Read bura-pabir Karapwayeri 30 Bible Online

Karapwayeri 30 - bura-pabir bible

Karapwayeri 30

¹Mdə laga aɗi ka thləmari Agur, tsa an ɓzər Yake. Nayeri ni an karapwayeri natə Agur ku hara. Agur ni pəla aka Ithliyel ka aka Ukal:

²Jiri surharar na aɗi dludzə ka surharar mdə wa, I aɗi ana dzama apa mdə na lapiya wa.

³I aɗi ɗəɗu wa, su aɗi tə I asənda ata kəra Hyel wa.

⁴Wan ku ɗar ləmtazi ka ngka ri? Wan ku ɗar ngkəi shambar akwa tsiyari ri? Nənga wan ku ɗar pərtə yimi akwa zhaɓi ri? Nənga wan thlaɓəla kəla duniya nə ri? Man thləmari, ka tsuwa thləma ɓzərni ri? Pəla ali thləma ɗa, ma ga sənda!

⁵Shanga su tə Hyel pəla an jiri. Tsa ndzi apa partau aka mji na ana mbərsa ka tsa.

⁶Ga aɗiya jakəngkər su ata kəra su tə tsa pəla wa, ta tsa asə mpa ala ga, ka ncaɓəla abbər ga ana thlandəra.

⁷I akwa kiɗə nga, Mthlaku, abbər ka gə na ali su suɗa kwabə I amta.

⁸Na ntangkəma, dlar ra kəi ndzi mdə na ka jirkur tədəku. Na suɗkur, ga aɗiya hara kəi ndzi mdə na ngguɗi wala mdər gəna wa. Na ali susəma na ata mzhi ra daci.

⁹Kamnyar ma I ku ndzi ka gəna, nuhum I ata sə fwari ata kəra ga ka pəla, “Wan MTHLAKU nə ri?” Wala tsuwa ma I ku ndzi ngguɗi kamta, nuhum I ata sə həla, ka ɓzamtə thləma ga.

¹⁰Ga aɗiya ngkər ndər ɗimi ata kəra buɗa aka mthlakərni wa. Ma ga ku hara, buɗa ni ata nggəl nga, antə ata ndzi abbər ga ku hara biku.

¹¹Mji laga aɗi na ana nggəl baba' ɗa, da aɗi ana gwaɗita aka mama' ɗa wa.

¹²Mji laga aɗi na ana namta apa da mji na pwa, amma da an mji na adiya kula kəcəkəcəkur.

¹³Mji laga aɗi na ana hir kəra ɗa kamta, da ana gari ka fa nca ɗa aka mda.

¹⁴Da mji na mbulam kamta, ka thlira ɗa tsəltsəlari apa mwasu wala ingdla, kamnyar ɓɗəmnya shanga mjir bwani ka mjir tursu na akwa duniya.

¹⁵Ɗəla ka maɗa'ni maɗangkwi suɗa na ka thləma ɗa japu “Na ali!” Suayeri laga aɗi makər wala nfwar natə da aɗi ana ndlə ka pəla, “Kəmzhi ra” wa:

¹⁶Kula, na duniyar mji mtəmta, ka mwala na kula ɓzər, ka dəli mtakə na ka thləli, ka u'u na akwa mba kula mda amzhi tsiyari.

¹⁷Maɗangkyar na ana kumshi baba' ɗa ka rutə mama' ɗa akwa halər ɗa, zəlaku ata ɗəmbəla nca ɗa ka kutəkcivəi ɓɗəmnya ɗa.

¹⁸Suayeri aɗi makər wala nfwar na ana ndatə ra, tə I amzhi nggaɓəla ɗa wa:

¹⁹laku natə duku ana nuwa ata hyel, ka laku tə pwapu ana mwa ata pela akwa, ka laku natə shar yimi ana nuwa ata kəra yimi, ka laku natə sal ka mwala ana ləktədzi akwa.

²⁰Ngəni an laku natə mwala na kula jiri ana hara su akwa. Tsa ana ləka, ka pərəmta pəra, ka pəla, “Man ɗimi akwa ri?”

²¹Suayeri aɗi makər wala nfwar na ana kənggərtə duniya, natə tsa amzhi nggitari wa:

²²mafa na ku ndzi kuthli, ka caku na ku ndlə ka susəma,

²³ka mwala natə shili ku nggəlari amma tsa ku sə wutə sal, ka ngkwar kəi na ku dlutsə vəi ndzəndziyir mwarmbwarni.

²⁴Suayeri aɗi nfwar akwa duniya natə da raka raka, amma da ɗəɗu dzau:

²⁵Lima, da kula duna, amma da ana ɗəmhə susəmər ɗa akwa sakar vəi gərgər.

²⁶Pacata, na aɗi ka duna wa, amma da ana la mbwar ɗa akwa pela.

²⁷Ntsəkwa, da aɗi ka kuthli wa, amma da ana mwa akwa layi apa sojayeri ata ola ata ola.

²⁸Tawula, ga ata mzhi kəsi ni akwa tsiya ga, amma wala apani ga ata mzhi wutə ni akwa kəi kuthlikur.

²⁹Suayeri aɗi makər wala nfwar akwa duniya na ana mwa ka olkur ka səli ɓɗaku laga apa kuthli:

³⁰tsəngi, na ka Duna ta Shang akwa nca mwaɓiyayeri, na aɗi ana thlivər su wa,

³¹ka fugəm na ku ntsəi ka nciwa, ka kuthli na akwa mwar kuthlikur akəma mjirni.

³²Ma gan ku ndzi caku, ka namta apa mda aɗi na səndə su apa gə wa, wala ma ga an akwa ɗəmhə ɗimikur, thləthlatə kara dzama!

³³Kamnyar ntsar uwa andər səɓəla ka mal, tsuwa kucira mda andər səɓəla ka mamshi, antə ɗəffə bwarbwarkur ana sə kura ka mpa.