Read bura-pabir Karapwayeri 25 Bible Online

Karapwayeri 25 - bura-pabir bible

Karapwayeri 25

¹Nggədza jakər karapwayeri ar Solaman natə mjir kəthlər akwa kəyir Hezekiya na kuthlir Yahuda ku rəbwaɓəla.

²Hyel ku ɗuwar suayeri ngəni ta mburu anggaɓəla kamnyar ka mburu nar səli, ka hamta dunar ngkərɓəlari aka kuthlyayeri kamnyar ka mburu na ɗa səli.

³Wan ata mzhi nggaɓəla su na akwa mwa akwa ɗəffa kuthli ri? Dzamərni ku təra kərathla mburu, nal apa vəi na amtazi ka zurang apa kira di.

⁴Tar ka mdə ɓuɓəla adzərfa ɓɗaku kambəla mdər ɓdla mzhi namtə su na ɓɗaku ka tsa.

⁵Tar ka mdə fwaɓəla mji na ɗimi kazhar kəyir kuthli kambəla kuthli mzhi hara kuthlikur na ka jirkur.

⁶Ma sakatə ga akəma kuthli, ga aɗiya namtə kər nga apa gə mdə ola laga wa, wala bara vəi ndzəndzi na ɓɗaku akwa nca mji ol'ola wa.

⁷Kuji ka mda an kəga nga ka na gə vəi ndzəndzi na ola, ta mda a pəla ala gə ka gə nar vəi ndzəndziyir ngə ni aka mda ata nca mji na ol'ola. Su tə nca ga ku wuta,

⁸ga aɗiya huva səntari akwa shariya wa. Kamnyar ma mdə damwa si aghəla nda ka pəla apani wa, ga ata sə ləkwa səli.

⁹Kəɓa giri ka ntəwulər nga ka giri nggaɓəladzi giri shi giri. Giri aɗiya kəlari ashira nvwadzi aka mdə damwa wa.

¹⁰Kamnyar ma mji damwa ku nggati, da ata sə pəla ga ana cingdləmnya. Antə mdəkur nga ata təri ba saka madi.

¹¹Sauri tə mdə hamta akwa saka na kalkal ana ndzi ɓɗak ka duna apa ɗaha tə mdə hara ka dinar ata sur adzərfa.

¹²Ma ga ku psi thləm sakatə mda akwa mnya ala gə kamnyar nam nga, mnya ndaga ata ndzi ka riɓa ta sur thləm ar dinar.

¹³Mdər thlentə na ka jirkur ana ndzi msəra aka mdə na thlentə ni apa yimi mtathlaku akwa sakar vəi gərgər. Tsa ana vətə ɗəffu aka mthlakərni.

¹⁴Mdə na ana gaya abbər tsa ata hamta cauta amma tsa aɗi hara wa ana ndzi apa dlamba na ka shambar kula yimi akwa.

¹⁵Mbwiɗəffu ka gari ka hangkal ana mzhi ndəkərtə hangkala kuthli ka tsi u'u na aɗi.

¹⁶Ga aɗiya sa cirməma hang dzau wa, ta tsa asə ndlə ɗəffa ga ka vu nga akwa tapəra.

¹⁷Ga aɗiya ləvəyar ntəwulayeri ar nga ata kər ata kər wa, kamnyar tsa ata ghər ka ga ka sə nggəlar nga.

¹⁸Mdə na ana thlandər ata kəra nvwani ana ndzi apa mdər nthlə ni ka kəma, mdər thla ni ka katsakar, wala apa mdər shi ni ka afa.

¹⁹Mbərsa ka mdə na kula jiri akwa sakar bwani ndzi apa ɓɗə su ka hir hiɗahiɗa, wala mwa ka səl na aɓdala.

²⁰Hara har kucali aka mda akwa sakar ɗəffə ɓzəɓza ndzi apa həlta ləptər shambar arni akwa sakar vəi mtathlaku, wala putə una ata mbəlkari.

²¹Ma dawar nga ka mi, ka gə na alari susəma ka tsa səma. Ma tsa ka thləli, ka gə na alari yimi ka tsa sa.

²²Kamnyar atar hara apani antə ga ata vu ni akwa səli na ata mba ɗəffari apa hakthlir u'u. Antə MTHLAKU ata na gə watsəɓər nga.

²³Apatə shambar yala ana si ka yimi, antə cingdləmnya ana ɓzamtə ɗəffu.

²⁴Kuji ka mdə ndzəndzi aɓəla akwa kuɗəmar kəra mbwa, ta ndzi akwa mbwa duku ka mwala na hir mtirmnya.

²⁵Labar na msəra na thlatə ciju ana ndzi apa yimi mtathlaku aka mdə natə wulyari ku ul ka thləli.

²⁶Mdə na pwa na ku kələngkər aka mdə na ɗimi, tsa ndzi apa mdə na akwa pu diɗi akwa yimi na ɓɗaku.

²⁷Apatə aɗi ɓɗaku ka mdə səm cirməma hang dzau wa, antə aɗi ɓɗaku tsuwa ka gə bara ka mdə hu ngə dzau wa.

²⁸Mdə na kula mbwiɗəffu, tsa ndzi apa bərni na ata bəbal, kula katangga.