Read bura-pabir Karapwayeri 31 Bible Online

Karapwayeri 31 - bura-pabir bible

Karapwayeri 31

¹Kuthli laga aɗi ka thləmari Lemuwel. Tsa an kuthlir Massa. Nayeri ni an karapwayeri natə mama' Kuthli Lemuwel thlipa alari:

²Mə ri, ɓzərna? Mə ri ɓzər kuti? Mə ri ɓzər tə I kiɗa akəla Hyel?

³Ga aɗiya tsi dunar salkur nga aka mwanki wa, wala gənar nga aka mwanki na ana ɓəli kuthlyayeri wa.

⁴Psi thləma ga, Lemuwel! Aɗi kalkal ka kuthlyayeri sa yimər anap wa, wala nggukə sur wikanta mdə wa.

⁵Kamnyar ma da ku sa, da ata mzhi fwari ata kəra su tə kalkal ka da hara, ka nar bwani aka mjir ɗa na akwa tura.

⁶Mdə namtə sur wika kamnyar mji na ata mnya mta, ka yimər anap aka mji na akwa bwani.

⁷Zhar ɗa ka da sa, ka da fwari ata kəra turər ɗa da aɗiya jaktə ɗangtə bwanikurər ɗa wa.

⁸Gari ata vəya mji na aɗi ka dunar gari wa, ka mji na kula vuwur su akwa ɗəffu, ka mdə hara ala ɗa su na kalkal.

⁹Gari ata vəya mjir bwani ka mjir tura, ka gə wuta abbər mdə ku wul ɗa kalkal.

¹⁰Wan ata mzhi wutə mwala na ata kuri wujir ri? Darajarni ku təramta liyar dəɓayeri ciju.

¹¹Salngkiɗa ana mbərsa ka tsa, antə ba saka madi salngkiɗa aɗi ata tur su wa.

¹²Tədəku mwala ni ana hara su na ɓɗaku alari, akwa shanga ndzəndziyirni tsa aɗi ana ɓzamtə ɗəffari wa.

¹³Parang tsa ana bara ulu ka mpur puwa kamnyar tsa zhaɓi ka tsiyari surni.

¹⁴Tsa ana pakə susəma akwa vəi na ciju ka sənta avəi apa su tə sharər mjir fəli ana hara.

¹⁵Tsa ana thlatə tsu aviraviri ka tsa namtə susəma aka mjir kutakəyirni, ka pəla aka maɗangkwi kəi ni su tə ka da hara.

¹⁶Tsa ana wulhə vəi ka mastə ni ka kwaba tə tsa wuta, ka ncimta anap ata ka kwaba tə tsa wuta akwa kəthlər ni.

¹⁷Tsa ana dəltə kudzər ɓɗaku laga, ka tsa hara kəthlərərni ka ufti.

¹⁸Tsa asəndə jili riɓa tə tsa ana wuta akwa fəli ni, antə tsa ana hara kəthlər ba aviri.

¹⁹Tsa ana shi puwarni ka tsiyari surni ka tsa zhaɓərni ka kərari surni.

²⁰Tsa ana hamta su aka mjir bwani ka tsiyari bwang, ka hara ɓɗakkur aka mjir tursu.

²¹Tsa aɗi ana ndzi ka damitədzi akwa sakar vəi mtathlaku wa, kamnyar tsa ana ɗəmhə ləptər shambar aka mjir kutakəyirni.

²²Tsa ana namtə zhaɓər vəi piyirni ka kərari surni, ka ha ləptayeri na ka daraja, tə mdə nam ka lilin ka kalar lipəla ɓɗakɓɗaku.

²³Salngkiɗa an sənsəndari akwa kutadi, kəlara saka tə tsa akwa nca mji ol'olər tsəɗi.

²⁴Mwala ni ana nam ləptu ka lilin ka ɗələmta ɗa, ka thlentə sur mbwi kusar aka mjir fəli.

²⁵Tsa ɓəɓal, tsuwa tsa ka daraja, tsuwa tsa ana kumshi kula thlivər su na akəma.

²⁶Kəlara sakatə tsa ata gari, tsa ana gari na ka ɗəɗukur, ka thlipə su aka mdə ka hangkal.

²⁷Tsa ana wul kutakəyirni ɓɗaku tsa aɗi ana bara səm su kula kəthlərari wa.

²⁸Maɗa'ni ana kəga ni mwala barka, salngkiɗa tsuwa ana hu ni ka pəla,

²⁹“Mwanki hang ku hara su na ɓɗakɓɗaku, amma ga ku təramta ɗa shang!”

³⁰Kuzəku ana pwaktə mda, tsuwa ɓɗakkur dza ana kura, amma mwala na ka thlivər Hyel akwa ɗəffari, antə mda ana hu ni ka duna.

³¹Nar giri alari watsəɓərni. Tsuwa ka kəthlər tə tsa hara haptə thləmari akwa kutadi.