Read bura-pabir M. Ngkəra 2 Bible Online

M. Ngkəra 2 - bura-pabir bible

M. Ngkəra 2

¹I pəla akwa ɗəffi, I ata ɗar msərakur, kəi nggatə msəra. Amma I wuta abbər shang ampaniyir su ngəni aɗi wa.

²I ku nggaɓəla abbər kumshi kəlara kəlara an kəgaɓkur, tsuwa ampaniyir msərakur aɗi wa.

³I bara kəi sa yimər anap ka dzi nggatə msəra, kəi hara suayeri na kəgaɓ kəgaɓu, wala tə I ɗəɗu. I bara kəi nggaɓəla su na msəra ta shang akwa virayeri na mbila ali akwa duniya.

⁴I ku hara kəthlərayeri na ol'ola. I ku latə kəyayeri, ka ncimta anap akwa fakayeri arna.

⁵I ku namtə gadinayeri aka kəri ka nthləi fakayeri natə I nciu nfwayeri na ar səma akwa.

⁶I ku lamta kufayeri na ata na yimi aka nfwayeri na akwa kəl ni.

⁷I ku mastə mafayeri shili ka mwanki, tsuwa I ka mafayeri natə mdə ya ɗa aviyar ngkiya. I ka bəri mwaɓiyayeri ar kəi təramta shanga mji na ndzi akəmata iya akwa Urushalima.

⁸Tsuwa I ku tsapta adzərfa ka dinar akwa mbwayeri ar pwi sur kuthlir tsəɗiyayeri na akiri. I ku fatə mjir ha shili ka mwanki na ana fwal ra, tsuwa I ka mwanki hang apa su gapani. I ka shanga su na ɓɗakɓɗaku tə mda ana bara ka tsa wuta.

⁹Jiri, I ku ndzi mdə ola, olta shanga mji na ku ɗar ndzi akwa Urushalima, tsuwa shanga su nayeri ni I wuta atar ɗəɗukurərna.

¹⁰I ku wutə shanga su tə I bara. I aɗi zhar kəlara su na ɓɗaku təramta akəmi wa. I ku nggatə msərakur shanga kəthlərayeri tə I hara, ngəni shang watsəɓər kəthlərər na.

¹¹Amma sakatə I pu nci akwa shanga su tə I hara ni, ka jili bwani tə I ɗar akwa kəthlər ni, təng I wuta abbər shang mda akwa ghər gapani, apa mdər kədlə shambar. Jiri, sur dlara aɗi akwa wa.

¹²Antə I ləkwa dzama ata kəra ɗəɗukur ka ata kəra cicukur ka kəgaɓkur. Kamnyar tsu an su tə kuthli na aghəli ata sə harari. Tsa ata jaktə nutə su tə mdə na akəmata tsa ku kurtə harata.

¹³Antə I wuta abbər ɗəɗukur ana dlara təramta kəgaɓkur, apatə parakəu ana dlara təramta kuthlu.

¹⁴Mdə na ɗəɗu asəndə cai vəi tə tsa akwa mwari ata, amma caku asəndə vəi mwarərni wa. Amma I nggaɓəla tsuwa abbər japwa ɗa ata sə tsikəra ndzəndziyir ɗa ka mta.

¹⁵Antə I pəla akwa ɗəffi, “Tsu asar na wutə caku an ata wutə ra. Antə apani ɗəɗukurərna ni aɗi dlar ra wa.” Tə I pəla akwa ɗəffi abbər ngəni ma shang ghər gapani!

¹⁶Kamnyar mdə na ɗəɗu ni ka mdə na caku ni japu ata mta, antə akəmazi mda ata fwari ata kəra ɗa japu.

¹⁷Antə apani I aɗi wuta ampaniyir ndzi ka mpikə wa, kamnyar su aɗi tə I wuta akwa ka təra kəra bwani wa. Kamnyar shanga su ku ndzi kula ampani, apa mdər kədlə shambar.

¹⁸I wuta abbər mdə damwa zum an ata sə ngga msərakur vəi ufərna, antə məyir shanga su ku ləɓəla kazhar kuti.

¹⁹Nuhum mdari ata ndzi ɗəɗu, nuhum mdari ata ndzi caku, wa ana sənda? Wala apani tsu tsa an ata ndzi mthlakər shanga su tə I fa vəi ufu akwa pakari atar ɗəɗukurərna! Ai ngəni shang ghər gapani!

²⁰Antə I ləkwa ɗəm dəmar shanga kəthlər tə I hara ni, ka wuta abbər, jiri, ma I an sənda, I aghəra apani wa.

²¹Kamnyar wala tə I ku hara kəthlər ka shanga ɗəɗukur, ka sənda, ka shanga masəkukur tə Hyel ni, tar kəi zhar shanga watsəɓərna aka mdə na aɗi kəthlərari wa. Ai ngəni shang ghər gapani, antə aɗi kalkal wa!

²²Ma apani, man riɓar su tə mda ana ghəra akwa kəthlərari nə ri?

²³Shanga ndzəndziyirni akwa duniya ku ndzi ncir bwani ka ɗəffə ɓzəɓza. Wala aviri hangkalari aɗi ana pəpəi wa. Ngəni shang ghər gapani!

²⁴Su na təramta aka kəlara mda an ka tsa səma ka sa, ka tsa nggatə msərakur kəthlərərni. Antə I wuta abbər ngəni an su tə Hyel ɗəmha aka kəlara mda.

²⁵Kamnyar ma Hyel aɗi hir wa, wan ata mzhi səm susəma ka nggatə msərakur mpikari ri?

²⁶Hyel ana hamta ɗəɗukur, ka səndərsu, ka msərakur aka mdə na pwa. Amma ar mdər biku, Hyel ana vu ka tsa kəthlər, ka wutə su, ka pwi aka mdə na ana kələngkər alari. Ngəni shang ghər gapani. Tsa ndzi tsu apa mdər kədlə shambar.