Read bura-pabir M. Ngkəra 1 Bible Online

M. Ngkəra 1 - bura-pabir bible

M. Ngkəra 1

¹Ɓzər Dauda laga aɗi na ku ndzi kuthli akwa Urushalima. Tsa an mdə na ola na ɗəɗu. Antə nayeri ni an ndərayeri natə ɓzər Dauda ni ku pəla.

²“Shanga su kula ampani”, ndə mdər ngkər ndərər Hyel, “Shanga su kula ampani!” Su aɗi na ka ampani wa!

³Man riɓa tə mda ana wuta akwa kəthlər tə tsa ana ghəra akwa harari ata kəra duniya ri?

⁴Zaman ata si, ka zaman təramta, amma duniya aɗi ana tərardzi wa.

⁵Pci ana səɓəla, ka pci təri, ka ngka akwa vəi səɓəlarni ka damwa.

⁶Shambar ana fya təbwar anəm, ka kawarta təbwar yala. Tsa ana kawarta ka jaktə kawarta ka damwa, ka ngka akwa vəi tə tsa səɓəla akwa.

⁷Shanga zərkayeri ana hwi ka ləkwa manda, amma wala apani manda ni aɗi ana nghyi wa. Yimi ni ana jaktə ngka akwa zərkayeri ni, ka jaktə ngka akwa manda ka damwa.

⁸Shang su an sur ghərantə mdə daci, ghər tə mda amzhi ngkərɓəlari wa. Nca aɗi ana ndlə ka wul su wa, tsuwa thləm aɗi ana ndlə ka ngga su wa.

⁹Su na ku hara waci ata sə jaktə hara. Su tə mdə hara sakanda, mda ata sə jaktə haratə ni. Antə su aɗi na bilən shang akwa duniya wa.

¹⁰Mdə laga ata mzhi pəla, “Wul su ngəni bilən!” Amma jiri wa, kamnyar təng waci tsa aɗi, təng akəmata mda ya mburu.

¹¹Mda aɗi ana ɗangtə su na ku hara waci wa, antə wala akəmazi mda aɗi na ata sə mzhi ɗangtə su na akwa hara akwa zamanər mburu kulini wa.

¹²I na mdər ngkər ndərər Hyel ku ndzi kuthlir Israila akwa Urushalima.

¹³I ku hamta kəri abbər kəi pakɓəla ka nggaɓəla atar ɗəɗukur shanga su na akwa duniya. Antə I nggaɓəla abbər ngəni an kəl na kəgəɓu tə Hyel vəngkər aka mda.

¹⁴I ku wul shanga su na ku hara akwa duniya ni, ka wuta abbər jiri shanga su kula ampani. Shanga su ndzi apa kədlə shambar.

¹⁵Kəlara su na ku ndzi mbalmbalari, mda amzhi thlengɓəla ni wa, antə tsuwa ga amzhi jikatə su na aɗi wa wa.

¹⁶I pəla akwa ɗəffi, “Ai I ɗəɗu ta shanga kuthlyayeri na hara kuthlikur akəmata iya akwa Urushalima. I ku nggaɓəla karapur ɗəɗukur ka səndərsu.”

¹⁷I pəla I ata bara kəi nggaɓəla su ata kəra ɗəɗukur ka kəgaɓkur, ka cicukur. Amma I sə wuta abbər tsu I akwa kədlə shambar daci.

¹⁸Kamnyar hangkur ɗəɗukur tə gə kəgari ata vu ka gə ndzi ka damitədzayeri hang tsuwa. Mdə na ata jakəngkər səndərni, akwa jakəngkər sur ɓzamtə ɗəffari.