Read bura-pabir M. Ngkəra 9 Bible Online

M. Ngkəra 9 - bura-pabir bible

M. Ngkəra 9

¹Jiri, I ku fəi akwa dzama ata kəra su ngəni akwa ɗəffi. I wuta abbər mji na pwa ka mji na ɗəɗu kəga su tə da ana hara shang an akwa tsiya Hyel, har kəga hirdzər ɗa kəga nggəlardzər ɗa. Mda aɗi amzhi səndə su na ata hara akəmazi wa.

²Zumzumkur aɗi wa, təng tə asar jili duku an ata wutə mburu shang, mji na pwa ka mji na kəmanggar, mji na kəcəkəcari ka mji na adiya, mji na ana vəngkər səli aka Hyel ka mji na aɗi ana vəngkər səli alari wa. Su na ata wutə mji na pwa an ata wutə mjir biku, su na ata wutə mji na kətə alkawal aka Hyel an ata wutə mji na nggəlar kətə alkawal aka Hyel.

³Ngəni an su na ɗimi na ana hara akwa duniya, abbər jili asar duku an ata wutə shanga mji ni. Su ngəni ana vu ka shanga mji ndzi ka damitədzi akwa shanga ndzəndziyir mpika ɗa. Ɗəffa ɗa ana ɓzə ka duna har ka da ndzi apa da ka cicu, ka sə tsikəra ndzəndziyir ɗa ka mta.

⁴Amma mdə na tsu ka mpika ata mzhi vəkər ka su na ɓɗaku akəmazi. Kamnyar mji ana pəla, “Kila na ka mpika ku təramta tsəngi na mtəmtari!”

⁵Kamnyar mji na ka mpika asənda abbər da ata sə mta, amma mji mtəmta asəndə suma wa. Da aɗi ka watsəɓa damwa wa, tsuwa mda aɗi ata ɗangtə ɗa kəra wa.

⁶Laku tə mji hir ɗa, ka laku tə mji nggəlar ɗa, ka laku tə mji ana səlkər ɗa akwa shang ku kuri. Da aɗi ata jaktə hau tsi akwa kəlara su na akwa hara akwa duniya ni wa.

⁷Antə apani, ləkəma ka səm susəmər nga ka sa yimər anapər nga ka kucali, kamnyar ngəni an su tə Hyel ɗəmha ala ga.

⁸Tədəku ka gə ndzi ka kucali ka ɗəffu mwapu.

⁹Ka gə ndzəndzi ka kucali ka mwala tə gə hir akwa shanga virayeri na mwavər tə Hyel hamta ala ga akwa duniya ni. Kamnyar ngəni an kura msərakur tə ga ata wutari akwa ghərər nga ata kəra duniya.

¹⁰Kəlara su tə ga akwa harari, hara ni ɓɗaku. Kamnyar akwa kula mda aɗi ata jaktə hara kəthlər, wala jaktə dzama su, wala səndə su, wala jaktə ndzi ɗəɗu wa.

¹¹Su damwa tə I wuta akwa duniya ni an abbər aɗi parang mdə na ana hwi ta shang andər səm wa. Aɗi parang mdə na katsala ta shang andər səma akwa mpa wa. Aɗi parang mji na ɗəɗu andər mzhi vəi kərɗa wa, tsuwa aɗi parang mji na asəndə su andər wutə gəna wa. Aɗi parang antə mji na kalkal ka da pwar mji ana wutə vəi ndzəndzi na ola wa. Kamnyar asar wala saa ana wutə kəlara mda.

¹²Kamnyar mda aɗi na ana səndə sakar mtərni wa. Tsu apatə mda ana ngkəi kəlfa akwa banggama, ka apatə mda ana ngkəi ɗika ka dərku, antə mta ata sə kətə mda kula səndərni.

¹³I ku jaktə wutə su damwa ola ata kəra ɗəɗukur na ku kəs kəri akwa duniya ni.

¹⁴Saka aɗi laga tə kuthli laga na ka duna na ku si ka sojayeri arni ka da dlərəmta di laga. Di nda raka ka mji yiɗauwa. Da si ka kalaktə di ni ka sojayeri arni ka jiktə pelayeri har ka kalaktə di ni kəgari.

¹⁵Amma mdə laga aɗi akwa di nda na ɗəɗu wala tə tsa ngguɗi. Antə tsa ku msərantə tsəɗi ni atar ɗəɗukur ni. Amma aghəla nda mda aɗi na ɗangtə mdə na ngguɗi ni wa.

¹⁶Antə I wuta abbər mdə na ɗəɗu ku təramta mdər duna, wala tə mda aɗi ana dlu sauriyir mdə na ngguɗi ni ka hara kəthlər kəgari wa.

¹⁷Amma wala apani kuji ka mdə psi thləm aka sauriyir mdə na ɗəɗu ta psi thləm aka kurakər kuthli na akwa kəga cakwayeri kamnyar dlara.

¹⁸Ɗəɗukur ku təramta kəlara kari mpa, amma wala caku duku ata mzhi ɓzamtə su hang tə mdə na pwa ku namta.