Read bura-pabir Karapwayeri 26 Bible Online

Karapwayeri 26 - bura-pabir bible

Karapwayeri 26

¹Apatə mda aɗi ana sək handzəkəla akwa sakar vəi ufu, wala yimi akwa sakar nthlə mthli wa, antə huwa aɗi ana kəɓa ka caku wa.

²Pthləmnya aɗi ata tam ngə wa, tar ma ga ku hara su na ɗimi. Da ata ləkəma ka kadla ata kər hyel daci apa kadapu wala shambarkəɗa kula pwa.

³Mdə ku namtə kwandeng kamnyar taku, lanjam kamnyar kwara, ka zwal kamnyar caku.

⁴Ma ga ku hamta amsar su tə caku ku yuwa, gə ka kəra ga ata ndzi caku apa tsa.

⁵Ka gə hamta amsar sur yuwa na kula kər ka amsa na kula kər, apani mdə na yu su ni ata sənda abbər azha tsa aɗi ɗəɗu wa.

⁶Mdə na ku thlentə caku ka ndər an kalkal ka mdə na nthləmta səlari surni. Tsa an akwa bara bwani aka kərari!

⁷Karapu akwa mnya caku ndzi apa səla nggurdəkəi, kəthlərari aɗi wa.

⁸Hu mdə na caku an kula ampani apa mbwau pela akwa mavinding.

⁹Karapu akwa mnya caku ndzi apa mdər wika na akwa bara kəɓəla mtəhəra akwa tsiyari surni.

¹⁰Mdə na ku kətə caku wala mdər wika akwa kəthlər an kalkal ka mdər sha na akwa shi kəlara mdə tə tsa wuta.

¹¹Apatə kila ana ngka adzə tapəra arni, antə caku ana zwartə cakukurərni.

¹²Caku na ɗimi ta shang, hərkə ta mdə na kəta abbər tsa ɗəɗu.

¹³Harwa ana nggəlar ləɓəla akwa kəthlər, ka pəla, “I akwa thlivər ləɓəla kamnyar nuhum I asə kəɓa ka tsəngi akwa laku.”

¹⁴Apatə nyarmbwa ana shinardzi ata hincisu, antə harwa ana shinardzi ata dəkələrni.

¹⁵Harwa ana hau tsiyari akwa kwatam ka kəɓəlari mula alari, tsa amzhi hamnya ɗəva aka kərni wa.

¹⁶Harwa ana wuta apa tsa ɗəɗu ta mji murfa na ata mzhi hamta amsa kalkal.

¹⁷Mdə na ana tərkwa beɗi na arni wa an kalkal ka mdər kətə balgha ata thləmari.

¹⁸Mdə na akwa pwaktə pazhirni ka pəla, tsa akwa gyali daci, an kalkal ka cicu na akwa gyalər shə afə kuzəku.

²⁰Ma udzəm aɗi wa u'u ata mta, antə ma cingdləmnya aɗi wa beɗi ata mta.

²¹Apatə vina ana vu ka hakthlir u'u mba, ka apatə udzəm ana vu ka u'u mba, antə mdər beɗi ana thlentə mpa.

²²Cingdləmnya an msəra apa kira kugwa, tsa ana ləghəi ba akwa ɗəffa mda.

²³Ndər na msəra ana mzhi ndzi ka ɗimikur akira apa tughum həi tə mdə fəi dzari ka yimər adzərfa.

²⁴Dawar nga ata mzhi gari na msəra ala ga, amma tsa ka ɗimikur tə tsa ɗəmha akira.

²⁵Wala ma sakatə tsa akwa gari apa tsa hir ngə ni, ga aɗiya mbərsa ka tsa wa, kamnyar ɗəffari nghyinghyari ka ɗimikur.

²⁶Wala ma tsa an ɗuwar ɗimikur na akwa kutari ni, shanga mji ata sə wulɓəlari.

²⁷Ma ga ku la kur ɗimikur aka nvwa nga, ga an ata sə ndla akwa sur nga. Ma ga ku baɗitə takəl pela ar ɗimikur, pela ni ata sə takələngkərdzi ala gə ka hadləmta nga.

²⁸Kara vədzə hangkal, kəlara mdə na ana thlandəra aɗi hir mji tə tsa ana thlandər ala ɗa ni wa. Mnya ar zwalitə mda ana sənta asar.