Read bura-pabir Karapwayeri 29 Bible Online

Karapwayeri 29 - bura-pabir bible

Karapwayeri 29

¹Kəlara sakatə mdə ku tsaktə nga amma ga ku ləkəma ka ncantə kər ɓəɓalkur, vir laga ga ata sə hila tə ga amzhi namtədzi kəra wa.

²Sakatə mji na ɓɗaku an ka kuthlikur, mji ana hara kucali. Amma ma sakatə mji na ɗimi ku ləkwa kuthlikur, mji ana tuwa.

³Mdə na ana hir ɗəɗukur ana namtə ɗəffa baba'ni, amma mdər nu karwa ana shamta gənarni gapani.

⁴Kuthli na ka jirkur ana vu ka tsəɗiyirni ndzi akwa lapiyakur, amma mdə na ana dlu sur dzəɓə mnya ana tsi tsəɗiyirni.

⁵Mdə na ana zwalitə ntəwulərni ana ngga dərku aka kərari.

⁶Bikər mdə na ɗimi ana ngka ata kərari surni apa dərku, amma mdər jirkur ana hara ha ka kucali kamnyar msərmsərkur.

⁷Mdə na pwa ana səndə su na kalkal ka mdə hamta aka mjir bwani, amma mji na kəmanggar asəndə wa.

⁸Mjir mnya ɗimi aka mda ana thlentə hangkala mjir diyir ɗa, amma mji na ɗəɗu ana mtathli hangkala mji.

⁹Ma mdə na ɗəɗu ku burkatə mdə na caku, caku ni ana haptə kurakari, ka kumshi ka nggənggəl su.

¹⁰Mji na ka mwaɓər pumta mamshi ana nggəlar shanga mji na ka jirkur, ka bara tsi ɗa.

¹¹Ma ɗəffa caku ku ɓzi tsa ana hara su ka ɗəffu, amma mdə na ɗəɗu ana mbwi ɗəffari.

¹²Ma kuthli ku psi thləm aka thlandərayeri, shanga kwakunayeri arni ata ndzi kəmanggar.

¹³Mdə na ngguɗi ka mdər hara alari bwani an ka su pal na jili duku. MTHLAKU ku hamta ala ɗa ncar wutə su.

¹⁴Kuthli na ana shariya ka jirkur aka mdər bwani ana fəi ata dəkəl kuthlikur.

¹⁵Ɗya ka mpa aka ɓzəngkyar ana vu ka tsa ndzi ɗəɗu. Amma ɓzər tə mdə ku zhar ni kula ɗya, tsa ana ndzi ɓzəɓzari ka vu mama'ni akwa sur səli.

¹⁶Sakatə mji na ɗimi an ka olkur, ɗimikur ana vərvəra. Amma mji na pwa ana sə wutə sakar ndlar ɗa.

¹⁷Ɗi ɓzər nga antə hangkala ga ata pəpəi, ka ɗəffa ga ndzi msəra ala ga.

¹⁸Tsəɗi natə aɗi Hyel an akwa pwar ɗa wa, tsa an tsəɗi na kula lapiyakur. Amma mdə na ana kələngkər aka tsawur Hyel ana ndzi akwa msərakur.

¹⁹Ga amzhi ɗiɓəla buɗa ka mnya daci wa. Kamnyar wala tə tsa ata nggaɓəla su, tsa aɗi ata vədzə hangkalari wa.

²⁰Caku ka vuwur su akwa ɗəffu ta mdə na ana huvə mnya kula dzam su.

²¹Ma ga ku səwantə buɗar nga təng akwa ngkyarkurərni, tsa ata sə ndzi nggyarɗu ka ndzi mdər fa kifər nga akəmazi.

²²Mdər ɗəffu ana nthləi beɗi ka vu mda akwa bikayeri zumzum hang.

²³Mda ana kəli səliyir mdə na ka kər olkur, ka haptə səliyir mdə na ana tərghəi kərari.

²⁴Mdər ndzi ka həla aɗi damitədzi ka mpikari wa. Ma tsa pəla jirkur su tə tsa wutə mda ata ɗi ni, ma tsa zhar pəla jirkur Hyel ata shuwumta ni.

²⁵Mdər thlivər mda aɗi ana kuri wujir wa, mbərsa ka MTHLAKU antə ga ata ndzi lapiya.

²⁶Mji hang ana bara ka kuthli hara mdəkur ala ɗa, amma jirkur ana thlata akəla MTHLAKU.

²⁷Mji na ka jirkur ana nggəlar mji na ɗimi, antə mji na ɗimi ana nggəlar mji na ka jirkur.