Read bura-pabir M. Ngkəra 8 Bible Online

M. Ngkəra 8 - bura-pabir bible

M. Ngkəra 8

¹Akwa laku madi tə ga ata mzhi nggaɓəla mdə na ɗəɗu ri? Tsuwa wan ata mzhi ngkərɓəla karapur suayeri ri? Tsa ata mzhi nggaɓəla mdə na ɗəɗu atar laku tə kəmari akwa. Kəmari ata ndzi pwipwiyari ka kucali, tsa aɗi ata hərkəma wa.

²Ka gə kələngkər aka kuthli, kamnyar ga ku kətə alkawal akəma Hyel abbər ga ata hara ngəni.

³Ga aɗiya huvə nggəlar ndərər kuthli wa, wala hara kər ɓəɓalkur alari wa. Təra kazhar vəi tə su na mwavər ata, kamnyar kuthli ata mzhi hara kəlara su tə ɗəffari hira.

⁴Kamnyar ndərər kuthli an olta shang. Mdər mzhi nggəlarari wala yu mnyari ata kəra su tsa akwa harari aɗi wa.

⁵Mdə na ana kələngkər aka kuthli aɗi ata kəɓa ka bwani wa. Mdə na ɗəɗu ana paktə saka ka lakur hara su na kalkal.

⁶Kəlara su ka sakarni ka lakur harari tsuwa, amma dwali ka mji nggitə su akwa sakatə su mwavər.

⁷Təng tə mda aɗi wala duku na asəndə su na ata sə hara wa, mda aɗi na ata mzhi pəla ala mburu su na akəmazi wa.

⁸Mda aɗi na ata mzhi ngkatə ta mpikari aləɓəla wa, wala pali vir mtərni wa. Ngəni an mpa tə mburu amzhi hwiyimtari wa. Ɗimikurər mda amzhi msərantə ni akwa ɗimikur wa.

⁹I ku wul shanga suayeri na akwa hara akwa duniya ni, vəi tə mji akwa ləkəma ka nar bwani aka nvwa ɗa ka dəkəi ɗa, antə I ku dzama ata kəra ɗa shang.

¹⁰Tsuwa I ku wuta abbər mda akwa harəmta mji na ɗimi ka gaya. Mda ana fatə ɗa akwa vəi vəngkər səli ka ra harəmta ɗa. Mji ana hu ɗa tsu akwa di natə da hara ɗimikur ni. Ngəni shang ghər gapani.

¹¹Kamnyar ma mda aɗi ɗi mji na ɗimi taktar wa, mji ana wuta apa su aɗi na ɗimi akwa wa.

¹²Jiri mdər biku ata mzhi ləkəma ka ɗimikur akwa shanga ndzəndziyir mpikari, ka nggatə msərakur ndzəndziyirni. Amma I ku sənda abbər mji na ka thlivər Hyel akwa ɗəffa ɗa an təramta.

¹³Mji na ɗimi aɗi ata fəi akwa duniya wa, wala wutə ləkəma wa, kamnyar da aɗi ka thlivər Hyel akwa ɗəffa ɗa wa.

¹⁴Su damwa aɗi na kula dlara akwa duniya: Mji na pwa ana kəɓa ka bwani na kalkal ka ndzi aka mji na ɗimi, tsuwa mji na ɗimi andər dlu watsəɓər mji na pwa. Antə I pəla abbər ngəni ma ghər gapani!

¹⁵Apani I akwa pəla abbər kuji ka mdə nggatə msərakur ndzəndziyirni, kamnyar an su tə kalkal ka mdə hara akwa duniya: ka tsa səm susəma, ka nggatə msərakur. Atar ngəni antə da ata nggatə msərakur ata kəma duku ka bwani tə da ana wuta akwa kəthlər tə Hyel na ala ɗa akwa duniya.

¹⁶Kəlara sakatə I pəla I ata bara kəi ndzi ɗəɗu ka nggaɓəla su tə mjir duniya akwa harari, I ana ɓukci ka pi ata wula,

¹⁷kula nggaɓəla su tə Hyel akwa harari. Wala ga an kəɗar ka kəɗari, ga aɗi ata mzhi nggaɓəlari wa. Mji na ɗəɗu ata mzhi pəla da asənda, amma da asəndə wa.