Read bura-pabir M. Ngkəra 4 Bible Online

M. Ngkəra 4 - bura-pabir bible

M. Ngkəra 4

¹Sakatə I jaktə ha nci ka wul su, təng I wutə mji akwa ɗar bwani akwa duniya ni. Mji akwa tuwa ka shimwi kamnyar ɗar bwani, amma mdər shiktə ɗa aɗi wa. Mdər hir dlar ɗa aɗi wa kamnyar tə mji na akwa na ɗa bwani ni ku təramta ɗa ka duna.

²Kamnyar ngəni antə I wuta abbər kuji mji na ku mti ta mji na tsu ka mpika.

³Amma na təramta ɗa japu an mdə natə mda aɗi yaɓəla ni hwatu wa. Kamnyar ncari aɗi wutə ɗimikur na akwa mwa akwa duniya ni wa.

⁴Tsuwa I ku nggaɓəla su na hara tə mji ana hara kəthlər ka duna ni. Da ana hara kəthlər ka duna kamnyar da akwa səlkə sur nvwa ɗa. Ngəni ma shang ghər gapani, ndzi tsu apa mdər kədlə shambar.

⁵Mji ku tsa karapu abbər kəgaɓu ana ɓəlhə tsiyari, ka mtə ka mi.

⁶Da ana wuta apa kuji ka mdə kəthlər raka ka hangkala mdə pəpəipəpəyari, ta ka mdə kəthlər na mwavər na ata vu ka mdə ghər ka təra vəyari akwa thləma bara su. Ngəni ata ndzi apa mdər kədlə shambar.

⁷Tsuwa, I ku nggaɓəla su damwa na kula ampani akwa ndzəndziyir mda akwa duniya.

⁸Mdə na kula mdərni, tsa aɗi ka ɓzər wa, wala ɓzərma'ni wa, amma wala apani tədəku tsa akwa kəthlər, har tə su aɗi ana amzhi ni wa. Tsa aɗi ana yu kərni abbər, “Kaha, shang I akwa ghər kəthlər ngəni aka wa ri, tə I akwa ngkatə msərakur aka kəri ni?” Ngəni an ghər gapani, tsa an lakur ndzəndzi na kula ampani.

⁹Ampaniyir mji suɗa ku təramta mdə pal, kamnyar da ata mzhi kuri wujir na olari.

¹⁰Kamnyar ma mdə pal ku ndla, nvwani ata thlentə ni. Amma ma mdə duku shini antə tsa ndla, ata ndzi alari ɗimi kamta, kamnyar mdər thlentə ni aɗi wa.

¹¹Ma mji suɗa pəpəi aviri ata vəi duku akwa sakar vəi mtathlaku, dza ɗa ata ndzi gərgəra, amma apa madi tə dza mdə duku shini ata ndzi gərgər ri?

¹²Mda ata mzhi mpa ka nvwa nga ka mula alari, amma ma giri pangkərdzi alari giri ata nggyari ni. Səwa nca kəma makər aɗi ana nthləmtadzi kasəla wa.

¹³Ɓzəngkyar na ɗəɗu wala tsa an ngguɗi, tsa ku təramta kuthli na ola na kəgaɓu, ma tsa aɗi ana dlu sauri wa.

¹⁴Wala ma ɓzəngkyar ni an thlata akwa pərsəna, tsa ata mzhi səma ka ndzi mdə ola. Tsa ata mzhi ndzi kuthli, wala tə mdə ya ni akwa ngguɗikur.

¹⁵I ku wuta abbər shanga mjir duniya akwa nu ɓzərdakwi, na lətə dəkəl kuthlikur ni.

¹⁶Tsa ata mzhi ndzi kuthlir mji dlama dlama, ka thləmari tuwa. Amma ma sakatə tsa ku mti, mda aɗi na ata sə ɗangtə usar ni kamnyar suayeri tə tsa hara wa. Jiri, ngəni ma shang ghər gapani, ndzi tsu apa mdər kədlə shambar.