Read bura-pabir Karapwayeri 27 Bible Online

Karapwayeri 27 - bura-pabir bible

Karapwayeri 27

¹Ga aɗiya gaya ata kəra ɗəpa wa, kamnyar ga aɗi səndə su na ata mzhi hara azi ka ɗəpa wa.

²Zhar ka mji damwa an hu nga wala an mətəpi, amma aɗi gə sur ngə wa.

³Pela an kəgəɓu, wuyaku ma kəgəɓu, amma bwani natə ɗəffə bwarbwarkurər caku ana mbwalta ana təramta su nayeri ni ka kəgəɓkur.

⁴Ɗəffə bwarbwarkur an ɗimi, tsa ana famta di apa avava, amma ɗimikur tə mdər səlka ata hərtari ku təramta ngəni.

⁵Kuji kara pəla alari vəi sharni ata bəbal, ta ga avu ni dzama abbər ga aɗi hir ni jiri wa.

⁶Kuji mbəlkəu natə pazhir nga nthlədza ala ga, ta hau tsiyir msərakur ka dawar nga.

⁷Ma ga ku ndlə ka susəma, ga aɗi ata nggukə cirməma wa. Amma ma mi akwa tsi nga, wala susəma na ɗəɗahu ata ndzi msəra ala ga.

⁸Mdə na ku təra kazhar kəyirni, tsa ndzi apa ɗika na ku təra kazhar mbwarni.

⁹Tulari ka mal shiwur na msəra ana namtə ɗəffa mda, amma msərakur pazhi na jirari ku təramta ɗa shang.

¹⁰Ga aɗiya fwari ata kəra pazhir ngə wa, wala pazhir baba' ngə wa. Wala akwa vir tə ga ku ləkwa bwani, aɗi tar ka gə ra bara dlara akəla ɓzərma' ngə wa. Ntəwulər nga na kudzəha ata mzhi dlar nga təramta yangkura gə na ciju.

¹¹Ka gə ndzi ɗəɗu ɓzərna, antə ɗəffi ata ndzi msəra ali. Antə I ata mzhi hamta amsa aka mji na ana mnya ɗimi ali.

¹²Ma mdə na ka kər ku wuta asar akwa si tsa ana hwiyimta, amma mdə na kəgaɓu ana hau kərari ka ɗar bwani.

¹³Kara fəi ləptər mdə na ku mbwa kir aka mətəpi abbər ka tsa dlu təmbəl, ka gə vəi ləptu ni tar ma mətəpi ni ku ntəmta.

¹⁴Dli ndzəh thlawa ka kuraku ka thlentə ntəwula ata heni aɗi su na ɓɗaku wa, tsa aɗi hal na ɓɗaku wa.

¹⁵Mwala mtirmnya ndzi apa mbwa na akwa njinja vir tə yimi akwa hara.

¹⁶Ma ga ku mzhi ngkatə shambar wala kəsi mal akwa kuta tsiya ga, ga ata mzhi ngkatə mwala ni ta mtirmnya.

¹⁷Apatə liya ana tsələmta liya nvwani, antə mda ana tsələmta nvwani.

¹⁸Ma ga ku wulwul nfur kamnda ga ata səm yarni. Apani tsuwa, mjir kəthlər na ku wulwul kariyir mthlakər ɗa, da ata wutə watsəɓari.

¹⁹Apatə ga ana wutə kər nga akwa kutəram, antə su tə ga ana hara andər ncantə su na akwa ɗəffa ga.

²⁰Apatə mta ka kula aɗi ana pəla abbər ku mzhi ra apani wa, apani tsuwa mwaɓər mda ana kur wa.

²¹Mda ana mbaɓəla adzərfa ka dinar akwa tasar u'u, apani tsuwa antə mda ana ngkərtə kərni atar huwa tə tsa ana wuta.

²²Wala ma ga an dək ka dəkə caku apa mə ri, ga aɗi ata mzhi kədləɓəla cakukur akwa dzari wa.

²³Ka gə vədzə hangkal aka təmar nga ka thlar nga, ka ra wulwul ɗa ɓɗaku,

²⁴kamnyar gəna ka olkur ana fəi wa. Tsuwa wala dzakwar kuthlikur aɗi ana fəi ba saka madi wa.

²⁵Aghəla tə ga ku thli kusar, tə kusar ni ku jaktə ɗəɗa ka kəla, ma sakatə ga ku səvəi ka shanga kusar na ɓɗakɓɗaku ata dzər gar,

²⁶antə ga ata mzhi namtə ləptu ka shishir təmar nga. Tsuwa ga ata mzhi mastə fakə ka kwabar kwiyir nga tə gə ɗələmta.

²⁷Mambila kwiyayeri ni ata hamta uwa ala gə kəga kutakəyir nga, ka shanga mjir kəthlər ala ga.