Read bura-pabir H. Ha Hayeri 2 Bible Online

H. Ha Hayeri 2 - bura-pabir bible

H. Ha Hayeri 2

¹I ndzi apa pukdlə laga akwa dərakər Sharon, apa pugdlər laga raka akwa kuta gar.

²Apatə pugdlə ku təramta mtəhəra ka ɓɗakkur, antə ga ku təramta shanga maɗangkwi ka dakwikur.

³Apatə nfur appəl ku təramta shanga nfwayeri ar kuɓər nfwa, antə ga ku təramta shanga maɗadakwi. I ana nggatə msərakur ndzi akwa shanggurər nga, yar nga an nənəm akwa mnyi.

⁴Ga ku mwantə ra akwa mbwar səm susəmər kucali, ka hartə ra ka hirkurər nga.

⁵Dunautə ra ka wainar anap, ka ra namtə ra lapiya ka appəl ar nga, kamnyar I ka mi ar hirkurər nga.

⁶Hangkir tsi matsəkara ga akira kəri, ka gə kəsi ra ka tsi mazəma ga.

⁷Maɗangkwi Urushalima, I akwa kiɗə giri, akwa thləma kimar ka mina ar mtakəu abbər, Usa giri aɗiya damitə yeru sakatə yeru akwa nggatə msərakur nvwadzi wa, tar ma ku mzhi yeru.

⁸Psi thləm, I akwa ngga kuraka mdə tə I hira, tsa akwa səghəi ata kəra garayeri, akwa fəlfəla ata kəra ɗəɗəgəlayeri.

⁹Dakwiyirna ndzi apa kimar akwa mtakəu apa ɓzər jikəl na ɓəɓatu. Wul ni, athləthlata aɓəla adzə kadaka yeru. Tsa havəi ncari akwa gula, akwa wul su avəi,

¹⁰akwa gari ali. Sər bu, mdər ɗəffi, Sər mwa təra, mwala ɓɗakkurərna,

¹¹Kamnyar wul vəya ku kuri, yimi aɗi kəra wa.

¹²Pukdlayeri ku hartə duniya! Ngəni an sakar hara ha! Bukəlayeri akwa hara har kucali akwa kəlara bwa madi.

¹³Kamndayeri ku baɗitə ng'ha, pukdlayeri ar anap ku baɗitə hamta shiwur msəra. Sər bu, mdər ɗəffi, Sər mwa təra, mwala ɓɗakkurərna!

¹⁴Gə ndzi apa bukəl na ɗuwardzi akwa daɓwa kur jikwara pela, akwa thlimbəla gar laga. Ndzi kəi wutə kəma gə na ɓɗaku ni, kəi nggatə yimər kuraka gə na msəra ni.

¹⁵Tar ka mwa ngkəi ufa sasiyayeri, ufayeri na raka raka ni, na akwa ɓzamtə fakər anapər mwa ni, kamnyar təgwar anapər mwa ku baɗitə pukdla.

¹⁶Ɓzərdakwiyirna an arna, antə I arni. Tsa ana ɓəla akwa nca kudlayeri!

¹⁷Kwabər viri akura ka kuthlu sha, Ka gə ngka adzə ra ka hwi dakwiyirna, ga apa dakwi kimar, apa ɓzər mina na akwa fəlfəla akwa daɓwa garayeri.