Read bura-pabir Karapwayeri 8 Bible Online

Karapwayeri 8 - bura-pabir bible

Karapwayeri 8

¹Ngga! Ɗəɗukur akwa kəga. Ngga sənda akwa haptə kurakari.

²Tsa ana thləthlata ata kəra gar kudzəhə ka mnya laku, ka akwa matəngndla.

³Akwa laku na ata ləkwa kutadi, adzə nyarfur di, ka haptə kurakari akwa pəla,

⁴“I akwa kəga giri, shanga giri! I akwa kəga shanga mji na akwa duniya.

⁵Giri na kula kər apa maɗangkyar, ka giri dzam su apa mji ol'ola, giri na caku, ka giri ndzi ɗəɗu.

⁶Psi thləm, kamnyar I ka su ɓɗakɓɗaku tə I ata bara pəla ala ga, I ata pəla ala gə suayeri na kalkal.

⁷Kamnyar jirkur antə I ata pəlari, I aɗi ana hir thlandər aka mdə wa.

⁸Shanga su tə I akwa pəlari an jiri, su aɗi na mbalmbalari wala ɗimi akwa wa.

⁹Shanga ɗa ata bəbal aka mji na ana nggaɓəla su, da su na kalkal aka mji na akwa bara thlipə su.

¹⁰Carɓəla surthlipərna ata vəya adzərfa, kara kətə sənda ata vəya dinar.

¹¹“Kamnyar ampaniyir ɗəɗukur ku təramta liyar dəɓa ciju, Su aɗi shang na ɓɗaku tə ga agira ka tsa wa.

¹²“I na ɗəɗukur ni, I ka dunar ndəkɓəla su, I ka sənda, ka dzamər su na kalkal.

¹³Thlivər ɗəffa MTHLAKU an nggəlar ɗimikur, I ku nggəlar kər olkur ka gaya ka lakwayeri na ɗimi, ka gwar mnya,

¹⁴I ka sauri na ɓɗaku ka ɗəɗukur na jirari, I ka sənda, tsuwa I ka duna.

¹⁵I ana dlar kuthlyayeri akwa kuthlikurər ɗa, ka mjir kuthlikur ka da ɗəmhə tsawu na ɓɗaku.

¹⁶I ana dlar kuthlyayeri ka da pwar mji akwa laku na kalkalari, ka shanga mjir kuthlikur ka da hara tsu apa nda.

¹⁷I ana hir shanga mji na hir ra, kəlara mdə na ku pakə ra ka jirkur tsa ata wutə ra.

¹⁸I ata mzhi namtə nga kara ndzi ka gəna ka thləm, mdə na ka daraja ka mdə natə gənarni ata kəla.

¹⁹Ɓɗakkur su tə ga ata wutari akəli ku təramta dinar, ɓɗakkurərni ku təramta adzərfa.

²⁰Parang I ana hara su na kalkal, parang I ana hara su na ka jirkur.

²¹I ana hamta gəna aka mji na hir ra, ka nghyantə kəyir ɗa ka su hang.

²²“MTHLAKU ku namtə ra ntangkəma akwa baɗitər kəthlərərni, ka namtə ra təng waci akəmata tsa anamtə suayeri damwa.

²³Mdə ku namtə ra akwa baɗitari akəmata shanga su, akwa baɗitari akəmata mda baɗitə nam duniya.

²⁴Mdə namtə ra akəmata mda anamtə mandayeri na ol'ol'a, akəmata mda namtə kucirkilayeri.

²⁵Mdə namtə ra akəmata mda anamtə garayeri, akəmata mda pwi ɗəɗəgəlayeri,

²⁶akəmata Hyel anamtə duniya ka mtakayeri, har ma akəmata Hyel anamtə bərbər kuta tsi pal.

²⁷I aɗi sakatə MTHLAKU vəi duniya, sakatə tsa ndərar vəi na amtazi ata kəra manda.

²⁸I aɗi sakatə tsa pwi dlambayeri amtazi, sakatə tsa kəlar vəi səɓəlar yimi akwa di.

²⁹I aɗi sakatə tsa ɗəmhə vəi datər yimi, ta tsa a fəlɓəla vəi tə mdə ɗəmha alari.

³⁰I adzə ni apa mdər kəthlər na masəku, I ana namtə ɗəffari tədək viri, tədəku I akwa kucali akəmari.

³¹Ɗəffi msəra ali ata kəra shanga sur duniya tə tsa namta, I ka kucali ka duna ata kəra shanga mjir duniya.

³²“Antə kulini, maɗa'na, ka giri psi thləma giri ali. Hara gir su tə I pəla, antə giri ata nggatə msəra.

³³Psi gir thləm aka su tə mdə ku thlipa ala giri. giri aɗiya gyali kəgari wa, antə giri ata ndzi ɗəɗu.

³⁴Mji na ana nu su tə I pəla ala ɗa ana nggatə msəra, mji na ana ndzi adzə ra akwa nyarfurna tədəku, mji na ana sək ra anyarmbwarna.

³⁵Mji na ku wutə ra, ku wutə mpika, antə MTHLAKU ata nggatə msərakurər ɗa.

³⁶Amma mji na ku ni ka iya, ku dəkəi kərɗa, shanga mji na nggəlar ra hir mta.”