Read bura-pabir Karapwayeri 3 Bible Online

Karapwayeri 3 - bura-pabir bible

Karapwayeri 3

¹Ɓzərna, ga aɗiya fwari su tə I thlipa ala gə wa, tədəku ka gə ɗangtə su tə I pəla ka ra hara,

²kamnyar da ata vu ka gə ndzi ka fa na saɓəl, tsuwa ga ata wutə gəna ka lapiyakur.

³Ka gə ndzi ka hirkur ka jirkur tədəku. Ka gə hatə ɗa ata wulya apa sur ɗangta, ka gə rəbutə ɗa akwa ɗəffa ga.

⁴Apani Hyel ata hara ala gə ɓɗakkur ka gə wutə daraja akəma Hyel ka akəma mji.

⁵Ka gə mbərsa ka MTHLAKU ka ɗəffa gə shang, ga aɗiya vəkər ka səndər ngə wa.

⁶Akwa shanga su ka gə haptə səliyirni, antə tsa ata pwar nga akwa kəlara laku.

⁷Ga aɗiya dzama abbər gə ɗəɗu kamtə wa. Ka gə thlivər ɗəffa MTHLAKU, ka nggəlar hara ɗimikur.

⁸Antə ga ata wutə lapiyakur aka dza ga, ka wutə duna aka ɗethlər nga.

⁹Nar səli aka MTHLAKU atar hamta alari sur nga ka yarakəmar shanga sur fakər nga.

¹⁰Antə biyayeri ar nga ata nghyi ka mthli, ka gəlamər nga nghyi pacapaca ka yimər anap.

¹¹Ɓzərna, ga aɗiya nggəlar ɗir MTHLAKU wa, wala ghər ka mnya tə tsa ana hara ala gə wa.

¹²Kamnyar MTHLAKU ana ɗi mdə natə tsa hira, apatə mjir ya ana ɗi maɗa' tə da ana nggatə msərakurər ɗa.

¹³Msəra aka mdə na ku wutə ɗəɗukur, ka tsuwa mdə na ka nggaɓəlar su.

¹⁴Kamnyar riɓar ɗəɗukur ku təramta adzərfa, tsuwa wastəɓari ku təramta dinar.

¹⁵Ɗəɗukur ɓɗakta liyar dəɓayeri, su aɗi tə ga gira ka tsa wa.

¹⁶Ɗəɗukur ata hamta ala gə fa na saɓəl, japu ka gəna ka səli.

¹⁷Tsa ata vu ka mwar nga ndzi ɓɗaku aka mji, ka ɓəlatə shanga mwar nga ka tsa ndzi lapiya.

¹⁸Ɗəɗukur an nfur hamta mpika aka mji na ku kəsi ni, mji na ku kəsi ni ɓɗaku, msəra ala ɗa.

¹⁹Atar ɗəɗukur antə MTHLAKU ku namtə duniya, atar səndərni antə tsa ku vəi vəi na amtazi.

²⁰Atar səndərni antə tsa vu tə kira di ku ntaudzi, ka vu tə dlamba ku pughəi yimi ata di.

²¹Ɓzərna, kəsi ɗəɗukur ka dzam na ɓɗaku, ga aɗiya hir ka da msəra ala gə wa.

²²Da ata dlar nga ka far ngə ndzi saɓəl, ka ndzi ala ga apa sur dəɓar wulya ga.

²³Antə ga ata lənggur nga kula thlivəra, tə wala pela aɗi ata tsamta səla ga wa.

²⁴Ga ata pəpəi kula su damitə nga, ka nggatə msərakur henər nga lapiya.

²⁵Ga aɗi ata thlivər asar na ana si kakər wa, wala jili waba na ana si ata kəra kəmanggar apa shambar yimi ni wa.

²⁶Kamnyar MTHLAKU an ata ɓəlatə nga, antə tsa ata ngkatə ta su angkəi səla ga.

²⁷Ga aɗiya ngkatə su aka mji tə kalkal ka gə dlar ɗa wa, ma ga ka dunar harari.

²⁸Ga aɗiya pəla aka ntəwulər nga abbər tar ka tsa ngka ɗəpa wa ma gə ka dunar dlar ni ashina.

²⁹Ga aɗiya ɗəmhə ɗimikur ata kəra ntəwulər ngə wa, kamnyar da ku mbərsa ka ga.

³⁰Ga aɗiya beɗi ka mdə kula suari aɗi wa, kula tsa ɓzamta ala gə su wa.

³¹Ga aɗiya səlkər mji na hir hara su ka mpa wa, wala nu surharar ɗa wa.

³²Kamnyar MTHLAKU ku nggəlar mjir dlərpəkur, amma tsa an pazhir mji na ana hara su na kalkal.

³³MTHLAKU ana shuwumta kəyir mji na kəmanggar, amma mji na ɓɗaku tsa ana vədza ala ɗa barka.

³⁴MTHLAKU ana kumshi mjir mnya ɗimi alari, amma tsa ana dlar mji na ka kanaɗi.

³⁵Mji na ɗəɗu ana wutə səli, amma cakwayeri ana ləkwa sur səli.