Read bura-pabir M. Ngkəra 5 Bible Online

M. Ngkəra 5 - bura-pabir bible

M. Ngkəra 5

¹Ka gə hara hangkal sakatə ga ata mwari akwa mbwar vəngkər səli aka Hyel. Kuji ka gə mwari kara psi thləm ta hamta su apatə kəgaɓwayeri ana hara. Kamnyar da aɗi sənda abbər da akwa hara su na ɗimi wa.

²Ga aɗiya huvə pəla ndər wa, wala huvə hara alkawal aka Hyel wa. Kamnyar ar Hyel tsa akwar amtazi, ar nga ga akwa duniya, antə ga aɗiya mnya hang wa.

³Ma gə ləkəma ka damitədzi ata kəra su, ga ata mzhi kəɓa ka suni na ɗimiyari, tsuwa ma gə mnya hang, ga ata sə kar ka pəla su na aɗi kalkal wa.

⁴Kəlara sakatə ga ku kətə alkawalər hara su laga aka Hyel, ka gə mbərsa abbər ga ku haratə suari kula shamta saka. Kamnyar Hyel aɗi ana nggatə msərakurər su tə kəgaɓu ana hara wa.

⁵Kuji ka gə zhar kətə alkawal, ta ga akətə alkawal ka zhar ta hara suari.

⁶Ga aɗiya hir ka mnya ga psu nga akwa bwani wa. Tsuwa ga aɗiya hir ka gə sə tsikəra gariyir nga akəma Hyel abbər su ni ku mula ala gə wa. Kamnyar atar ngəni ga ata vu ka ɗəffa Hyel ɓza adzə nga, har ka tsa shamta shanga su tə gə wuta akwa kəthlərər nga.

⁷Kamnyar alkawal ana ndzi apa suniyayeri, suayeri tə mda anggaɓəla wa, ka ndərayeri ndzang aka caku. Amma gə na ɗəɗu ni, tar kara thlivər ɗəffa Hyel.

⁸Ma ga ku wutə mda akwa nar bwani aka ngguɗi, tə mda akwa ngkata alari suayeri na kalkal ka mdə hara alari akwa tsəɗi ni, aɗiya ndzi surndata ala gə wa. Kamnyar mdər kəthlər ndaga tsa ka mdər kəthlər damwa na olta tsa, antə japwa ɗa ka mdər kəthlər damwa na olta da.

⁹Riɓa tə mda ana wuta akwa fakəu an kamnyar shanga mji. Apani kalkal ka kuthli wuta abbər su aɗi hilantə fakayeri wa. [1]

¹⁰Ma gə hir kwaba, kwaba aɗi ata mzhi ngə wa. Ma ga ata bara ndzi mdər gəna, shanga su tə gə wuta aɗi ata mzhi ngə wa. Ngəni shang ghər gapani.

¹¹Kəlara sakatə ga ku wutə susəma hang, ga ata wutə mjir dlar nga akwa səmari hang tsuwa. Apani watsəɓər mthlakari an ka tsa wutə ka ncari daci abbər tsa ka gəna.

¹²Mji na ana kəthlər ka duna ana pəpəi ka heni lapiya, wala da aɗi wutə su hang ka səm wa. Amma mjir gəna ana dzam hang har ka ngkata ala ɗa heni.

¹³Su damwa na ɗimi tə I wuta akwa duniya ni an abbər mdə ana vəi kwaba kamnyar ta nuhum asar laga asə wutə ni.

¹⁴Amma akwa tsikərari tsa ata shamta ɗa shang akwa lakwayeri na kula ampani, har ka ni ka su tə tsa ata zharari aka maɗa'ni.

¹⁵Apatə mda ana yaɓəla ɓzəngkyar kula su akwa tsiyari, tsu apani antə tsa ata sə mta kula su. Akwa shanga su tə mdə ghəra akwa tsaɓari akwa duniya ni, su aɗi tə tsa ata kətari ka təra kəgari wa.

¹⁶Shang watsəɓər kəthlər aɗi aka mdə wa, kamnyar ndzi apa təng mda akwa kəthlər aka shambar daci. Kamnyar tsu apatə mdə si kula su akwa duniya antə tsa ata təra. Ai ngəni sur damitədzi na jirari!

¹⁷Tsa kuri shanga ndzəndziyirni akwa nca su hara hara ka tuwa, akwa ɗəffə ɓzəɓza, ka nggawakur, ka damitədzayeri.

¹⁸Wala apani su na ɓɗakta shang tə I wuta abbər ka mdə hara an ka tsa səm ka sa, ka nggatə msərakur kəthlər tə Hyel na alari akwa shanga ndzəndziyirni. Kamnyar ngəni an nəɓwar mda.

¹⁹Ma Hyel ku nar gəna ka lapiyakur aka mda, ka dunar nggatə msərakurər ɗa, təng ka tsa nggatə msərakurər ɗa. Kamnyar ma Hyel aɗi hir wa, mda aɗi na ata mzhi nggatə msərakur suayeri ngəni wa, wala dlu su tə Hyel ɗəmha alari wa, wala nggatə msərakur kəthlərərni wa. Kamnyar ngəni an cauta na thlata akəla Hyel.

²⁰Jiri, Hyel ana hamta su hang aka mdə ka tsa nggatə msərakurər ɗa, har tə tsa aɗi ata dzama ata kəra ndzəndziyirni wa.