa, wala thlandər ata kərari wa.

²⁹Ga aɗiya pəla, “Su tə tsa hara alari ni tar ma I hara alari tsuwa, wala tar ma tsa nggahə tsuwa”, wa.

³⁰I ku ɗar təramta adzə fakər harwa laga, fakər anap ar kəgaɓu laga.

³¹Kusar kəga mtəhəra ku kəla ka mbultsa fakə ni. Umdla tə mdə kawarta fakə ni kəgari ku ndlamtadzi.

³²Sakatə I wutə su ngəni, ka dzama akwa ɗəffi, antə I thliptə su.

³³Atar nggət heni raka, ka heni raka, ka ɓəlhədzi tsiya ga kamnyar ghərɓəlaghəra,

³⁴antə tura ka bwani ata pwa ata kəra ga apa mdər thla laku.