Read bura-pabir M. Ngkəra 3 Bible Online

M. Ngkəra 3 - bura-pabir bible

M. Ngkəra 3

¹Kəlara su na ana hara akwa duniya ana hara akwa saka na kalkal tə Hyel ɗəmha alari.

²Tsa ku ɗəmhə sakar yaɓəladzi, ka sakar mta, sakar nci su, ka sakar ntsumta su.

³Sakar tsi su, ka sakar mbantə su, sakar huzamta su, ka sakar həntə su.

⁴Sakar tuwa, ka sakar kumshi, sakar ɗəffə ɓzəɓza, ka sakar ɓathla.

⁵Sakar titiləmta pela, ka sakar tsaptə pela ata kəma duku, sakar fəfahədzi, ka sakar zhar ta fəfahədzi.

⁶Sakar paka su, ka sakar shamta su, sakar pwi su, ka sakar pumta su.

⁷Sakar kwahəmta su, ka sakar nduɓtə su, sakar dləɓ səri, ka sakar mnya.

⁸Sakar hirdzi, ka sakar nggəlardzi.

⁹Man riɓa tə mdər kəthlər ata wutə ri akwa ghərərni ri?

¹⁰I ku wutə kəgəɓkur kəthlərayeri tə Hyel hamta aka mdə ka tsa hara.

¹¹Tsa ɗəmhə saka na kalkal aka kəlara su. Tsa ku na ala mburu mwaɓər səndə su na hang, amma tsa aɗi na ala mburu dunar nggaɓəla su tə tsa hara akwa baɗitari har ka mwanta aka tsikərari karkar wa.

¹²Apani antə I nggaɓəla abbər su na təramta ta shang an ka mdə ndzi ka ɗəffu pəpəipəpəi, ka tsa nggatə msərakur ndzəndziyirni təng tə tsa tsu ka mpika.

¹³Antə kalkal ka mdə səm susəma ka nggatə msərakur watsəɓər vəi ufərni. Kamnyar ngəni an cauta natə Hyel ku hamta aka mda.

¹⁴I ku sənda abbər kəlara su tə Hyel hara ata ndzi ba saka madi. Mda aɗi ata kəmta su akwa wa, wala jakəngkər su tsu wa. Hyel ku ɗəmha apani kamnyar ka mdə thlivər ɗəffari.

¹⁵Kəlara su na ku hara, kurtə ka hara, su na ata sə hara, kurtə hara təng waci, Tsuwa Hyel andər vu ka su na ku hara ni sə jaktə ləkəma ka hara ata kər ata kər.

¹⁶Tsuwa I wuta abbər akwa duniya ni kula jirkur aɗi bamama. Kamnyar wala akwa vəi tə kalkal ka mdə wutə jirkur ata, ka vəi tə ka mdə hara su na kalkal ata, tsu ga ata wutə kəmanggarkur.

¹⁷I pəla akwa ɗəffi, Hyel ata sə hara shariya aka mji na pwa ka mji na ɗimi. Tsa ku ɗəmhə sakar hara shariya aka kəlara su tə mdə ku hara.

¹⁸I nggaɓəla abbər Hyel akwa ngkərtə mburu kamnyar ka tsa ncaɓəla ala mburu abbər mburu aɗi təramta mwaɓiyayeri wa.

¹⁹Kamnyar mji ana ndzi ka mpika ka mta tsu apa mwaɓi. Tsu jili asar na ana wutə mwaɓi an ata wutə mji, antə apani su laga aɗi zum tə mdə təramta mwaɓi kəgari wa. Antə jiri, su aɗi na ka ampani wa.

²⁰Shanga mburu ata mwari akwa vəi duku. Kamnyar apatə mburu shang səɓəla akwa həi antə mburu ata jaktə ngka tsu akwa həi.

²¹Wa ana sənda abbər jiri mambələr mburu ata ləmta, antə mambələr mwaɓi ata ləghəi akwa di ri?

²²Apani I ku nggaɓəla abbər su na təramta ta shang ala mburu an ka mburu nggatə msərakur watsəɓər kəthlərər mburu. Kamnyar an kura nəɓwar mburu, təng tə mburu amzhi səndə su na ata hara aghəla mtər mburu wa.