Read bura-pabir M. Ngkəra 12 Bible Online

M. Ngkəra 12 - bura-pabir bible

M. Ngkəra 12

¹Ka gə ɗangtə Mdə na həntə nga tsu akwa sakatə gə kusta, akəmata sakar bwani asi ata kəra ga. Kamnyar sakanda ga ata sə pəla, “I aɗi akwa nggatə msərakur mpikəi wa.”

²Sakatə parakər pci, ka thliya, ka sasəlkayeri ata sə ndzi zhim zhim ala ga, sakatə dlambar yimi aɗi ata wuya wa.

³Sakanda tsiya gə na ɓəlatə nga ata sə kədza, tə səla gə na ka duna kulini ata sə ndzi ɓuɓushu. Thlira ga ata sə mbil yiɗauwa, tə ga aɗi ata mzhi ɓɗə su kəgari wa, antə nca ga ata hara zhim, awulɓəla su karara wa.

⁴Sakanda thləma ga aɗi ata nggatə kuraku tə mji akwa harari ata layi wa. Ata ndzi mwavər ka gə nggatə kuraka bur tə mda akwa hadla ata, wala surtsa tə mda akwa tsari. Amma wala apani kuraka ɗika ata mzhi thlentə nga ata heni.

⁵Sakanda ga ata thlivər vəyayeri na nal nal abbər ga ata təri. Shishir nga ata sə ngka mwapu, antə ata ndzi mwavər ka gə mzhi ndəkər kər nga ka mwari akwa vəi laga. Tsuwa sakanda shanga nggukər sal ka mwalakur ata kura. Kamnyar sakanda shanga mburu ku ləkwa lakur mwari akwa diyir mji mtəmta, antə mjir tuwa mshi ata mwa ata lakwayeri.

⁶Jiri, ka gə ɗangtə Mdə na həntə nga akəmata səwur guga tə mdə nam ka adzərfa anthləmtadzi, akəmata tasar dinar ajaɓumtadzi, kwabə thləvur kəi yimi ni akwahəmtadzi ata mnya jiɓa, ka yimi shirəmtadzi ata di.

⁷Kamnyar sakanda dza gə na bərbər ata ngka ka ndzi həi, antə mpika ata ngka aka Hyel na hamta.

⁸“Jiri, shanga su kula ampani”, ndə mdə ola na ɗəɗu, “Su aɗi na ka ampani wa!”

⁹Mdər ngkər ndərər Hyel ni aɗi ndzi ɗəɗu daci wa, tsa ku ləkəma ka thlipa aka mji su tə tsa asənda. Tsa ku dzama ata kəra karapwayeri hang, ka karatə ɗa, ka pu ɗa akwa laku na kalkalari ka hangkal.

¹⁰Mdər ngkər ndərər Hyel ni ku pakə karapwayeri na msəra, ka rəbutə ɗa kalkal ka jirkur ata bəbal.

¹¹Ndərər mji na ɗəɗu ndzi apa zwalayeri tə mjir ɓəla ana kəthlər kəgari akwa ɓəla mwaɓiyir ɗa. Ndərayeri natə mdər ɓəla duku hamta ni ana ləkwa ɗəffa mda ka fəi apa kusayeri tə mdə tsata ata su.

¹²Ɓzər na, su damwa aɗi natə kalkal ka gə wul su ata kər. Mda aɗi ana mzhi kuri rəbutə kakaɗayeri wa, antə karatə hang ata ghərantə nga.

¹³Akwa tsikəra ndərayeri shang, nggədza suayeri tə I thlipa ala gə ni: Thlivər ɗəffa Hyel, kara ɓəlatə tsawur ni. Kamnyar ngəni an su tə ka mdə hara.

¹⁴Kamnyar Hyel ata sə hara shariya ata kəra shanga su tə gə hara, wala suayeri tə gə hara akwa ɗuwari, na ɓɗaku ka na ɗimi.