Read bura-pabir Karapwayeri 28 Bible Online

Karapwayeri 28 - bura-pabir bible

Karapwayeri 28

¹Mji na ɗimi ana hwi wala sakatə mda aɗi akwa kədlə ɗa wa, amma mji na ka jirkur ana ndzi ka ɗəffər salkur apa tsəngi.

²Sakatə tsəɗi ku hara biku, mji hang ata ləkəma ka dlutsə olkur akəla nvwa ɗa. Amma ma tsəɗi ni ku wutə mjir pwara na ɗəɗu ka na ka sənda, tsəɗi ni ata fəi akwa msərakur.

³Ngguɗi na ku wutə olkur ka nar bwani aka mjir bwani, tsa ndzi apa yimi na ana ɓzamtə sur faku.

⁴Mji na ana ɓəli tsawa an mji na ana mbwa kir aka mji na ɗimi, mji na ana ɓəla tsawa ana mpa ala ɗa.

⁵Mji na ɗimi ana səndə jirkur wa, amma mji na ana nu MTHLAKU asəndə jirkur karkar.

⁶Kuji ka mdə ndzi akwa bwani amma tsa ka jirkur, ta mda andzi mdər gəna na kula jirkur.

⁷Ɓzər na ana ɓəla tsawa an ɓzər na ɗəɗu, amma ɓzər na ana nu maɗa' shambar an sur səli aka baba'ni.

⁸Mdə na ana jakə hangkur gənarni atar hamta təpa ka yimi, akwa tsaɓa gəna ni aka mdə na ana dlar mji bwani.

⁹Ma mdə na ku nggəlar kələngkər aka tsawa, Hyel aɗi ata dlu adduwarni wa.

¹⁰Mdə na ku ndəkərwa mdər jirkur akwa laku na ɗimi, tsa ka kərari an ata ndla akwa kur ɗimikur ni, amma mjir jirkur ata ləkəma ka fa kifər su na ɓɗaku.

¹¹Mdər gəna ana kəta apa tsa ɗəɗu, amma mdər bwani na ka nggaɓəla su ana səndə ngguɗikur mdər gəna ni.

¹²Sakatə mji na pwa ku wutə olkur, shanga mji ana hara kucali. Sakatə mji na ɗimi ku ləkwa kuthlikur, mji ana hwi ra ɗuwardzi.

¹³Ma ga akwa ɗuwar bikər nga ga aɗi ata ləkəma wa. Amma ma ga ku tubi ka zhar hara biku, Hyel ata kətadzə nga.

¹⁴MTHLAKU ana vədzə barka aka mdə na ana thlivər hara su na ɗimi, amma mdə na nggyarɗu ana ləkwa bwani na mwavər.

¹⁵Kəmanggar na ana nar bwani aka mji na akirari, tsa ndzi apa tsəngi na akwa nggyinggya wala mwaɓəlmi na akwa ngka kum.

¹⁶Mdər kuthlikur na caku ana nar bwani aka mjirni. Kuthli na ana nggəlar gənar dlərpəkur ana fəi ata dəkəl kuthlikur.

¹⁷Mdə na ku tsi mda, mamshir mdə natə tsa tsi ni ata kəl kərari ka psu ni akwa la kula aka kərari surni. Mda aɗiya ngkatə ni wa.

¹⁸Mdə na ana hara su ka jirkur ata ndzi lapiya, amma mdə na ana hara su mbalmbala ata ndla akwa kur mta.

¹⁹Mdər kəthlər ka duna ana wutə susəma hang, amma mdə na ana shamta sakarni akwa su na kula dlara ana ndzi ngguɗi.

²⁰Hyel ana vədzə barka aka mdə na ka jirkur ka tsa ndzi mdə na ka su. Amma tsa ana ɗi mji na ana huvər tsaɓ gəna.

²¹Ncantə zumzumkur aka mji aɗi kalkal wa. Amma alkaliyayeri laga ana zhar hara su na kalkal kamnyar buradi tə mdə ɓəltsa ala ɗa.

²²Mdər fərdla ana bara hara gəna ka huva, amma tsa aɗi sənda abbər su ni ata sə kura akwa ngguɗikur wa.

²³Akwa datari mji ana hu mdə na ana pəla jiri ta mdə na ana zwalitə mda.

²⁴Mdə na ana həl sur mjir yarni ka pəla, aɗi biku wa an kalkal ka mdər thla laku.

²⁵Mbulamkur ana səntə mpa, amma mdə na mbərsa ka MTHLAKU ana wutə ləkəma ka nggatə msərakur.

²⁶Mdə na ana mbərsa ka kərari an caku, amma mdə na ana hara su ka ɗəɗukur ana ndzəndziyirni lapiya.

²⁷Kəlara mdə na ana dlar mjir bwani aɗi ana tur su wa. Amma mdə na ana psi su aka mjir bwani wa, mda ana nggəl ni.

²⁸Ma sakatə mji na ɗimi ku ləkwa kuthlikur, mji ana hwi ra ɗuwardzi. Amma ma sakatə sakar ɗa ku kuri, mji na ɓɗaku ana ngka akwa kuthlikur.