Read bura-pabir M. Ngkəra 10 Bible Online

M. Ngkəra 10 - bura-pabir bible

M. Ngkəra 10

¹Ma ciri mtəmta yiɗauwa ku pungkərdzi ata kəra tulari, da ata mzhi hilantə ni ka tsa hamta shiwur na ɗimi. Apani tsuwa cakukur wala an raka tsa ata mzhi shamta ɗəɗukur na ola.

²Ɗəffa mdə na ɗəɗu ana vu ni ka tsa hara su na kalkal. Amma ar caku ɗəffari ana vu ni ka tsa hara su na aɗi kalkal wa.

³Wala atar lakur mwar mdə na caku ata laku, ga ata mzhi nggaɓəla abbər tsa kula hangkal, kamnyar tsa ana ncaɓəla aka shanga mji, abbər tsa caku.

⁴Ma ɗəffa mdə na ola ku ɓza adzə nga, ga aɗiya huvə zhar vəi tə ga ata wa. Kamnyar ma gə ntsari ɗəffa ga, ga ata mzhi mtathli ɗəffari na bwarbwar ni.

⁵Ɗimikur damwa aɗi tə I wuta akwa duniya ni, antə su ngəni ana thlata akəla kuthlyayeri:

⁶Da ana putə mji na caku caku ata vəyayeri na ol'ola akwa gwamnati, ka pwi mjir gəna akira ɗa.

⁷I ku wutə mafayeri akwa mwa ata taku, ka mji ol'ola akwa mwa ka səl apa mafa.

⁸Mdə na ku la kur ɗimikur tsa an ata ndla akwa, mdə na ku ɓələmta banggwa tsa antə pwapu ata kal ni.

⁹Mdə na ana pukthlə pela andər dəkəidzi kəgari, tsuwa mdə na ana nta udzəm andər dəkəidzi kəgari.

¹⁰Ma mdə ka kəmərni daɓdaɓwari tə tsa aɗi tsələmta mnyari wa, ata ndzi dwali ka tsa kəthlər ka dunari. Ɗəɗukur ana dlar mda ka tsa səma, akwa shanga su tə tsa akwa harari.

¹¹Ma pwapu ku kal mda akəmata tsa adlu kuzəkər ngkatə kalər pwapu ni, to ampaniyir kuzəkər ngkatə kalər pwapu ni aɗi kəra wa.

¹²Su tə mdə na ɗəɗu pəla ana vu ka mji hir ni, amma mnya caku caku ana pwasəngkər bwani aka mthlakari.

¹³Tsa ana baɗitə gari caku caku, ka tsikərari ka cicukur na ɗimi,

¹⁴caku aɗi ana ghər akwa mnya wa. Mda aɗi na səndə su na ata sə hara akəmazi wa, mda aɗi na ata mzhi pəla su na ata sə hara aghəla tə mburu ku mtə wa.

¹⁵Kəthlər ana ghərantə mdə na caku, har ka lakur ləha sha alari.

¹⁶Sha ku wutə nga, tsəɗi ragai, gə tə kuthlir nga tsu ngkyar, gə tə mji ol'olər nga ana dli səm susəmər kucali.

¹⁷Giri ka saa, tsəɗi ragai, gə tə kuthlir nga ku hara mdə ola, maɗa' kuthlir nga ana səm susəmər kucali akwa saka na kalkalari, kamnyar ka da wutə duna daci, aɗi kamnyar ka da wikə wa.

¹⁸Ma mdə ku ndzi harwa kamta tə tsa aɗi namtə kəra mbwarni wa, kəra mbwa ni ata ndlaudzi, antə mbwa ni ata njinja.

¹⁹Mburu ana namtə susəma na msəra kamnyar ka tsa na mburu msərakur, ka sa yimər anap kamnyar ka tsa namtə ɗəffa mburu. Amma ma ga aɗi ka kwaba wa, su aɗi tə ga awuta akwa nca ɗa wa.

²⁰Ga aɗiya nggəl kuthli wala akwa ɗəffa gə wa, wala kumshi mdər gəna wala akwa mbwar piyir ngə wa. Kamnyar wala ɗika wala fəvəng ata mzhi mwanta ala ɗa su tə gə pəla ni.