Read bura-pabir M. Ngkəra 7 Bible Online

M. Ngkəra 7 - bura-pabir bible

M. Ngkəra 7

¹Thləm na ɓɗaku ku təramta tulari na ka masərni ɓəɓal, tsuwa vir tə ga ata mta ku təramta vir tə mdə ya nga.

²Kuji ka mdə mwari akwa vəi tuwa, ta mwari akwa vəi kucali, kamnyar vəi ngəni ata ɗangtə aka mdə tədəku abbər shanga mji akwa səkə mta.

³Ɗəffə ɓzəɓza ku təramta kucali. Kamnyar wala tə tsa ata namtə kəma ga hərhərari, tsa ata thlipta ala gə sur dlara.

⁴Tədəku mdə na ɗəɗu ana dzama ata kəra mta, amma kwafa ana dzama ata kəra kucali daci.

⁵Kuji ka mji na ɗəɗu mpa ala gə ta kwafayeri azwalitə nga ka hayeri.

⁶Kamnyar kumshir kəgaɓu ndzi tsu apa mtəhəra na akwa ndəkəla akwa u'u akira tughum. Ngəni shang ghər gapani!

⁷Jiri, zambakur ana hilantə mji na ɗəɗu ka da ndzi caku, antə sur dzəɓə mnya ana ɓzamtə hala mda.

⁸Tsikəra su ku təramta baɗitari, antə mbwiɗəffu ku təramta gaya.

⁹Ga aɗiya hir ka ɗəffa ga ɓzi taktar wa, kamnyar tar caku andər ndzi ka ɗəffə bwarbwar ata kəra su.

¹⁰Ga aɗiya pəla, “Su na waci ku təramta sur zaman ni” wa. Kamnyar aɗi kalkal ka gə pəla su apani wa.

¹¹Mdə na ɗəɗu tsa kalkal ka mdə na ka gəna, har ma tsa təramta mdə na ka gəna.

¹²Kamnyar ɗəɗukur ata ɓəlatə nga tsu apatə kwaba ata ɓəlatə nga. Amma kalkal kara sənda abbər tar ɗəɗukur an ata mzhi msərantə mpika ga.

¹³Dzama ata kəra su tə Hyel ku harata. Wan ata mzhi thlyangɓəla su tə tsa namtə mbalmbalari ri?

¹⁴Ma sakatə su akwa mwa ala ga, ka gə ndzi ka kucali, tsuwa ma bwani ku si ka gə ɗangta abbər japwa ɗa thlata akəla Hyel. Tsuwa mda aɗi na amzhi səndə su na ata hara alari akəmazi wa.

¹⁵Akwa ndzəndziyir bwanikuri su aɗi ama kula I wuta akwa duniya ni wa. Saka laga ga ata wutə mdə na pwa ata mta akwa ɓɗakkurərni kula sakari. Saka laga tsuwa ga ata wuta abbər kəmanggar ata fəi akwa duniya akwa ɗimikurərni.

¹⁶Ga aɗiya gaya ata kəra ɓɗakkurər ngə wa, wala ncanta abbər gə ɗəɗu dzau wa. Kamnyar atar su apani ga ata tsi kər nga.

¹⁷Ga aɗiya ndzi kəmanggar dzau wa, wala ndzi kəgaɓu dzau wa. Kamnyar atar su apani antə ga ata tsi kər nga akəmata sakari.

¹⁸Zhar hara su ka təra vəyari ni, kara ndzi ata ɗəffu. Kamnyar mji na ana thlivər ɗəffa Hyel ana msərəmta asar ka mta na kula sakari.

¹⁹Ɗəɗukur ata vu kara ndzi ka duna ta mji kuma na akwa hara kuthlikur akwa bərni pal.

²⁰Mda aɗi akwa duniya ni na ana hara su na kalkal kəlara saka kula tsa sha wa.

²¹Ga aɗiya kətə kəlara su tə mji pəla abbər jiri wa, kamnyar ta ga asə nggata abbər buɗar nga akwa nggəl nga.

²²Kamnyar gə ka kəra ga ku sənda abbər ga ku nggənggəl mji ka hang.

²³I ku wul shanga su nayeri ka hangkal, ka ngkərtə shanga su atar ɗəɗukur. I pəla I ata ndzi ɗəɗu kəi nggaɓəla su nayeri ni, amma ku təra kərathli.

²⁴Kəlara su tə Hyel ku namtə ku təra duna səndər mburu, da zurang ka mwavər kamta. Mburu amzhi nggaɓəlari wa.

²⁵I ku paka akwa kəlara bwa, abbər kəi wutə ɗəɗukur kamnyar kəi nggaɓəla karapur suayeri. I bara kəi nggaɓəla laku tə ɗimikur an cakukur, ka laku tə cicukur an kəgaɓkur.

²⁶I ku nggaɓəla abbər mwala na karwa mwavər ta mta, tsa ndzi apa dərku. Atar hirkurərni ala gə ka ɓɗakkurər dzari antə tsa ata ngkəi nga ka mbwahə nga ka tsiyayerari apa məsəsal. Mdə na ana kələngkər aka Hyel ata msər ta tsa, amma tsa ata ngkəi mdər biku.

²⁷Ngəni an su tə I wuta, ndə mdər ngkər labar ni, I ku nu ɗa pal pal, kəi nggaɓəla laku tə mdə paktə ɗa.

²⁸I ku jaktə wul ka wula abbər tsu nuhum I anggaɓəla, amma shang wa. I wuta abbər mda ata wutə mdə sal na pwa pal akwa nca mji shili dəpu pal, amma akwa nca mwanki wala mwala duku aɗi wa.

²⁹Ngəni an kura su tə I wutə: abbər Hyel ku namtə mburu shang kalkal ka jirkur, amma mburu ku shinardzi akwa hara su na ɗimi.