Read bura-pabir Karapwayeri 7 Bible Online

Karapwayeri 7 - bura-pabir bible

Karapwayeri 7

¹Ɓzərna, ka gə vədzə hangkala ga aka suayeri tə I pəla ala ga, ka gə kəsi tsawayeri arna akwa ɗəffa ga.

²Ɓəlatə tsawayeri arna, ka gə ndzi ka mpika. Kara wulwul su tə I thlipa ala gə tsu apatə ga ana wulwul ɗəffər nca ga.

³Ka gə bartə ɗa ata kulenga ga, ka ra kəsi ɗa akwa kəra ga.

⁴Ka gə hir ɗəɗukur apa ngkwarma' nga, ka namtə nggaɓəlar su apa pazhir nga na kər ka nggilang.

⁵Da ata ngkatə nga ta ga bara mwala na karwa, ta ga psi thləm aka mwala' mda na ka kyanggyarər ləɓ ɗəffa mda.

⁶Vir laga tə I haɓəla kəmi akwa windau,

⁷təng I wutə kəgaɓu laga akwa nca kustayeri na caku caku.

⁸Kəgaɓu ni akwa təramta akwa laku na kudzəhə ka vəi tə mwala ni ata. Tsa akwa mwari aharngkiɗa

⁹ka mnya tahaku, sakatə kuthlə ku hara.

¹⁰Təkəma təng mwala ni səɓəla kamnyar thlakəmari, tsa dəɓatə kərni ka zhaɓi apa mwala na karwa, ka sur pwaktə mda akwa ɗəffari.

¹¹Tsa mwala na kula thlivər su, kula səli, ka səlari andzi avəi wa.

¹²Tsa ana ndzi ata layi, wala akwa bəbal kutadi, wala akwa kuɗəma laga kamnyar ka tsa wutə mdə sal tə tsa ata ngkəyari.

¹³Mwala ni ana tamtə mdə ni, ka fəfahə ni, ka vədzə mnyari alari, ka pəla alari kula səli abbər,

¹⁴“I hamta saɗakar jakə mwardzi arna ashina, antə kumari ku mbil avəi hang.

¹⁵An su na hara tə I səɓəla abbər kəi ra ndəra ala gə ni, antə ɗəffi msəra ali tə I ku wutə ngə ni.

¹⁶I ku namtə dəkələrna ka zhaɓər lilin na ɓɗaku, na ka kalarni zumzum thlata ahar Masar.

¹⁷I ku pshitə dəkələrna ni ka tulari na kiskisu tə mdə nam ka mur, ka alowayeri, kəga kinnamon.

¹⁸Antə asər ka mwa ra nggatə msəra har ka vir kura, ka mwa fəfahədzi ka gyali, ka nggatə msərakur nvwadzi.

¹⁹Kamnyar mdərkəyirna aɗi avəi wa, tsa lənggu na ciju.

²⁰Tsa ku kətə kwaba ɗəciku ka təra kəgari, antə tsa aɗi ata ngka wa tar aghəla sati suɗa.”

²¹Apani antə mwala ni ku ləɓantə ɗəffa mdə ni ka kyanggyar na msəra ka ndəkərtə hangkalari.

²²Təkəma təng mdə ni nutə ni apa gyal tə mda akwa mwantari aka mdər hən kum, apa kimar na tərtə dərku,

²³kwabə mda ashi ni ka afa akwa mirari. Tsa ndzi tsu apa ɗika na akwa huvə ra pwa ata dərku, kula səndari abbər an su na ata kəl mpikari.

²⁴Antə, ɓzərna, psi thləm ali. Ka gə vədzə hangkal aka su tə I akwa pəla ala gə ni.

²⁵Ga aɗiya hir ka mwala ngəni səm hangkala gə wa, ga aɗiya nu lakurni wa,

²⁶kamnyar tsa ku ɓəli mji hang ka shamta mpika mji hang.

²⁷Kəyirni an lakur kula, mbwar piyirni an kur mta.