Read bura-pabir Karapwayeri 4 Bible Online

Karapwayeri 4 - bura-pabir bible

Karapwayeri 4

¹Maɗa'na, psi thləma giri aka surthlipər baba' giri. Vədzə giri hangkala giri, antə giri ata nggaɓəla su.

²Su tə I akwa thlipa ala giri an ɓɗaku, antə ka giri kəsi.

³Sakatə I ɓzəngkyar akəla baba'na, ɓzər duku ɗeng tə mama'na putə ncari ata,

⁴baba'na ku thlipa ali abbər, “Ka gə ɗangtə su tə I pəla ala ga, kara ɓəla ɗa, antə ga ata ndzi lapiya.

⁵Bara ɗəɗukur, ka mzhi ndəkɓəla su, ga aɗiya fwari wala psəmta ndərərna wa.

⁶Ga aɗiya fwari ata kəra ɗəɗukur wa, antə tsa ata ɓəlatə nga. Ka gə hir ni antə tsa ata pwar nga.

⁷Su na olta shanga an kara bara ɗəɗukur, ga ata mzhi shamta shanga su tə gə kəgari, akwa shanga su tə ga akwa barari, ka gə bara ɗəɗukur.

⁸Ma gə sənda ampaniyir ɗəɗukur, tsa ata vu kara wutə səli ma ga ku fəfahə ni ɓɗaku,

⁹Tsa ata hangkər ala gə dzakwar daraja, ka namtə ngə ɓɗak laga ka dzakwar huwa.”

¹⁰Ɓzərna, psi thləma ga ali, ka gə kətə su tə I akwa pəla ala gə ka jirkur, antə mpika ga ata ndzi saɓəl.

¹¹I ku thlipa ala gə lakur ɗəɗukur ka lakur ndzəndzi na kalkalari.

¹²Ma ga ata hara su ka ɗəɗukur, ga aɗi ata ghər wa, tsuwa wala ma ga akwa hwi ga aɗi ata tsamta səla ga wa.

¹³Ka gə kəsi su tə gə thlipta ɓəɓal, ga aɗiya gyali kəgari wa. Wulwul ni, kamnyar su tə gə thlipta an ata vu kara nggatə msərakur mpika ga.

¹⁴Ga aɗiya mwari akwa vəi mwarər mji na ɗimi wa, ga aɗiya nu surharar mji na kəmanggar wa.

¹⁵Hwi ɗa, ga aɗiya nu ɗa wa! Psi lakur ɗa ɓzərna, kara təra!

¹⁶Kamnyar da amzhi heni wa tar ma da ku ɓzamtə su. Da ana ngkatə heni aka nca ɗa kamnyar ka da dəkəi mda.

¹⁷Kamnyar ɗimikur ka mpa ku ndzi ala ɗa apa buradi ka səkwar.

¹⁸Lakur mji na ɓɗaku ndzi apa balti, parakərni ana vərvər kəlardzi har ka mzhitə kərathlər pci.

¹⁹Amma lakur kəmanggar an apa kuthlu na mənggəl thlərətu. Da ana tsamta səla ɗa ka ndla, amma da aɗi na səndə su na ngkamta ɗa wa.

²⁰Vəi hangkala ga, ɓzərna, aka su tə I ana pəla ala ga, ka gə nggatə ndərərna.

²¹Ga aɗiya psəmta wala duku wa, kəsi ɗa akwa ɗəffa ga ɓɗaku.

²²Kamnyar da ana hamta mpika ka lapiyakur aka kəlara mdə na ku nggaɓəla ɗa.

²³Na olta shang, dzam ka hangkal ata kəra kəlara su, kamnyar su tə gə dzamta an ata mwa ka mpika ga.

²⁴Ga aɗiya thlandər wa, wala gari na mbalmbalari wa.

²⁵Kara wul su na akəma ga dwaɗu ka jirkur, ga aɗiya haghəi kəma ga abbər ga akwa səlitə mdə wa.

²⁶Kara ɗəmhə su tə ga ata harari ka hangkal, antə shanga su tə gə hara ata ndzi kalkal.

²⁷Ga aɗiya vu kər nga akwa hara ɗimikur wa, ka gə nu laku dwaɗu kula gə mbalidzi.