Read bura-pabir Karapwayeri 6 Bible Online

Karapwayeri 6 - bura-pabir bible

Karapwayeri 6

¹Ɓzərna, ma ga ku hau tsiya ga akwa mbwa kir aka pazhir nga ka tsa dlu təmbəl, wala pəla aka mətəpi abbər ga ata ntəmta alari təmbələrni,

²ka ngkau kər nga akwa dərku atar ndərər nga ka alkawal tə gə kəta,

³tə ga ku ləkwa bwani akwa tsiya mda, to nggədza su tə ka gə hara. Ɓumta səli ka gə mwari adzə ni, ka kiɗa akəlari ka giri tsi ndər ni.

⁴Ga aɗiya sək saka damwa wa. Ngkatə heni aka nca ga kara kuri tsu kulini.

⁵Msərantə kər nga akwa dərku ngəni apatə jikəl ana msəra akwa dərkur muzəmaku.

⁶Harwa ragai, thlipə giri su akəla ləma bu! Wul laku tə tsa ana hara su akwa ka gə ndzi ɗəɗu.

⁷Ləma aɗi ka mdə laga ola akəma ɗa apa kuthli, wala lawan, wala bəlama wa,

⁸amma wala apani da ana tsaptə susəmər ɗa akwa sakar fəi sur fakəu, ka ɗəmhə ɗa akwa sakar vəi gərgər.

⁹Amma ar giri, nawa antə giri ata sə mbura nca giri ri, harwayeri? Nawa antə giri ata thlatə ka hara kəthlər ri?

¹⁰Kamnyar tsa ana pəla, “Ndzi kəi jaktə ɗar heni raka, kəi jaktə ɗar ɓəlhədzi raka kəi ghərɓəlaghəra.”

¹¹Amma sakatə tsa akwa heni, antə tura ka ngguɗikur ata si ata kərari apa mdər thla laku.

¹²Mdə natə surhararni aɗi wa tar kəmanggarkur ana kadlər thlandəra.

¹³Tsa ana ɓəlnca aka nvwa ni, ka tsəkwar səla nvwa ni ka səl kamnyar, wala gari ka kuleng tsi akwa ɗuwari kamnyar pwaktə mda.

¹⁴Kəlara saka tsa akwa dzamər ɗimikur ka kəmanggarkur, ka ti bwari akwa kəlara vəi.

¹⁵Amma kula səndərni Hyel ata tsa ni ka asar natə tsa akəcimta wa.

¹⁶Jili mji aɗi zumzum ka bwa ngkwa natə MTHLAKU ku nggəlari, har ma murfa na ku ndzi sur cika alari.

¹⁷Da an mjir rutə mda, ka mjir thlandər, ka mjir tsi mda kula suari aɗi,

¹⁸ka mjir ɗəmhə kəmanggarkur, ka mjir huvər hara ɗimikur,

¹⁹ka mjir thlandər akwa mbwar shariya, ka mjir ti bwari akwa kutakəi.

²⁰Ɓzərna, kara hara su tə baba' ngə pəla ala ga, tsuwa ga aɗiya fwari su tə mama' ngə thlipa ala gə wa.

²¹Ka gə kəsi ndərayeri arɗa tədəku akwa ɗəffa ga, ka gə mbwau ɗa akwa wulya ga.

²²Su tə da thlipa ala ga ata pwar nga kəlara sakatə ga akwa lənggu. Da ata ɓəlatə nga sakatə ga akwa heni. Tsuwa ma sakatə ga ku thlatə ɗəɗəpa da ata na gə sauri.

²³Kamnyar tsawayeri ngəni ndzi apa pitəla, sur thlipər ɗa ndzi apa parakəu, tsuwa mnya tə da ana hara ala ga kamnyar nam ngə ni an lakur mpika.

²⁴Da ata ɓəlatə nga ta mwala na ɗimi, ka msərantə nga ta kyanggyar ləɓ ɗəffu ar mwala na karwa.

²⁵Ga aɗiya nggukə ɓɗakkur dzari wa. Ga aɗiya hir ka ncari na ar ləkə ni ndəkərtə hangkala gə wa.

²⁶Kamnyar kər buradi pal ata mzhi ndəkərtə mwala karwa, amma lək mwala' mda ata sə kura ata kəra mpika ga.

²⁷Mda ata mzhi fatə hakthlir u'u' akwa kərathlari kula mbamta ləptərni ya?

²⁸Mda ata mzhi mwa ata kəra hakthlir u'u kula mbamta səlari ya?

²⁹Tsu apani tsuwa mdə na ku pi ka mwala' mda ata wuta asarari. Kəlara mdə na ku harata, tar ma tsa ɗar bwaniyari.

³⁰Mda aɗi ana rutə mdər həla ma tsa həl susəma kamnyar mi an damitə ni wa ya?

³¹Tsuwa ma mdə ku ngkəi ni, tar ma tsa ntəmta su tə tsa həltə ni ka bwa murfa, wala ma tsa an ata ɗələmta shanga su tə tsa kəgari avəyarngkiɗa.

³²Amma mdə na ku pi ka mwala' mda an kəgaɓu kamta, kamnyar tsa akwa tsi kərni.

³³Mda ata dlaɓu ni ka kəli səliyirni, antə tsa ata ləkwa səli ba saka madi.

³⁴Kamnyar səlka ata vu ka salər mwala ni ndzi mwavər kamta, kula kətadza. Antə tsa ata mzhi ntə dawa ngəni ka kəlara ɗimikur na ku ləkwa ɗəffari.

³⁵Tsa aɗi ata kələngkər ka mdə nta alari wa, tsuwa su aɗi tə mda amzhi hamtari na ata mzhi dzəɓtə mnya sal ni wala cajimta ɗəffə bwarbwarkur ngəni wa.